أحداث الحج 2

السلام عليكم ورحمة الله وبركاته
نكمل إن شاء الله مع رحلة الحج
وهبدأ معاكم إن شاء الله شرح مناسك الحج مع التعرض للي عايشته بنفسي اثناء أداء هذه المناسك
عشان ده يكون زي ملف ليا ولكم ينفعنا بعد كده لأني قربت أنسى كل حاجة حصلت هناك
أولا : أنواع الحج
1- المفرد : وهو نية الحج فقط بدون عمل عمرة
ويظل محرما من وقت دخوله الميقات وحتى انتهاء التحلل بعد نهاية أعمال الحج
ليس عليه هدي ( أضحية )
2- المقرن : أن يحرم الحاج بنية الحج والعمرة معا ولا يخلع الإحرام حتى نهاية المناسك
وعليه هدي
3- المتمتع : أن يحرم من الميقات بنية العمرة في اشهر الحج وبعد أداء العمرة يتحلل من اإحرام وجميع محظوراته
ثم يحرم بالحج قبل يوم التروية
وعليه هدي
وهو ده اللي أنا عملته لما وصلت المدينة
ورحت أبيار علي اللي هي ميقات أهل المدينة
معنى الميقات هي المكان الذي يحرم منه الحاج للحج ولكل أهل بلد ميقات محدد
مثلا المصريين مفروض يحرموا من رابغ وهي مكان بين جده ومكة
لكن انا متوجه من المدينة لمكة يبقى أحرم من ميقات أهل المدينة
ورحت مسجد أبيار علي وأغتسلت وقلت لبيك بعمرة ولبست ملابس الاحرام الرداء والإزار بدون مخيط وبعدين طلعت صليت ركعتين سنة الإحرام
ومن بعد الاحرام وحتى تصل البيت الحرام لا تتوقف عن التلبية
لبيك اللهم لبيك
لبيك لا شريك لك لبيك إن الحمد والنعمة لك والملك لا شريك لك
وطبعا الاحرام بيمنع حاجات كتيرة زي نزع الشعر او قص الأظافر ويجب ترك الجدال
والجدال مش معناها ان حد
يقولي حاجة غلط فأرد عليه واقوله الصح كذا
ده مش جدال
الجدال هو انك تكلم في حاجة مالهاش فايدة للجدال وبس
وبالمناسبة النبي صلى الله عليه وسلم حج مقرنا
لأنه عليه الصلاة والسلام كان واخد معاه الهدي اللي هيفدي بيه من المدينة لمكة
وقال صلى الله عليه وسلم لولا اني سقت الهدي لتمتعت
وأمر الصحابة بالتمتع
فمن اليسر لنا أننا نحج زي ما تمنى النبي عليه الصلاة والسلام انه يحج
ولذلك فهو النوع الأيسر والمفضل للكثير من العلماء
ولازم نعرف محظروات الإحرام اللي تفسد الإحرام:
الجماع ودواعيه
عمل المعاصيالمخاصمة مع الرفقاء وغيرهم
لبس المخيط من الثياب للرجال
عقد الزواج لنفسك او لغيرك
تقليم الأظافر وازالة الشعر
التطيب في الثوب أو البدن
الصيد أو الأكل من الصيد وانت محرم
بعد كده لما وصلت مكة نزلت على كوبري جبل الكعبة قصاد الحرم
ومعايا الشنط
ولازم أعمل العمرة أولا عشان أتحلل من الإحرام
وصلت مكة يوم 28/11/2008موافق 18 ذو القعدة
ودخلت سنترال جنب الحرم واتصلت بعمي قلت له انا وصلت مكة مش جده
وهعمل العمرة
وهدور على سكن لحد ما توصلوا
واتصلت بخال أشرف صاحبي عشان يشوف ليا سكن لقيته بيشتغل في المدينة مش في مكة
قلت اعمل العمرة وبعدين ربنا يحلها



