عاوزين مين ادمن للمنتدى؟؟؟؟؟؟؟؟؟؟

زائر

السلام
عليكم ورحمة الله وبركاته

طبعا
وحشتكوا موضوعاتي المميزه دايما :)

المهم
دلوقتي ادمن منتدانا ورئيس لجنتنا الطبيه في رسالتنا الغاليه قرر يعتزل

بس
ده طبعا مش قراره لوحده

يلا
عاوزين آراءكوا

عاوزين
مين ادمن للمنتدى؟؟؟؟؟؟؟؟؟

انا
هقول اول واحده

طبعا
طبعا د/ مصطفى

احنا
اساسا شعب مش بيحب التغيير بيخاف تقريبا

بس
في ديه بقه لأ مقتنعين بعدم التغيير ربنا يكرمك يا دكتور مصطفى

بس
مش عاوزينك تنسى ردك ده

وانت سبب لتجمعنا ده

بجد أنا مش هنكر إني مبسوط جداً إني كنت مجرد سبب لتجمع هذا الجمع الجميل من الأعضاء
وبرضه مبسوط جداً من الخير الجميل اللي بيطلع من المنتدى
والأفكار والتبادل الثقافي اللي بيننا
وكمان مبسوط جداً إن فيه ناس كتير اتعرفت على بعض من خلال المنتدى
والناس دي أصحاب جداً دلوقتي
بجد مبسوط جداً جداً جداً
بس عاوز أقول حاجة مهمة
لو افترضنا إن أنا اشتريت نبتة أو وردة على سبيل المثال وزرعتها في الأرض
ومفيش اهتمام من أي حد لهذه الوردة
ومفيش حد بيرويها وياخد باله منها
إيه الي هيحصل ؟؟؟
أكيد هتموت
أكيد الفضل يرجع بعد الله للناس الحلوة اللي على المنتدى
الناس المهتمة ببقاء المنتدى
الناس اللي بترويه وبتاخد بالها منه
علشان كده المنتدى بيكمل مشواره وكل يوم بيبقى أحلى وأحسن وأكبر من الأول
وعلى رأي مش فاكر مين بالضبط حسام ولا بوسي
إن الواحد حاسس إن المنتدى ده عامل زي ابنه اللي بيكبر قدام عينيه يوم بعد يوم
بجد بجد أشكر كل عضو أثرى بفكره أو اهتمامه المنتدى
وأشكر بوسي على كلامها الرقيق والجميل
وكل سنة وانتي طيبة

طب يعني ينفع حد يمشي ويسيب ابنه كده ده كلام يعني

ويلا
فيه استفتاء فوق بنعم او لا

بس
هنا مافيش تزوير النعم نعم واللا لا

علشان تعرفوا بس ان احنا ناس ديمقراطيين

وشعارنا هوه الشفافيه

:D :D :D :D :D

زائر

يا مصطفى يا اما بلاش واحد غيره ماينفعناش
مصطفى
مصطفى
اوه
اوه
متنساش بقى يا مصطفى لما تنجح فى الانتخابات تجبلى غساله بالكهربا وتلاجة بالكهربا ومكنسه بالكهربا
وممكن تجبلى كهربا بالكهربا
عشان اذا حولت تانى تقول الكلام ده نكهربك بالكهربا

زائر

مصطفى
انا يمكن دخل خمس دقايق ولاسف وقتى ضيق جدا وكمان مسافر القاهره الفجر وهرجع اخر الاسبوع

يمكن لاسباب كتيره مش عارف اتواصل معاك وانا مقصر فى حقك كتير اعذرنى طبعا وكتير منا مقصر فى حق مصفطى ويمكن الى رضوى قطب بتعمله حاليا اسمه رد جزء صغير من حق مصطفى علينا ...

