فكره تطوير الزيارات عاوزين اراء اعضاء زيارة بلقاس كل واحد يكتب مقترحاته وورق المقترحات بنجمعه في الصيدليه في مقر الجمعية

زائر

خلاص ياجماعه
علشام مايبقاش كلام بس
انا هبقى ان شاء الله فاضيه يوم التلات والاربع الجايين
طبعا مش بكره وبعده
لا
الاسبوع الجاي ان شاء الله
ووقت الدوره مش هيتعدى الساعتين ان شاء الله
يعني ممكن ناخد ساعه وبعدين فاصل
وبعدين نكمل
الدوره هتبقى يوم واحد بس انا هعملها مرتين
علشان الي ملحقهاش في يوم يلحقها في التاني
انا طبعا مش عايزه تاخدوها في اكتر من يوم
لكن لو عايزينها على يومين انا تحت امركم
فكل واحد يختار الوقت المناسب ليه
وبعدها نشوف الوقت المتاح
وياريت تقترحو اسم للكورس
شوفتو انا مدلعاكم ازاي؟
اظن مفيش حد بيعمل كده

ملحوظه
ياريت كل واحد وهو جاي يجيب معاه اي حاجه حلوه
مش مدرسه بقى ولازم استغل الطلبه؟

زائر

خلاص يا ايمي
ان شاء الله الزياره اللي جايه يوم الجمعه
نقول للناس على الميعاد
بس عاوزينك تحددي ساعه
وانتي طبعا اللي هتسمي الكورس
بما انك التربويه الوحيده اللي فينا

مبسوطه منك قوووووووووووي يا ايمان
انا جالي احباط على فكره اخر يوم قابلتك فيه
وكنت مخنوقه جدااااااااا
اكيد انتي عارفه ليه

بس انتي طلعتي اجدع مني

ربنا يكرمك ويجازيكي كل خير
احبك في الله

زائر

ماعاش ولا كان الي يجيبلك احباط يارضوى
معقوله يجيلك احباط وانا موجوده
بس لما اشوفه الاحباط ده
وعلى فكره
انتو والله اجدع شباب بكل النوايا الجميله الي فيكم
لان الواحد لما يشوف الي حواليه متحمسين
حب الخير بيصحى تاني جواه
ربنا يكرمك يارضوى
وينور قلبك
وبقولك احبك الله الذي احببتني فيه
وخلاص ياستي
بلاش انتي تجيبي حاجه حلوه معاكي :D :D :D

زائر

انا ممكن اعمل كورس عن الاسعافات الاوليه

ومش عايز حاجه حلوه

عايز سرنجات 50 وقساطر 22

زائر

خلاص يا جماعه الورق اتطبع الحمد لله وموجود فى الصيدليه فى رساله
اللى عايزه يروح ياخده ويصوره
وان شاء الله كل فتره نجمع مواضيع تانى ونكتب كمان اللى هانقوله فى الاجتماع ان شاء الله ونبقى ننزله هنا او نطبعه بنفس الطريقه

زائر

الف شكر

انا بجد كنت ناوى اساهم

بس يللا انتو قمتو بالواجب

طلب صغير بس ممكن حد يحط اسمى فى حجز رحلة بلقاس وانا هبقى اجى ادفع الخميس لانى مش فاضى الاربع

معلش بتقل عليكو

زائر

السلام عليكم
يا جماعه لظروف خارجه عن ارادة ايمان سمير لان الكمبيوتر بتاعها اصاب بفيروس حاد ومزمن فى نسخة الويندوز بس هى كانت عايزه تبلغكم بمعاد الاجتماع او الدوره اللى تطوعت لكل اعضاء الزياره بيها
والمعاد ان شاء الله هايكون يوم الثلاثاء القادم فى الجمعيه
هانتجمع كلنا الساعه 2 الظهر ونبدأ ونستمر لحد الساعه 3 ونص بعدين ناخد بريك ونصلى العصر ونكمل من 4 لحد 5 بإذن الله
عنوان الدوره :دوره فى فنون التربيه وأساسيات التعامل مع الأطفال
يا ريت لو تقدروا تعرفوا الناس كلها على قد ما ربنا يقدركم
وجزاكى الله كل خير يا ايمان ويا رب الجهاز بتاعك يقوم بالسلامه قريب :)

