أحداث الحج 5

دلوقتي احنا في فترة انتظار العشر الأوائل من ذو الحجة
عشانت مننساش أنا قلت أنا رحت قبل الحج بشهر كامل
المهم من أول ما رحت وأنا بسأل عن التعطيمات الخاصة بالحجاج
ولأني مش داخل بتأشيرة حج خاصة ماليش تطعميات في المطار

ولما وصلت مكة اهتميت جدا بالموضوع ده عشان الواحد عايز يعدي فترة الحج بسلام ميقعدش عيان في المستشفى ويضيع عليه الحج لو اخد عدوى من اي حد
الكحة مكنتش بتنقطع في الحرم في أي وقت من ليل أو نهار على فكرة
حتى امام الحرم حصلت له نفس العدوى وبدا يكح بعد كم يوم من انتشار الكحة في الحرم

انا كل يوم اروح مستشفى أجياد وأسأل يقولوا لسه موصلتش التطعيمات
واشتريت كمامة زي بتوع الصين عشان الأنفلونزا وموضوع الكحة
وكل ما اروح المستشفى يقولوا لسه
اخيرا حسيت أني تعبان
رحت لمسشتفى أجياد وقالولي انت معاك تأشيرة حج ؟
قلت له زيارة مفتوحة
قالي مالكش علاج عندنا
بصراحة حسيت انهم أغبيا
يعني انا لو عييت وعديت الف واحد هيبقى كويس ؟

المهم خرجت اأسأل في أي صيدلية عن تطعيمات الالتهاب السحائي وده أكتر حاجة بتحصل في الحج
مفيش في أي مكان غير في المستشفى اللي كنت فيها
ومبيطلعش بفلوس
للحجاج الرسميين بس مجانا
هنا فهمت إني كان لازم أخده في مصر

المهم مشيت في شارع أجياد وأغلب البعثة المصرية بتسكن في الشارع ده
حج القرعة خاصة وهو قريب من الحرم

مشيت لحد مقر البعثة الطبية المصرية
وقلت للدكتور هناك انا بكح كتير وحاسس اني تعبان وعايز تطعيمات
قالي مفيش تطعيمات هنا ده في الجكومة السعودية فقط
انا أخري أديلك دوا للكحة والبرد
انا اصلا كنت واخد ادوية للبرد والكحة من مصرفشكرته ومشيت
وانا خارج من مقر البعثة الطبية قلت بدل ما أرجع من نفس الطريق وأدخل من الساحة قصاد باب الملك عبدالعزيز أنا امشي طوالي واطلع عند باب الملك فهد ومن هناك اطلع على جبل الكعبة وامشي لحد السكن
فضلت ماشي طوالي مش لاقي الحرم
قلت بدل ما أرجع تاني الشارع الطويل ده انا امشي طوالي وكده اكيد هطلع حواليبن الحرم من بعيد مش مشكلة
فضلت ماشي والطريق بيعلى كل فترة زي كأنك طالع جبل وبعدين وصلت لنفق
قلت أدخل النفق يمكن اطلع عند الحرم
فضلت ماشي في النفق نص ساعة والعربيات بتعدي جنبي زي الطلقة وصوت المراوح في النفق عالي جدا يصم الودن
خلصت النفق لقتني طلعت فوق جبل عالي وشايف كل حاجة لكن مفيش أثر للحرم
فضلت ماشي طوالي ونزلت الطريق الجبلي ده
لقتني في حتة اسمها المسفلة
أنا سميتها السافلة بعد كده وهتعرفوا ليه بعد شوية بس فكروني لو نسيت
المسفلة دي معرفهاش ؟ انا فين كده ؟
لسه هرجع تاني النفق ده ؟
وارجع المشوار لحد باب عبدالعزيز وارجع امشي لحد السكن ؟

مشوار وهدني جدا وواضح انه اثر عليا بعد كده
وحر
وحاسس اني تعبان جدا
كنا بعد صلاة الضهر
وده الميعاد اللي متعود اروح السكن فيه عشان لو هغسل أو اتغدى

فضلت ماشي لحد ما لقيت ناس لابسة احرام ماشية
وداخلين في شارع طويل
مش فاكر اسمه دلوقتي بس هو شارع تجاري كبير ومشهور هناك

فضلت ماشي في الشارع ده لحد ما لقتني طلعت بالظبط عن ناصية شارع أجياد قصاد الحرم اللي انا دخلت منه المشوار ده كله