ودخلت ساحة الحرم ودعيت بالدعاء الجميل :
اللهم زد هذا البيت تشريفا وتكريما وتعظيما ومهابة وزد من شرفه او كرمه ممن حجه او اعتمره تكريما وتعظيما وبرا
وده دعاء رؤية المسجد الحرام وكنت بقوله كل وقت اروح فيه الحرم
ودعاء اخر : اللهم انت السلام ومنك السلام فحينا ربنا بالسلام
ودعاء دخول المسجد بعدهم :
بسم الله والصلاة والسلام على رسول الله
اللهم اغفر لي ذنبي و افتح لي أبواب جنتك
ودخلت المسجد الحرام
مش هقدر اوصفلكم الشعور بالراحة والسكينة
مش هقدر اقولكم اصلا اول ما نزلت من العربية قصاد الحرم كان شعوري ايه
عارف لما تحب حد أوي ويسافر ويغيب كم سنة ويرجع
وتشوفه بعد غياب ومن فرحتك متصدقش انك شايفه
أيوه فعلا يستاهل المشقة دي
ده بيت ربنا الأول في الأرض
ده اللي صلى فيه سيدنا محمد عليه الصلاة والسلام وكل الأنبياء وكل الصحابة والشهداء
ده اللي كل الناس نفسها تيجي هنا
ده اللي ناس كتيرة دلوقتي سبتهم في مصر يتمنوا يقفوا مكاني هنا
انا هنا
انا في مكة
في الحرم
في بيت ربنا
في الجنة
لو مت دلوقتي أكيد ان شاء الله هدخل الجنة
يارب أموت هنا ومرجعش مصر
دي كانت امنيتي وقتها
دخلت المسجد وانا بقول لبيك اللهم لبيك لآخرها
ولما وصلت عند الكعبة
يا جماعة الموضوع مش سهل
في ناس بتنهار لما تشوف الكعبة
انا بتكلم دلوقتي وحاسس اني شايفها
وفاكر كويس لحظة دخولي المسجد من باب الملك فهد ووصولي لحد المسجد القديم وشايف الكعبة من بعيد
شقيت طريقي وسط المسجد والناس وكان لسه مفيش زحام كتير والمسجد ممتليء بتلت أو نصف سعته بس
وصلت الكعبة وانا بشكر ربنا وبقول لا اله الا الله وحده لا شريك له له الملك وله الحمد يحي ويميت وهو حي لا يموت بيده الخير كله وهو على كل شيء قدير
ومسبتش الدعاء ده طول ايام الحج لفضله العظيم
وصلت عند الكعبة
وبدأت من عند الحجر الأسود
ووقفت التلبية
وتدعي وتقول
وتقول اللهم ايمانا بك وتصديقا بكتابك ووفاء بعهدك واتباعا لسنة نبيك
وتثني على النبي صلى الله عليه وسلم وتستعيذ من شر نفسك ومن شر الناس
دلوقتي انا هعمل طوافين في طواف واحد
طواف العمرة
وطواف القدوم
يعني ايه؟
الحاج لما يدخل المسجد اول مرة يعمل طواف القدوم وده خاص بالحج
ده لو مقرن او مفرد
لكن متمتع يبقى طواف القدوم هو طواف العمرة في نفس الوقت
ورحت لمست الحجر الأسود بايدي ودعيت
وبدات الطواف
في الطواف تدعي بأي شيء يخطر على بالك
مفيش أدعية محددة
انا حبيت ادعي بـ
لا اله الا الله وحده لا شريك له له الملك وله الحمد بيده الخير كله وهوة على كل شيء قدير
لأن ربنا بيقول في الحديث القدسي :
إذا انشغل عبدي عن مسألتي بالثناء علي أعطيته افضل ما أعطي السائلين
وبعدين افتكرت الناس اللي أمنوني أدعي لهم
وقل أقسم الأشواط
جزء لذكر الله
وجزء للدعاء لوالدي ولأمواتنا
وجزء للدعاء للأحياء
وجزء للصلاة على النبي عليه الصلاة والسلام
وجز للدعاء لأهلي ونفسي وخطيبتي
وبين الركن اليماني والحجر الأسود تدعي كل شوط وتقول اللهم آتني في الدنيا حسنة وفي الآخرة حسنة وقني عذاب النار
الركن اليماني ناس كتيرة متعرفوش
الركن اليماني هو المجاور للحجر الأسود
كلنا عارفين حجر اسماعيل اللي جنب الكعبة وحواليه قوس أبيض
الركن اليماني بقى في الجهة المقابلة