زائر

دموع الايتام ... تهز عرش الرحمن

عن ابن عمر أن رسول الله صلى الله عليه وسلم قال:

(إن اليتيم إذا بكى اهتز لبكائه عرش الرحمن، فيقول الله تعالى لملائكته:

يا ملائكتي، من ذا الذي أبكى هذا اليتيم الذي غيبت أباه في التراب،

فتقول الملائكة ربنا أنت أعلم، فيقول الله تعالى لملائكته: يا ملائكتي،

اشهدوا أن من أسكته وأرضاه؟ أنا أرضيه يوم القيامة)

اليتيم هو من فقد أحد والديه فلم يجد أباً يحنو عليه لم

يجد أبا يلاعبه ويحمله على كتفه ويأخذ بيده .. يشجعه ..

يعلمه الوقوف والمشي.أو أماً تعطف عليه، وتسقيه مع لبنها الحنان

والأمان وافتقد دفئ حضنها وبرد قبلاتها ولذة تدليلها لهو غاية الحرمان..

يتغافل كثير من الناس عنهم، شغلتهم أموالهم وبنوهم ، في الوقت الذي أمر به

القرآن الكريم بإكرامهم وتخفيف معاناتهم وتعريف الناس بمصيبتهم ، وبالظروف

العابسة التي أحاطت بهم وأطفأت الابتسامة من على هذه الوجوه الصغيرة

قال رسول الله صلى الله عليه وسلم:

[من ضم يتيما فكان في نفقته، وكفاه مؤونته،كان له حجابا من النار يوم القيامة،

ومن مسح برأس يتيم كان له بكل شعرة حسنة

شفتوا بناخد ثواب قد ايه لما بنروح الزياره افرحوا بقى وادعوا ربنا يقدرنا نسعدهم و مايحرمناش من الثواب ده
ويجعله فى ميزان حسناتنا

زائر

السلام عليكم
يوم الجمعه بعد الزياره كان د/ طارق قال ان فى اجتماع لكل اعضاء الزياره ان شاء الله فى الجمعيه يوم الثلاثاء الساعه 4 بعد العصر
يا ريت لو فى جديد بخصوص الموضوع ده يتم الاعلان عنه
شكرا

زائر

طارق هيسيب الزياره لانه مسافر السعوديه الاربعاء ان شاء الله

ومفيش زياره الجمعه لان العيال فى حفله للمره ال500 على التوالى

حضانه بس

زائر

احنا سألنا وقالوا ممكن نروح مع الاولاد فى التجمح فى ساحة بلقاس ونقضى اليوم معاهم اكننا فى الزياره
برده بخصوص الاجتماع ماعرفش الكلام ده صحيح ولا الاجتماع اتلغى ؟

زائر

فى اجتماع عادى جدا

الاجتماع اصلا علشان طارق يقول فيه انه هيسيب الزياره ويتم اختيار مسئول جديد

بالنسبه للساحه معتقدش انها مكان كويس للزياره+الاولاد مش هيكونو فايقين للمتطوعين

فى الجمعه بعد الصلاه ان شاء الله يوم جميل فى الاورام

يمكن يكون بديل مناسب

زائر

السلام عليكم ورحمة الله وبركاته

تم اختيار المتطوع النشيط ياسر البغدادى كمسئول لزيارة بلقاس خلفا لد/طارق رمزى بعد سفره للسعوديه سالما باذن الله تعالى

ننتظر الكثير من ياسر

زائر

السلام عليكم ورحمة الله وبركاته

الحمد لله النهارده الزياره كانت حلوة قوي

بس لسه طموحنا مالش اخر عاوينها تبقى أحلى و أفيد

ا/ياسر البغدادي عاوز يعمل نظام ثابت لزياره حاجه كده تفضل ثابته مهما اتغيروا المتطوعين او المسئولين

وعاويزنا نساعده هوه متحمش جدا ياريت ما نحبطوش

كل واحد يكتب مقترحاته لتطوير الزياره واي سلبيات او ايجابيات شايفها

والورق ده ان شاء الله هنجمعه في الصيدلية

ياريت كل اللي بييجي الزياره يهتم ويكتب الورقه ديه واللي مش بييجي وعنده اي افكار ياريت برده يساعدنا