اتضايقت جدا وفعلا كنت خلاص بقى دخت اوي
وصلت السكن
نمت وقلت لعلاء المصري انا عايزاكشف
قالي نام وبكرة اوديك المستشفى

مش فاكر حصل ايه بس انا فضلت عيان
اه
رحت الحرم العصر صليت وقضيت باقي اليوم في الحرم
تاني يوم بعد صلاة الضهر كنت استويت وحاسس اني ماشي مش داري بحاجة

والكمامة اللي كنت بلبسها زودت الكحة
ودوا مصر مجابش اي نتيجة خالص


مشيت مع عمي بعد صلاة الضهر وقلت له تعالى نجيب عصير
ورحت اشتريت عصير
وهو مشتراش
وبعدين رحنا على السكن
انا حاسس اني ش قادر امشي واللطريق اصلا جبل وطالع وبعدين نازل وعايز اشرب العصير يقويني شوية
وعمي ماشي ماسك لعصير في ايده ومفكرش يديهولي
وانا ماشي جنبه ببص على العصير ومش قادر اقول حاجة
أخيرا دخلنا محل وعمي قال هشتري عصير
واداني بتاعتي
وشربتها وانا بموت

قالي تعالى نتغدى
دخلنا مطعم اسمه واحة الأطعام في حتة اسمها القشلة في مكة متفرعة من ش المنصور ومن شارع جبل الكعبة
كنا بندخل منها اختصارا
زي مثلا شارعنا بين الترعة و بين النخلة
دخلنا مطعم اسمه واحة الأطاعم وكان مليان ومفيش مكان نقعد
دخلنا مطعم تاني بعده وطلبت انا شوربة بس وعمي طلب اكل
الشوربة كان طعمها مش حلو ولا وحش بس هي شوربة خرفان وفيها بهارات وعصرت عليها لمون عشان اشربها
انا قلت ده تعب عشان مباكلش كويس من يوم ما جيت هنا ولما اشرب شوربة وعصاير هفوق وجسمي ينشط ويقاوم البرد والاعياء ده
ومقلتش لعمي اني تعبان او كده

المهم رحنا السكن نمت وقلت لعلاء عايز اكشف قالي لازم الصبح عشان تكون المستشفى فاتحة

في اليوم ده نمت كتير جدا وكنت نايم غرقان في العرق
ومرحتش الحرم
وقمت الصبح مش فايق خالص
رحت السوبر ماركت اللي في نفس العمارة اللي سكنا فيها
ودخلت وانا حاسس اني مش شايف حاجة
وقعدت اشاور للهندي على ازازة عصير كبيرة
وهو ميردش عليا
النظام هناك تاخد اللي يعجبك وتيجي تحاسب مش هو يجيبلك
لما تعبت أوي ومش قادر أتكلم خبطت جامد على ازاز التلاجة عشان يفهم اني عايز عصير منها ويجيبلي لأني لو مشربتش عصير عارف اني مش هشوف خالص وممكن اقع
لأنها كانت بتحصلي لما ما أكلش فترة طويلة كنت مشوفش بعنيا
وحصلت ليا مرة في اعدادي وكل المدرسة عرفتني بسببها لأني خرجت من الطابور وكنت مش شايف حاجة خالص وسحبوني لحد اوضة الألعاب فانا بقيت دايما لو حسيت بكده اكل اي حاجة مسكرة ومحصلتش ليا كتير ممكن مثلا تلات مرات طول حياتي

لما خبطت الهندي قالي افتح وخد اللي انت عايزه
أنا لا قادر افتح لا شايف ولا أقف أصلا
أخيرا وقعت على الأرض خالص معرفش ازاي بس لقيتني نايم بطولي على الأرض ومن رحمة ربنا ان الانسان لما يقع بالشكل ده بينزل على ضهره قبل ما راسه تلمس الأرض

لما وقعت كلهم اتفزعوا ومحدش قربلي
وده النظام هناك على فكرة لما حد يموت في الشارع محدش يقرب له او يغمى ليه بيخافوا يكون مات والشرطة تتهمهم بقتله

راح واحد منهم ينده علاء من الشقة جوه
وانا نايم في الأرض مش قادر انطق ولا أقف ولا أقول حاجة
جه علاء قالي مالك قوم قوم وقفني وجابلي عصير وشربت وجابولي بسكوت او حاجة كده زي الكيك
واكلت وشربت وجيت احاسب مرضوش يحاسبوني ودي استجدعتها فيهم بس صممت وحاسبت
وعلاء سألني حصل ايه قلت له قعدت أقوله هات عصير وهو مش بيرد عليا لحد ما دخت ووقعت
قالي انت لازم تروح المستشفى
نام لحد بالليل ونروح بالليل اي مستشفى خاصة

