خرجنا من مسجد نمرة ومشينا عشان ندخل عرفات
هي منطقة اد مثلا الجامعة خمس مرات
او اكتر يمكن
بس مدخلها طريق واحد
وفي طرق من بعيد
بس من ناحية المسجد هو طريق واحد
زحام ما شفتش زي لحد وقتها قبل كده
وتدافع رهيب
والسبب ان في ناس بتروح عرفات من الصبح وميصلوش في السمجد ويفرشوا في الطريق ده ويوقفوا عربيا وتريلات
ومتعرفش تمشي
دسنا في المياه
والزبالة
والشباشب اتقطعت
واخدت اكواع كتيرة
واتزقيت
وكنت هقع 100 مرة
والطريق مش عايز يوسع
ومفيش أمن ولا حد بيحجز
انت ونصيبك
والناس ماسكة في بعضها
كل مجموعة مع بعضهم ماسكين بعض عشان محدش يتوه او يقع
واللي هيقع هيداس
ولوانت راجل حاول تقف وتوقف الجيش اللي وراك
مصيرك هتداس انت واللي ادامك
انت بتكون زي اللي وسط البحر
لا تقدر ترجع ولا تقدر تقف
لازم تكمل طوالي لحد ما يبان لها اخر
اكتر من ساعة في الطريق الضيق ده ومش شايفين اي منافذ جانبية وماسكين في بعض والشبشاب اتقطعت وانا متبت في ايد عمي والحاج رزق متبت في ايدي ولما يفصلنا غصب عننا اي حاجة نسعى اننا نمسك في بعض
أخيرا وصلما لحتة جانبية بس بعد ما بقت الاحرامات والرجلين حاجات عجيبة
قعدنا نلف على حتة ضل
لحد ما دخلنا مكان جانبي
في ناس بتفكر ان عرفات هو الجبل اللي بيطلع في التلفزيون والناس بتقف عنده
ده جزء من عرفات
عرفات زي ما وضحت هي منطقة كبيرة جدا يمكن نص المنصورة
وفيها جبال كتيرة غير الجبل ده
واي مكان تقف فيه او تقعد في عرفات هو مكان الحج
مش الجبل ده بس
بس الناس بتحب الجبل ده عشان الرسول عليه الصلاة والسلام كان بيقف عند الصخرات اللي في اول الجبل ده
جبل الرحمة اقصد
وبعدين فرشنا الكوفرته بتاعتي ومعرفناش اتجاه القبلة صح
فقمنا وقلت لعمي وللحاج رزق انا هروح عند جبل الرحمة
هو انا هحج كل يوم
خليكم هنا وانا هروح وارجع لكم
نسيت هناك مصحف جميل كان جاي هدية لخطيبتي من السعودية من مكة وادته ليا وكنت بقرأ منه على طول ونسيته في المكان ده في عرفات
ورحنا ندور على جبل الرحمة
مشينا اكتر من ساعتين جوه عرفات وونسأل لحد ما وصلنا قبله بحاجات بسيطة
ومقدرناش نمشي
ومش عارفين ندخل له منين بالظبط
فقعدنا على جبل قبله
بيطل عليه
وكل واحد انفرد بنفسه
ودعا باللي نفسه فيه
وانا حسيت اني مش في النظام؟
الوقت بيعدي
وانا مش عارف ادعي صح
ادعي ولا اشكر ولا اسبح
ولا اعمل ايه
ولا اقرأ قرآن
قعدت اعمل كل حاجة
ومش عايز اقضي الوقت في حاجة واحدة ويكون غيرها أفيد
كنا تعبانين
بس الواحد عايز يحس بطعم الحج في اليوم ده
اختليت بنفسي بعيد عنهم وقعدت ادعي
ولما حسيت انا باقي ربع ساعة والشمس تغرب
اشتديت في الدعاء
وبعدين حاسس برده ان يمكن اه ويمكن لأ