ويمكن لاسف مصطفى مش عارف قيمة نفسه .... عايز اقولك انته عملت وزرعت خير كتيره وهوه الوقتى بيكبر وموجود زى ابنك بالظبط الى بيكبر حاليا

مش هتكلم كتير عنك وعن مجهودك وعن شخصيتك وعن عقلك وزوقك
لكن هقولك يا مصطفى الواحد مش بيتعلم ببلاش والدنيا ملعب كبير المهم الروح الحلوه

مصطفى اعتقد انك اعلى من كل المزيدات دى واعتقد انك هتتراجع عن كل ده باذن الله فى اقرب وقت

ومش هقولك بقه انته الادمن والكلام ده لانه مش الطبيعى سيتك صاحب المكان

يله يا درش نشتغل ورانا حاجات كتيره هنعملها بص قدام يا ريس

بجد شىء جميل لما نلاقى الناس دى كلها همها على مصطفى وعلى كل اخواتنا دى صحبه الخير ودى الناس الى بجد بنتعز بيها

ربنا يكفينا قلوب الناس الشر ويكفينا حقد الحاقدين ويتقبل منا ويكرمنا ويعافينا شر انفسنا يارب

زائر

السلام وعليكم ورحمة الله وبركاته

اولا

انا معارض جدا لفكرة ترك د/مصطفى للاشراف واعترض على كلمته بانه غير مؤهل لانه يبقى ادمن

بالعكس مصطفى ومن زمان شخصيته وتعامله فى الجروب او المنتدى تثبت انه ادمن ممتاز

لا بيمسح من غير سبب عمال على بطال ولا بيجامل حد من غير حق

ثانيا

بصراحه كلنا قلقانين بقالنا مده على د/مصطفى لان كلامه فى المنتدى وشكله فى الصيدليه يوحى بانه بيمر بمشكله كبيره

وانا كنت افقت مع حسام نعمل موضوع عن كده فى المنتدى لكن رضوى قطب جزاها الله كل خير سبقتنا

فيا ريت د/مصطفى بنفسه يدخل ويطمنا عليه

ويفضفض لان لما الواحد بيحكى بيستريح جدا

وبصراحه بقى لو د/مصطفى ساب الاشراف انا هسيب المنتدى لاننا ايد واحده مهما اختلفنا او زعلنا مع بعض لكن ساعة الجد انا واثق ان اول حد هيقف جنبى هو مصطفى

زائر

بص يا مصطفى انا وحسام اتفقنا اذا انت مش عايز تبقى ادمن احنا كمان مش عايزين نبقى مشرفين
واذا كنت شايف انك غير مؤهل تبقى ادمن
انا اول واحده مش مؤهله ابقى مشرفه على المنتدى وحاليا ظروفى مش مؤهلانى كمان انى اتابع كل حاجة
فإذا عايز تغير حد من المشرفين غيرنى وجيب مكانى اى حد يعجبك بس انت مش تسيب لان ببساطة انت الاساس يا فندم
اما بالنسبة لى انا همشي هتلاقى مليون زيي واحسن منى كمان احنا معانا ناس كتير كويسة تنفع لاشراف
فإذا عايز تسيب انت كده بتفركش المنتدى و وبتفركش حالة الاستقرار اللى موجوده على المنتدى واللى حاسس بيها كل عضو على المنتدى
ايه رأيك غيرنى وانا بجد معنديش اى مانع خالص مالص
ولك حق الاختيار

زائر

السلام عليكم ورحمة الله وبركاته

انا لا وأوافق البتة البتة التة على ترك دكتور مصطفى لإدارة المنتدى

اى نعم انا مش دايما متواجده بس برضه دكتور مصطفى من الشخصيات اللى بتعمل فى صمت وانا احترم الشخصيات دى جدا جدا

ولو صحيح زى ما دكتور فريد بيتوقع ان فى مشكلة ما عند دكتور مصطفى فا احنا هنا كلنا اخوة واخوات فى الله

شاركنا فى همك لعل الله يجعلنا سبب فى فى كرب اذا كان هناك كرب

والا فما هو الدافع لمثل هذا القرار

زائر

أولا
انا بحييكي يارضوى على الشفافيه والديمقراطيه
هي دي الانتخابات وغيرها لعب عيال
ثانيا
بوجه كلمه لمصطفى
انت بجد لينا كلنا على المنتدى اخ كبير
ووقت الشده بنلاقيك جنبنا على طول
ولو قلت كلام كتير لحد الصبح مش هيوفي حقك
لان العشره الطيبه
اكبر دليل على كلامي
ومش سهله فعلا انك تسيب المنتدى الي جمعنا كلنا على الخير
بس انت اعترف
مين الي عرض عليك مبلغ اكبر ؟؟؟
احنا مستعدين ندفع
ولو زي ماانت شايف انك مش مؤهل
مكانتش كل الاصوات دي تيجي لصالحك
وكل الناس دي تتكلم في حقك كلام زي القل
صعب ترد كل المحبه دي
خليك معانا ياادمنا العزيز

