نيجي بقى على الحج نفسه
كحاج متمتع كنت خالع الاحرام ومفيش أي حاجة محظورة عليا اعملها
فجر يوم 8 ذو الحجة رحنا السكن بعد صلاة الفجر عشان نحرم من هناك
ما دلوقتي بقيت زي أهل مكة أحرم من بيتي
وأحرمنا وعلاء المصري قال انا مش عارف هحج السنة دي ولا لأ ويمكن احصلكم على عرفات
(( لأن أهل مكة والمقيمين فيها مبيحجوش على السنة ولكن بيحجوا الفرض بس .. يعني ميروحوش منى يوم التروية وميقعدوش فيها ايام الرمي كلها وده لأنهم بيحجوا كل سنة تقريبا وبيسيبوا اعمالهم تلات ايام بس ويحجوا ويرجعوا ))
كنت شاري حاجات غالية ومش عارف اعمل فيها ايه
فضلت ادور على مكان اخبيها فيه والاخر خبيتها تحت السرير في كرتونة قديمة وسط شوية هدوم وكتب بتاعت علي السوداني صاحب الشقة
والدهب رحت المحل اللي اشتريته منه وسبته عنده امانة واخدت وصل بكده وعنته مع الجوزا في جيب الاحرام بتاعي
الاحرام كنت عامله له جيب بالكباسين من غير خياطة كنت بعين فيه كل الفلوس الجواز والتذكرة والحاجات المهمة أوي
بعدين بعد ما أحرمنا يوم التروية اللي هو يوم 8 ذو الحجة بعد صلاة الفجر وصلينا الركعتين سنة الاحرام وقلنا لبيك بحج ومشينا بعد شروق الشمس
توجهنا لمنى مع علاء بالعربية ونزلنا عند أول حد منى
وقال من هنا تمشوا لحد ما توصلوا جامع الخيف وتقعدوا هناك
رحنا الأول اشترينا ما يلزمنا
انا اشتريت كوفرته عشان البرد بالليل وافرشها اقعد عليها في اي مكان عشان الاحرام
وكنت اخد معايا بعض اكل بسيط جدا
والحاج رزق اشترى لوزام برده كده
اطرف حاجة علاء المصري كان ماسك ليا زلة
اني سالت عن أحمد جابر لما رحت
وزيقولي جاي من مصر تسأل عن احمد جابر
وكل حبة يضحك ويألف عليها نكتة مختلفة وكله يضحك عليا
واحنا رايحين منى يوم التروية في عربية علاء الحاج رزق بيقول عايز أشتري كوفرتة
أنا لما حجيت قبل كده اشتريت واحدة وكنا بنتغطى بيها انا وعشرة معايا
علاء استلمه
وقاله تغطي عشرة بس ياراجل
كوفرتة الحاج رزق يتغطى بيها ييجي 100
وطول الطريق يألف نكت عليها ويضحكنا
ولما رحنا نشتري لوزام الحج قبل دخول منى الحاج رزق اشترى كوفرته صغيرة جدا تكفي واحد بالعافية
كنت واخد معايا زجاجات مياه زمزم والسجادة وكتب بسيطة ادعية وحاجات عن الحج عشان نرجع لها لو اختلفنا او نسينا في اداء المناسك
اخدناها مشي لحد مسجد الخيف
وده مسجد صلى فيه سبعين نبي والرسول عليه الصلاة والسلام كان ينزل به طوال اقامته في منى
جامع اد الجمعية الشرعية بتاعتنا في المنصورة اد عشر مرات كده
او على الأقل سبع أضعاف
بياخد جوالي 10000 مصلي (( عشرة آلاف))
ودخلنا وفرشنا وقعدنا جوه في مكان كويس وفي مسجد الخيف بتصلي كل الصلوات قصر حتى لو كانت جمعه ومفيش صلاة عيد فيه وكمان مفيش جمع للصلاوات في القصر
بتصلي كل صلاة بميعادها في وقتها لكن قصر
ومفيش تسبيح بعدها اوكده ولا صلاة سنة
قضينا اليوم كله في منى في مسجد الخيف والميزة الجميلة ان بعد كل صلاة فيه درس ديني عن الحج وادابه والتوعية بيه بيلقيه كل مرة عالم ديني مختلف من علماء الجامعات السعودية واسئلة للحجاج واجابات وحاجة بصراحة جميلة جدا
قبل ما أكمل هنا لازم نعرف حاجة مهمة
أن كل شركات السياحة والقرعة مبتوديش الحجاج منى يوم التروية
عشان هو بيحجزلك خيم في منى تقعد فيها لما ترجع من عرفات مش قبل ما تروح
فهو بيقولك التروية ده سنة احنا نروح على عرفات مباشرة
فاللي بيلتزم بالسنة بسيب الشركات ويقعد في مسجد الخيف او طرقات منى و يقابلهم بعد كده بعد عرفات