بعد ما نجمع الورق ده هنعمل اجتماع ونتناقش في كل الافكار ديه

المهم عاوزين ايجابيه ومتنسوش ديه صدقه جاريه لينا لو ثبتنا نظام وفضل ماشي حتى لو احنا مش موجودين

وجزاكم الله كل خير

زائر

بصي يا دكتورة رضوى أنا عندي رأي في الموضوع دة..... اولا الفترة التي نقضيها اسبوعيا قصيرة و على مدى قصرها فتأثيرنا على الأطفال ممطوط زمنيا و نسبية التأثير فيه غير مؤثرة ...
الأمر الآخر هو حول معدل استجابة الأطفال لنصائحنا و محاولاتنا لتعديل سلوكهم ... أعتقد أن استجابتهم لنا شبه معدومة ....

زائر

اولا جزاك الله كل خير على المشاركه

بس انا مش موافقه على كلام حضرتك

انا بدأت أروح الزياره ديه من تلات شهور ونص تقريبا

صح الوقت قليل اه ممكن نلعب شويه ويضيع شوية وقت كمان بس بنبقى حريصين انهم كل مره يتعلموا

حاجه جديده خلق جديد

النهارده اتكلمنا مثلا عن الطموح والايثار

وقبلها اتكلمنا عن ملك النفس عند الغضب وقبلها عن التمسك بالتعليم مهما واجهتنا صعوبات وحاجات تانيه كتير

وبيفضلوا فاكرين الحكايات والقيم ديه على فكره

ولما بيعملوا قدامنا حاجه غلط عكس اللي كنا قايلنلهم عليه بنفكرهم بالحكايات ديه

تغيير سلوكهم عمره ما هيبقى بين يوم وليله وده اللي نقدر عليه في الوقت القليل ده

المهم انا شايفه اننا بنعمل حاجه ولو فعلا مش بنعمل انا مكنتش روحت الزياره ديه

وياريت حضرتك تكتب ملاحظاتك ايا كانت عن الزياره

كلنا هدفنا واحد ان الولاد دول بيقوا حاجه كويسه وياريت نساعد مسئولي الزياره انهم يعملوا حاجه كويسه

زائر

يا جماعة انا مع استاذ نبيل فى رأية .......

فترة الزيارة قلية أوى و تاثيرها قليل

و كمان فى نقطة تانية عايز اتكلم فيها

أنا حاسس ان علاقة بينا و بين الأطفال بقت علاقة بين أستاذ و تلميذ أكتر منها علاقة بين أخ و أخ أكبر و هو دة الى الأطفال محتاجينة

كمان أنا ضد فكرة اننا نقسم نفسنا على الفصول و كل واحد يلتزم بالفصل بتاعة بس
........

و للأسف الدورة الى بتتكلموا عليها دى مش حقدر أحضرها عشان الأمتحانات ولا حقدر أروح الزيارة الفترة الجاية دى لنفس السبب

زائر

ربنا يجازيكى خير يا رضوى
ويجازى كل انسان بيتعب على قد تعبه
بجد الموضوع ده صدقه جاريه ان شاء الله تاخدى ثوابها طول ما الزياره مستمره وان شاء الله هاتفضل مستمره طول ما اللى فيها حريصين عليها وعلى تطويرها
ان شاء الله موضوع الورقه والاقتراحات ده هايكون خطوه كويسه قوى
استاذ نبيل انا كمان مش موافقه على كلامك نهائى
الاولاد اتطوروا جدا ومش هايحس بالموضوع ده الا احنا لاننا مش مجرد بنقضى وقت معاهم لا احنا تقريبا بندرس شخصية كل واحد منهم كل مره وممكن نقوللك كل واحد اتطور ازاى وكان ايه قبل ما نيجى
مش غرور ولا حاجه لا سمح الله لكن احنا بنشتغل معاهم على اساس وبنتفق على اللى هانعمله قبلها يعنى مش بنشتغل عشوائى
هما بس لما حد غيرنا بيدخللهم بيهيصزا ويهيجوا وبيبقى صعب السيطره عليهم وهو ده السبب فى اللى شفته النهارده بالاخص
لانه زى ما منى المرسى ربنا يكرمها ويجازيها خير قالت ان كل واحد مع فصله بيبقى عايش جو معين وبيعمل حاجه معينه مركز فيها مع الاولاد ولما حد بيجى يقطع الاندماج ده بيخرج الطفل من حالة التركيز اللى كان فيها وبينشغل باللى جاى عننا وده طبيعى لانه طفل