زائر

ماشاء الله ماشاء الله
والله يا جماعه مافيش كلام يتقال بعد كلامكم
وعندكم حق فى كل اللى قلتوه
وانا بضم صوتى لصوتكم

السلام عليكم ورحمة الله وبركاته

والله العظيم يا جماعة أنا شفت الموضوع من أول ما اتكتب من 24 ساعة تقريبا
ومن وقتها وأنا بفكر مش عارف اكتب ايه ؟
أرد عليكم بإيه ؟
بجد مش عارف ومش لاقي كلام يساوي قيمتكم عندي
كل اللي هقوله هو احساسي وقت ما شفت الموضوع
وهو إحساس مش حسيت بيه من زمان
إحساس الصداقة والإخوة والترابط
بجد يا جماعة والله أنا فعلاً ظروفي مش مستقرة إلى حد ما
مما جعلني وبكامل إرادتي أن أعلن عن احتياجنا لأدمن لإدارة المنتدى
هذا كل ما حدث فقط لا غير

د/ رضوى قطب
بجد مش عارف أقولك إيه بس مقدرش أشوف موضوعك كده من غير ما أدخل وأرد عليه
برغم عدم مشاركتي بأي مساهمة على الإطلاق لمدة 9 أيام
والله يا دكتورة رضوى .. قلما نجد إنسانة مثلك في هذا الزمان
وبجد بجد يعجز اللسان عن الشكر والتحية لكي
ويمكن علشان حلفانك بعدم مشاركتك بالمنتدى إذا أصريت على موقفي ده السبب أني اتراجع عنه لفترة مؤقتة
وده علشان طبعاً كلنا عارفين قيمتك الكبيرة في المنتدى واعتزازنا بيكي جداً
وبالنسبة لموضوع ابني وازاي أسيبه كده .. معنى كده إنه لو بقى يتيم محدش هياخد باله منه ؟؟؟

بوسي
هتكهربيني يا بوسي ؟؟ طيب يا ريت بس تعلى الفولت عالآخر علشان ميبقاش فيه أي أمل .. أجيلك فين وإمتى ؟؟؟
وعلى فكرة يا بوسي أنا مش بفركش المنتدى ؟؟؟ بالعكس أنا عاوزه يكمل مشواره وعلشان يكمل مشواره لازم حد يكون متابعه أول عن آخر وده لا ينطبق عليا لاعتبارات عديدة

حسام
العبرة يا حسام مش بكثرة الأعمال الخيرية .. ولكن بالقبووووووووول من الله
وكمان أشكرك على زوقك جداً

د/ محمود فريد
أشكرك جداً يا دكتور محمود على سؤالك
وبالنسبة ليا أنا الحمد لله كويس
ويا سيدي المنتدى محتاجك جداً في المشاريع الخيرية ومعلوماتك القيمة
بغض النظر عن أي حاجة تانية

هاجر
أشكرك بشدة ومفيش مشاكل ولا حاجة إن شاء الله
وعلى فكرة أنا بعت ليكي السلام كذا مرة مع أخوكي مصطفى
مش عارف إذا كان بيوصل ولا لأ ؟؟؟

إيمان سمير
إنتي بجد من الشخصيات اللي بنعجز عن رد الجميل لكي
ربنا يوفقك ويكرمك يا إيمان

د/ رضوى عادل
أشكرك جداً على روحك الحلوة وعلى زوقك

أشكركم جميعاً ولو إني لا أستاهل كل هذا الكلام الجميل

زائر

السلام عليكم ورحمة الله وبركاته

عودا حميدا يا دكتور مصطفى الادمن المكتسح في انتخاباتنا النزيهه

ربنا يعزك يا دكتور كتير فعلا عليه الكلام ده

وفيه زيي واحسن مني مليون مره

احنا كلنا هنا اسره واحده واتجمعنا على حاجه جميله قوي

عمل الخير

اكيد اكيد لو حد فينا تعب ده مش فضل من حد انه يهتم او يسأل

ده واجب علينا

وانا متأكده اني لو في نفس الموقف كلكوا كنتوا هتهتموا
لأنكوا انتو الاحسن
بوسي ورضوى وايمان وآيه وهاجر ود/محمود وحسام ود/مصطفى