فعلا بالليل رحنا مستوصف مكة في نهاية شارع المنصور وتحود شمال مسافة بسيطة تلاقيه على اليمين بس مش فاكر اسم الشارع ده حاليا

رحنا نحجز كشف مفيش غير اخصائي وهناك الكشف بنظام
كشف عند دكتور ممارس عام ب40 ريال
عند متخصص ب 60
عند استشاري أو اخصائي ب 100
درجات
المهم مفيش غير الأخصائي
وحجزت وطلعت قعدوني في التكييف
,انا أصلا مخنوق من التكييف
وكنت قبلها بيومين بنقي مكان مفيش فيه مراوح في الحرم عشان اصلي لما حسيت ببداية التعب

المهم دخلت اكشف لقيت الأخصائي دكتورة مصرية قعدت تدردش معايا وتسألني جيت تحج ازاي والقصص دي وكشفت عليا
بصراحة حاجة نضيفة
واستعمال أداوت طبية معقمة بعد كل مرة تستعمل فيها في اجهزة مش مقعمة في كحول واي محلوا مطهر وخلاص
وبعدين قالت حرارتك 39 واربع شرط
انت عندك برد قلب بالتهاب رئوي حاد ولازم تستريح تماما ومتاكلش غير حاجات معينة ووصفتلي كم نوع امشي عليهم زي تمر وعسل ومربى وكده
وقالت تنزل تاخد الحقن دي وتشتري العلاج ده
نزلت أخدت حقنة مضاد حيوي 1000
وحقنة تانية
و
الأوضة بتاعت الحقن فيها تكييف وانا مخنوق مش قادر اتحمل التكييف والممرضة تقولي مقدرش اشتغل من غيره
اخدت الحقن ومشيت مع علاء بسيارته ورحت اشتري الدوا من الصديلية قبل السكن والدكتور كتبلي عليها حاجة غريبة
المفرضو هنا بيكتب قرص تلات مرات او بعد الغداوالعشا كده
هو كتب حاجة عجيبة قلت له قصدك يعني تلات مرات في اليوم
ضحك وقالي اه اصلي اتعودت على النظام هنا وهم مبيفهموش غير زي ما كتبت كده
برده مش فاكر كان كاتب ايه

عشان كده بحاول اكتب الحلقات دي عشان تنفعني اسماء الشوارع والعناوين والطرق بعد كده ان شاء الله

اشتريت أدوية غالية جدا ماعدا دوا واحد للكحة الدكتورة قالت هكتبلك دوا مصري رخيص عشان الباقي دول غاليين أوي
وللأسف الدوا الوحيد اللي مجابش نتيجة هو لمصري ده
وفضلت اكح كتير جدا
اتحاملت على نفسي ورحت اشتريت كيلو عسل الغابة السوداء ولونه اسمر زي العسل السود بس بيقولوا ده عسل نحل بيعبش في حتة اسمها الغابة السوداء ؟؟
واشتريت تمر ومربى وقلت اسمع الكلام
واعمل تلج في الفيريز واحط عليه قماشة واحطها على راسي وانا نايم
لحد ما ايدي تتعبني والمياه تسخن
وفضلت تقريبا تلات أيام نايم كده مبتحركش غير عشان اغير المياه اللي سخنت باللي في التلاجة واحد دي في التلاجة لحد ما بقيتن اسيبها تلج وامشي الكمادات عليها عشان تطول شوية ومتسخنش بسرعه زي المياه
كنت بطلع كمية عرق رهيبة واشرب كمية مياه و عصاير رهيبة
ومكنتش بميز بقى ليل من نهار
لأني مبخرجش خالص من الشقة وأنام واصضحى طول النهار والليل على فترات متقطعة
واخيرا بعد تلات أيام بدأت أقدر أقف وامشي
ورحت يوم الأربع للدكتورة تاني عشان الاعادة
وقالت لا كده كويس الحرارة بقت 37 و كمل العلاج وقالتلي على مكان أخد منه التطعيمات
وقالتلي لازم تروح مطعم وتاكلك فرخة او اتنين عشان انت كده مفيش خالص