السلطات السعودية كانت مغلسة جدا ومغرقة طرقات منى بالمياه عشان الناس متفترش الطرقات ويحصل حوادث بسبب الموضوع ده
بس احنا كنا جوه لمسجد
ودي ميزة انك تكون مع مجموعه
لأنك لو خرجت من المسجد
ورجعت مش هتلاقي مكانك
هتلاقي حاجتك بس مكانك ضاع
وفي برده قسم للنساء في المسجد
خلصنا يوم التروية وخرجنا بعد صلاة الفجر في مسجد الخيف صباح يوم التاسع من ذو الحجة
ايضا بعد طلوع الشمس بدأنا التحرك ومشينا مع سيول الحجاج بدون اي تزاحم على الاطلاق
المسافة كلها 8 كيلو فقط
مشينا والطرق واسعة جدا تاخد مثلا 100 واحد في صف جنب بعض عادي
وفي ناس كتير بتروح راكبة زي بتوع السياحة والشركات والغير قادرين على المشي
بس من المناظر الجميلة او واحد بيدفع زوجته على كرسي متحرك ومتحمل الشمس الفظيعة دي عشان ياخد ثواب المشي لعرفات
ووصلنا عرفات بعد ما كان خلاص
مش قادرين نمشي وخلصنا المياه اللي معانا والشيل حسيت انها تقيلة جدا بس مقدرش استغنى عنها لأن كلها ضرورية وهحتاجها في عرفات وبعدها
وصلنا مسجد نمرة في عرفات
وكان زحمة بشكل رهيب والناس بتحوطه من كل الجهات
عمي كان عايز يصلي جوه مسجد نمرة
وفعلا دخل وتاه مني أنا والحاج رزق
الطريف قبل ما ندخل المسجد مش عارفين القبلة ازاي
وفضلنا نلف ونسشأل الناس كلها اللي قاعدة فين القبلة محدش عارف
وخايفين نكون ادام الامام لما تبدأ الصلاة ؟
اخيرا قلت لعمي نحاول ندخل جوه
وجينا ندخل لقينا طريق
بس زحمة رهيبه
وعمي انفصل عننا ومعرفناش نحصل له
والأمن بيقول للناس واحدة واحدة
ومفيش فايدة
بمناسبة التزاحم في أول الحج والحرم فاضي خالص في مكة الناس تدافعت عند حجر اسماعيل بعد المغرب وزقوا بعض عند فتحة الدخول وانا كنت وسطهم واتزقيت واتشالت واترميت على الأرض واقف ودست على ناس واتقلبت عشان محدش يدوس عليا وبتوع الأمن لحقونا ووقفوا الطوفان الهاجم ومن اصعب الأمور في الحج أنك تتحكم في طوفان بشر مش شايف اللي ادامه وعايز يدخل او يمشي في الطريق ده ومن هنا بتحصل حوادث الموت تحت الأقدام في الحج
لما عمي دخل وانفصل عننا وانا والحاج رزق معرفناش ندخل قلنا خلاص نشوف حالنا
وكنت سايب الموبايل في السكن عشان متشغلش بيه
ولقينا عمي راجع من جوه المسجد وبيقول ادخلوا اختلفنا
ندخل ولا لأ والناس اصلا بتخرج من جوه عشان مفيش مكان يقعدوا فيه
دخلنا وفضلنا نلف في المسجد وهو ما شاء الله مساحته مهولة مكنتش متخيلها من بره لما دخلته لقيته حاجة رهيبة
المهم اخيرا قعدنا نص قعدة على حافة الطرقة
ومن حقك تقعد بس الا في الطريق بين الأجزاء جوه المسجد عشان تسيب طريق للخروج والدخول ومحدش يداس
وأخيرا لقيت واحد أفغاني حاجز مكان لناس معاه
استاذنت منه هقعد لحد ما ييجوا
وقعدت كده لحد ما جم اللي معاه واتاخرت مسافة والمهم اخيرا قعدنا وشاورت لعمي وللحاج رزق على مكان صغير جدا فاضي يقعدوا فيه
وعنينا مع بعض عشان منتوهش
واتفقنا لو حد تاه يقضي عرفات وةالمزدلفة ونتقابل في جامع الخيف عند باب معين
أول مرة اسمع خطبة عرفات من الشيخ اللي بنشوفه كل سنة في التلفزيون الصبح
وكانت بصراحة خطبة جميلة واول مرة افهم خطبة الحج والراجل كان مبدع واتبسطت من خطبته جدا
ودعا وصلينا الضهر والعصر قصر جمع تقديم
وبعدين بقى خرجنا من المسجد في شيء من السهولة
واهم حاجة تاخد بالك انت في نمرة ولا عرفات
لأن المسجد نصفين
نصفه في نمرة ونصفه في عرفات
وفي علامة ونور ولوح كتيرة بخمس لغات توضح الفاصل بين الجزأين
واحنا الحمد لله كنا قاعدين في الجزء الصح الخاص بنمرة
عشان مندخلش عرفات غير بعد الصلاة
موضوع: أحداث الحج 7 
الجمعة يناير 23, 2009 11:06 am