مجموعه جميله الواحد بيعتز بيها

ده غير طبعا دورك المهم هنا او في الجمعيه
والكلام ده مافيهوش اي مجامله ربنا يجازيك كل خير ويصلحلك احوالك ويرضى عنك

انا مفرحني من الموضوع ده

ان كان فيه مشاكل كتير في المنتدى بس الموضوع ده كلنا اتجمعنا عليه

ربنا يكرمنا ويهدينا ويصلح احوالنا ويجمعنا دايما على الطاعه والخير

زائر

انتظروووووووووووووووا مفاااااااااجاااااة المنتدى

قريبا فى الاسوااااااااااااااااق

خبر الموسم ومش اى موسم

زائر

بجد انا فرحانه جدا انك دخلت ورديت يامصطفى
وبصراحه مكنتش متوقعه منك غير كده
ويارب يفتحلك الابواب ويرزقك بالخير دايما
وربنا يهون عليك الصعب
واما لحسام
فانت على طول ياحسام اخبارك حلوه
ياترى ايه الخبر الي عندك
قول شوقتني

زائر

معلش انا اتاخرت فى الرد بس لسة شايفة الموضوع دلوقتى والله ...
طبعا طبعا دكتور مصطفى مش هيمشى هوا بس علشان كان عايز يعرف الناس بتعزوا قد اية صح يا دكتور مصطفى .. صح يا أية ... طيب المهم بقى :D :D
بجد انا اول ما دخلت المنتدى حسيت فعلا اننا اسره واحدة و بتجمعنا حاجة واحدة و كل واحد بيتعلم و يستفاد من التانى و بجد هنا ناس كتير ماشاء الله عليهم بعتز فعلا انى عرفتهم بجد.. و بجد يا دكتور مصطفى انت مش الشخصيات المميزة جدا بتفكيرها و عقلها ربنا يبارك فيك و فعلا الكلام دة مش مجاملة والله .. وغير كدة انا من اول ما دخلت المنتدى عرفت ان اسم الادمن بتعانا كدة كلنا اتعودنا علية احنا مش بنحب التجديد الحاجة الى بنتعود عليها بنفضل معتزيين بيها ..و كمان انا هختار فى التصويت مرة رقم 1 و 2 و 3 يعنى لا مفر :D

زائر

شفت يا مصطفى الناس كلها بتقولك ايه
وبتقول عليك ايه
وبرغم كده مش عطيناك حقك
مش معقول كل الناس دى حوليك وبردوا لسه زعلان ومضايق
عايزينك ترجع يا مصطفى واحسن من الاول كمان
وبجد اللى مصطفى عزيز عليه يدعيله ربنا يفك كربه
وانا اول واحده هدعيلك لانك اخ لينا كلنا يا مصطفى
كلنا مستنينك ترجع واحسن من الاول
بس الاهم مش تتأخر علينا

سلام الله عليكم ورحمة الله وبركاته

د/ رضوى قطب
تاني هقولك أنتي إنسانة بكل ما تحمله هذه الكلمة الصغيرة من معاني كثيرة وعظيمة
كثيرُ منا يحمل هذا اللقب دون أن يستحقه
بجد فخر ليا إني عرفت مجموعة رائعة وأنتي منهم

إيمان سمير
برضه هقولك جمايلك مغرقانا يا إيمان .. مش هنعرف نسدد اللي علينا

آية
صح يا دكتور مصطفى .. صح يا أية
إيه الثقة دي ؟
طبعاً منقدرش نكسر كلامك يا آية .. حتى لو كان غلط
وبجد أنا اللي بعتز بيكم كلكم والله
بجد يا دكتور مصطفى انت مش الشخصيات المميزة جدا بتفكيرها و عقلها
هرد عليكي وأقولك : خدعوك فقالوا

بوسي
ربنا يعزك يا بوسي وأشكرك بشدة

» عاوزين من ابو بلاش
» عاوزين نحدد معاد زيارة دار العز
» عاوزين تختموا القرءان كل 3 ايام فأكثر ادخلوا وشوفوا الجدول
» فكره تطوير الزيارات عاوزين اراء اعضاء زيارة بلقاس كل واحد يكتب مقترحاته وورق المقترحات بنجمعه في الصيدليه في مقر الجمعية