وتدعي من بين الركن اليماني لحد ما توصل للحجر الأسود
وعند الحجر الأسود تكبر
ملحوظات مهمة
ناس كتيرة بتبوس في الركن اليماني وتتمسح فيه
وناس تتقاتل عشان تبوس لحجر
يا جماعة لمس الحجر مرة واحدة يكفي وعدم لمسه اطلاقا مفيش فيه اي شيء
الركن اليماني كذلك
عشان انا خفيف شوية كنت بدخل المسهم كل ما اقدر ولو زحام جامد ابعد واكمل طواف عادي
بس كنت بحرص اني أمسهم في أول شوط وآخر شوط
ومرة حاولت اقبل الحجر
ولما بقيت أدامه فعلا الناس انتزعوني وبقيت اخر واحد
وقلت مش مهم البوس
المهم شفته ولمسته ودعيت عنده
وهو لا يضر ولا ينفع
خلصت السبع اشواط و صليت في مقام ابراهيم
ومقام ابراهيم هو المنبر المغلق اللي بعد باب الكعبة بشوية
تصلي في اي مكان حواليه
والأفضل خلفه
وصليت الركعتين تقرأ في أول ركعة سورة الكافرون
وفي التانية الاخلاص
خلصت ورحت صليت في حجر اسماعيل كمان ركعتين
لأنه يعتبر من داخل الكعبة
وبعدين رحت شربت من مياه زمزم
وهم حاليا قفلوها خالص داخل الحرم وبقى في كولمانات كتير جدا في الحرم تشرب منها
زمان كان مفتوح له من داخل الحرم وتنزل تشوف البئر وانا كنت شفتها سنة 96
ماء زمزم لما تشرب منه
تدعي باللي نفسك فيه قبلها
ودعيت بدعاء أحد الصحابة لما قال
اللهم ان نبيك قال إن هذا الماء لما شرب له وإني أصدقه
اللهم إني أشرب هذا الماء لعطش يوم القيامة
ولازم تشرب لحد ما ترتوي
وتستقبل القبلة وانت بتشرب وتشرب على تلات مرات
ونذكر هنا ما قاله النبي عن ماء زمزم
عن ابن عباس رضي الله عنهما قال رسول الله صلى الله عليه وسلم ( ماء زمزم لما شرب له ، إن شربته تستشفي شفالك الله ، وإن شربته لشبعك أشبعك الله ، وإن شربته لقطع ظمأك قطعه الله، وهي هزمة جبريل وسقيا الله اسماعيل )
يعني حفرة سيدنا جبريل هو اللي حفره وليسقي الله منه سيدنا اسماعيل أول واحد في البشر
وعن ابن عباس ان رسول الله صلى الله عليه وسلم قال ( آية ما بيننا وبين المنافقين أنهم لا يتضلعون من زمزم)
أي لا ليشبعون حتى يملأ الماء اضلاعهم من زمزم
بعد الشرب من ماء زمزم يستحب الدعاء عند الملتزم
وهي الجزء ما بين الحجر الأسود وباب الكعبة
تبص تلاقي ناس بتشاكل عشان توصل للحجر
وناس عشان توصل للباب وتتعلق فيه
انا كنت أقف بمنتهى الهدوء بين المكانين ولزحمة فيه خفيفة جدا وأدعي براحتي جدا
ودي ميزة أنك تعرف الأماكن صح
عشان متضيعش وقتك
وتستفيد بكل دقيقة صح في المكان ده
بعد الطواف ما نتهى
رحت على الصفا والمروة وكان المغرب اذن وصليت المغرب
وبعدين طلعت على الصفا ودعيت بدعاء النبي صلى الله عليه وسلم
الله اكبر والحمد لله ولا اله الا الله
تلات مرات
لا اله الا الله وحده لا شريك له له الملك وله الحمد بيده الخير كله وهوة على كل شيء قدير

لا اله الا الله وحده صدق وعده ونصر عبده وهزم الاحزاب وحده
تلات مرات
وبعدين تدعي باللي نفسك فيه وانت متوجه للقبلة

ثم تبدأ السعي
مشي بسيط
وتجري بين الميلين ومعمول عليهم نور اخضر حاليا وتمشي لحد المروة وتقف وتدعي زي ما قلت على الصفا

وكده شوط

وترجع للصفا تاني يبقى كده شوطين

يعني رايح بشوط

وراجع بشوط

وتكمل السبعة
وصليت العشا
وخرجت حلقت
واخدت شنطي
اللي كنت سايبها أمانة مقابل فلوس عند حلاق خارج الحرم
وكده تحللت من الإحرام