زائر

هو انتوا معاكم فصل ايه بالضبط اللى مغلبكم قوى كده؟
ومخلى نظرتكم متشائمه قوى كده
بالعكس بقى مع احترامى لكل الاراء
انا شايفه ان
وقت الزياره كافى لتنفيذ اى برنامج تعليمى هادف والمفروض اننا نحدد نقط معينه نشتغل عليها عشان الوقت مش يضيع
هى دى الفكره كلها
لكن لما كل مره حد اللى يدخل هاتبقى المساله ملخبطه جدا
هو اللى ممكن ان لو حد عنده فكره معينه عايز يوصلها للأولاد مش فى فصله يتكلم مع اللى ماسكين الفصل ويفهمهم وجهة نظره وهما يقدموه للأولاد ويتكلم معاهم ببساطه
لان هما اكتر حد هيساعده ويقدروا يسهلوا عليه مهمته فى توصيل المعلومه

زائر

اهلا بحضرتك ا/محمد

مش عارفه انتو ليه بتقولوا كده

الولاد اتغيروا فعلا من ساعة ما روحنالهم وعمر ما كان علاقتنا بيهم استاذ بتلميذ

فيه وقت بنلعب معاهم ووقت تاني بنخليهم يقعدوا يسمعونا فيه مش بالعافيه برده بالحب المتبادل

احنا بنجبهم جدا ومتهيألي هما كمان

وفيه منهم اللي اتغير فعلا من ساعة ما روحنا والتغيير فعلا ظاهر

واحنا ملاحظينه زي ما رضوى قالت وبرده محدش هيلاحظ التغيير ده غيرنا

لاننا من اول ما روحنا واحنا بنحاول نعرف مشاكل كل واحد فيهم

وده اللي بيخلي موضوع ان كل فصل يبقى ليه حد ثابت حاجه اساسيه

علشان يبقى متابع الولاد وتغيراتهم

وبرده اساسي علشان الزياره تبقى منظمه

وربنا يوفقك ان شاء الله في امتحاناتك

وبرده رأيك يهمنا حتى لو هتكتبه هنا على المنتدى واحنا ننقله

بس عاوزين آراء كل الناس اللي بتيجي الزياره

زائر

بصراحة الزيارة دى من الزيارات الى بحبها جدا يمكن جه فترة عليا مكنتش بروح لظروف بس ان شاء الله احاول انتظم تانى بس بعد الامتحانات بقى.. و يمكن لما قعدت فترة الشهرين مرحتش و رحت المرة الى قبل دى كنت فاكرة ان الاطفال هتنسانى بس بجد كنت فرحانة جدا لما لقتهم فاكرين يمكن بس الى لحظتوا انهم كانوا اشقية شوية بس قلت يمكن بس علشان كانوا جيين من مكان برة كانوا بيلعبوا فية فا لسة متاثرين بجو اللعب ... و يمكن الواحد بيحس ان الوقت مش كافى علشان من كتر ما الواحد بيحب يقعد معاهم الوقت بيسرقوا و بيحس انوا معملش حاجة و ملحقش يقعد معاهم و يلعب و يعلمهم حاجة .. لكن اعتقد ان الوقت كويس

بصراحة أنا أؤيد كلام د/ رضوى عادل ود/ رضوى قطب
واختلف مع نبيل ومع محمد محمود
عارفين ليه ؟؟
لأننا فعلاً قمنا بتجربة متواضعة لمسنا بفضل الله بعض التغيير من هؤلاء الأطفال
لكن يبدو أن نبيل ومحمد لم يقما بنفس التجربة
وطبيعي جداً إن الأطفال مش تحس بيكم وانتم كمان مش تحسوا بالتغيير
لأن الوقت التي تخصصوه للأطفال صغير جداً
وكمان انتم مش مركزين مع مجموعة محددة
أما إذا خصصت لك فصل معين وبدأت تجتهد معاهم وترعاهم ستحس بإذن الله بالتغيير
وإسأل د/ طارق رمزي كمان لأنه خاض هذه التجربة واعتقد انه لاقى تجاوب من الأطفال
أنا معاكم إن الوقت صغير ومش بيكفي بس برضه مؤثر

