نزلت من عندها ورحت المطعم اللي دخلته مع عمي ومكنش فيه مكان
وقعدت أكلت تقريبا فرخة كاملة
بس هناك الأكل مش دسم زي عندنا
والفراخ واللحمة مش سمينة فمش مغذية زي عندنا
تاكل وبعد ساعتين تحس انك جعان وانك مأكلتش
والفواكه هناك مالهاش طعم اطلاقا
انا جبت كيلو برتقان مع العسل وتفاح لما كنت عيان واكلتهم بالعافية عشان بس اتقوى بيهم
بعد الأكل رجعت السكن وتاني يوم رحت حاجة كده زي وحدة صحية وادوني تطعيمات الحجاج هناك وهي في ضهر السكن بتاعنا تقريبا
ورحت الحرم وصليت هناك كل اللي فاتني في الأيام اللي كنت نايم فيها
وطفت وسعيت بس كنت بتجنب اي مراوح او تكييف
واقعد في الضل وبعيد عن الهوا
وكفاية كده النهاردة عشان اقوم أنام
المرة الجاية ان شاء الله نتكلم عن ايه ؟
لو في حاجة قبل الحج ما يبدا هقولها
مفيش هندخل على الاحرام يوم التروية والتوجه لمنى
ربنا يسهل
مش هنسى أن خطيبتي لما كلمتني قفعدت تقولي انت شكلك تعبان انت بتخبي
قلت لها شوية سخونية ونبهت على عهمي لو حد كلمه ميقولش اني تعبان
امي كلمتني وسالتني مالك قلت لها انا عادي
راحت ملكمة خطيبتي وقالت لها عماد ماله انا حاسة انه مش سليم
قالت لها بصراحة هو تعبان
راحت جدتي اتصلت بعمي وزعقت معاه ازاي تسيبه يتعب ؟
مش عارف الراجل كان يعمل ايه يعني ؟
وبعد ما فقت ورحت الرحم الاقي اتصالات من ارقام غريبة
والآخر يطلع جوز واحدة قريبة خطيبتي عايش في السعودية في مدينة بعيدة جدا بيقولي انا سمعت انك تعبتان مش عايز حاجة طب صحتك طب عايز فلوس؟
قلت يالهوي على الستات
وقلت لها متقوليش لحد
الاقي الخبر وصل لحد السعودية
مش البيت بس في مصر ؟
وفعلا لما تحب تنشرلا خبر قوله لواحدة ست وقولها ده سر
ندخل بقى على العشر الأوائل من ذو الحجة
وكان حصل لخبطة في مووضع بداية ذو الحجة وهل ثبتت الرؤية أو لأ
وفي ناس صامت يوم بدري
وطبعا الصيام هناك متحسش بيه خالص في الجو ده
الشمس لافحة زي ما بيقولوا بس في هو في الجو ومتحسش بالحر
لكن تحس بأشعة الشمس الحراقة بعد الساعة 11 لحد قبل العصر بحاجة بسيطة
المهم قضينا أيام ذو الحجة صيام وقرآن وصلاة
وكنت بروح أبات كل ليلة في الحرم لسببين
أني لو نمت في السكن ممكن مصحاش للفجر
والسبب التاني أن كان في صوت كائن غريب في الأوضة اللي بنام فيها
ومسكت المقشة ولفيت الأوضة كلها وملقتش حاجة وأول ما أنام اسمع صوت زي الفحيح كده
نمت يوم واتنين والآخر اعصابي تعبت
فقلت معدتش نايم هنا
كنت بحط الشبشب بتاعي في شنطة واحطه تحت دماغي وافرش السجادة اللي اشتريتها من هناك وانام عليها والموبايل والنضارة جنبي وانام لحد الساعة 2 او 3 بالليل
أقوم اتوضأ واصلي واقرأ قرآن زي ما ربنا ييسر ليا
وخرجنا كذا مرة نشتري الهدايا والحاجات
دي قبل ما ننشغل في الحج وأيام الزحمة
مع دخول ذو الحجة كان الحرم بدا يمتليء ويفيض بالناس والساحات تتملي وزحمة رهيبة
وعشان الناس اللي بتخاف من الزحمة احب أقول ان في نضافة تامة في الحرم
وكل كم ساعة فرق التنضيف بتخرج تمسح الساحة كلها بمياه ومسحوق رغوي مطهر
ويمسحوا وينشفوا يدوي وآلي بمكن مخصص لكده
ومسح بذمة بفرش كهربية بتدعك الرضية عشان اي حاجة معدية او مش نضيفة تكون لازقة في البورسلين بتاع الساحة
والحرم نفسه بيتنضف كل ليلة بنفس النظام
وعند الكعبة كده برده
واحد يقولي بينضفوا ازاي في الزحمة دي
بيقسموا المكان المراد تنضيفه لقطاعات
اربع عمال يمسكوا بشريط كده زي بتاع الزينة ويلفوا بيه مكان على شكل مربع ومحدش من الناس يدخل المربع ده ويتنضف واللي بعده وهكذا
حاجة ميه ميه
وكمان دورات المياه كلها هناك تحت الأرض
وواسعة جدا ونضيفة جدا
وكل يوم مرتين يقفلوا قسم وينضفوه واللي بعده وهكذا مرتين يوميا
مفيش حاجة هناك اسمها بايظة ولا قذرة
من مميزات انك تبات في الحرم في الأيام دي انك تلاقي مكان تصلي فيه
لأن الأيام اللي كنت ببات فيها في السكن واروح قبل الفجر بساعتين مكنتش بعرف ادخل الحرم جوه
كنت بلجأ لحيلة
اسيب الزحمة واروح على كوبري من الشارع يطلعك الدور التاني فوق باب العمرة وادخل الدور التاني وانزل على الدور الأول ومنه اجاهد واعدي الصفوف عشان اوصل ساحة الحرم واصلي عند الكعبة
بس مرات كتيرة كنت بصلي في الساحة بره الحرم لما بقينا خلاص مفيش حاجة عن الحج
الفطار طبعا بيكون بعد صلاة العشا
وتخرج تلف براحتك شوية
موضوع: أحداث الحج 6 
الجمعة يناير 23, 2009 11:03 am