زائر

السلام عليكم ورحمة الله وبركاته

اسمحولى بس اقرب وجهات النظر ما بينكم

1-البنات واخدين فصول صغيره فى السن فصل ابتدائى

اما الولاد واخدين فصول كبيره فى السن

اقصد ان رضوى ورضوى بيكتبو على صفحه بيضا انما العيال الكبيره صفحه مكتوب عليها بقلم كوبيا

2-الصغيرين سهل السيطره عليهم داخل الفصل اما الكبار فابسط شئ انا خارج مع اصحابى فى بلقاس انا عايز اصطاد سمك انا رايح العب

3-الصغيرين محتاجين حد كبير يحن عليهم ويتعلقو بيه

اما المراهق فمحتاج يحسس نفسه انه راجل مستقل مش مستنى يسمع كلمه من حد

اعتقد ده سبب اختلاف نظرتكو عن الدار

اكبر مشكله فى المرحله الجايه هى كيفية التعامل مع الكبار+محاولة تفعيل مشروع ياسر البغدادى فى ادخال برامج تنميه بشريه للاطفال

زائر

جزاك الله خيرا يا د/محمود

الاختلاف في وجهات النظر ده حاجه كويسه بتجيب افكار اكتر

وكل اللي حضرتك عاوزه يا د/محمود زي ما قولنا اكتبه كله في ورقه وهاتها الصيدليه وانت جاي الشيفت بتاعك : )

وتاني يا جماعه ياريت كل الاراء والمفترحات تبقى موجوده قبل الزياره اللي جايه

ان شاء الله حتى الاراء اللي بتقول مافيش فايده تكتب رأيها وتقول ليه المهم نكون ايجابيين

وربنا يجازيكوا كل خير ويجعله في ميزان حسناتكوا

زائر

24]الولاد مش عارفين يتعلموا حاجة خالص و انا جربت كتير انا باجي الزيارة دي من سنتين تقريبا ...
اولا:- الفاتحة اتعلموها في اسبوعين كاملين بعد ما شيبوا شعري
ثانيا:- حاولت اديهم درس تجويد ممكن اكتر من عشر مرات مفيش فايدة و كل دماغهم في اللعب
ثالثا:- الولاد مقتنعين بالامهات و المدرسين و كلامنا ليهم تحصيل حاصل لأن المرس عنده و امه هما الأساس ... يعني ايه واحد بييجي كل اسبوع مرة يعد تلات ساعات
رابعا:- من أول خامسة ابتدائي زي ما قال دكتور محمود الاولاد عذاب ما بعده عذاب
خامسا:- جوة الجامع قلنالهم ميت مرة يسكتوا و يهدوا مفيش فايدة بمعنى آخر عدم تقبل النصيحة
سادسا:- الاولاد لما بيتشاكلوا مع بعض الغل بياكلهم و يبقى ناقص يقطعوا بعض بالسكاكين و ياما كلمتهم عن ضبط النفس و الحلم لكن لا حياة لمن تنادي لأن و الله اعلم الفرصة عندهم مرة واحدة لما حد يباخد أي حاجة اخواته بيتجننوا و يبقوا عايزين يحرموه منها
سابعا :- بيئة الأرياف المحيطة بيهم سواء الاولاد اكبر منهم أو زمايلهم في المدرسة هي بيئة فاسدة مفسدة
ثامنا:- لا أدعو لليأس فالنتائج موكولة للخالق و أتمنى أن يوفقنا الله جميعا[/size]

» عاوزين نحدد معاد زيارة دار العز
» زيارة جامده( زيارة دار المسنين 15-3-2010)
» زياره مهجوره اخرى من الزيارات----------------------------------------
» عاوزين من ابو بلاش
» عاوزين مين ادمن للمنتدى؟؟؟؟؟؟؟؟؟؟