هو ربنا قبل حجي وغفر لي اليوم ده ولا لأ
حاولت اطلع كل ما يمكن من ادعية وتوسلات وحاجات تخلي القلب يخشع تماما
عايز احس بطعم المغفرة
بطعم القبول
أخيرا تعبت من نفسي جدا
فدعيت ربنا بشدة وفي الآخر دعيت وقلت يا رب لو قبلت حجي وغفرت لي كل ذنوبي أديني علامة
وطلت من ربنا علامة معينة تتحقق في ساعتها
وحصلت فعلا في نفس اللحظة
بيقولوا دايما أن للايمان لذة وللطاعة لذة تجدها في قلبك
أول مرة في حياتي أحس باللذة دي
وأول مرة أعرف يعني ايه لذة الطاعة في القلب
قعدت اعيط من الفرحة واسجد لربنا واشكره وانا مش قادر
واقول ياه
بقى كل الذنوب دي وربنا يغفر لي في لحظة واحدة كده
ويتقبل حجي ودعائي
يعني كل البشر دي الملايين في عرفات دعوا ربنا وربنا استجاب للكل
افتكرت حديث ساعتها معناه كده
أن ربنا بيسال الملايكة لماذ تجمع عبادي هكذا وهو بهم أعلم فيقولون يسألونك يارب فيقول ربنا أشهدكم يا ملائكتي أني قد غفرت لهم
أول مرة الواحد يحس بمعنى اسم الله الكريم
كريم لدرجة لا نتخيلها
ياما سترنا وكان كريم معانا
وكمان يغفر لنا
انا مش عارف اوصف اللحظة
انا فاكرها بس وحاسسها
لكن بصرااحة مش لاقي كلام اكتبه لكم اوصف بيه اللحظة والاحساس وحب ربنا اد ايه واللذة في القبول ان شاء الله
أصعب امتحان
طلبت من ربنا علامة القبول وخفت متتحققش وارجع خسران
لقيت ربنا أكرم الأكرمين
مش هقدر اتكلم هنا كتير عن اليوم ده
خلصنا والشمس غربت
كان لابد من الإفاضة إلى المزدلفة
ودي منطقة بين منى وعرفات عدينا عليها واحنا رايحين عرفات
مكناش عارفين نخرج منين من عرفات
مكان كبير جدا ومتعرفش اوله من آخره
فضلنا اكتر من ساعة ونص لحد ما خرجنا على اول طريق المزدلفة ومنى
واطرف شيء ان الأكل كان باظ والمياه خلصت والحمولة خفت بس الواحد من فرحته مش حاسس بالجوع
عايز اكمل الحج وارجع
اصعب حاجة كانت الدخان بتاع العربيات والأتوبيسات واحنا وسطها مزنوقين ومش عارفين نطلع من بينها ونفادي ومفيش فايدة
واخيرا دخلنا طريق للمشاه
كان مدخله مقفول بسور متوسط الطول
لحد فوق الركبة مثلا
وبلبس الاحرام متعرفش ترفع رجلك
تشوف العجب عشان تعدي السور ده وتدخل طريق المشاه
وماشيين في هدوء وسكينة
وكله بيقول
الله أكبر الله أكبر، لا إله إلا الله والله أكبر، الله أكبر ولله الحمد
الله أكبر
في جماعت او منفردين
فَإِذَا أَفَضْتُمْ مِنْ عَرَفَاتٍ فَاذْكُرُوا اللَّهَ عِنْدَ الْمَشْعَرِ الْحَرَامِ وَاذْكُرُوهُ كَمَا هَدَاكُمْ وَإِنْ كُنْتُمْ مِنْ قَبْلِهِ لَمِنَ الضَّالِّين َ* ثُمَّ أَفِيضُوا مِنْ حَيْثُ أَفَاضَ النَّاسُ وَاسْتَغْفِرُوا اللَّهَ إِنَّ اللَّهَ غَفُورٌ رَحِيم)
وصلنا المزدلفة من نفس الطريق اللي مشيناه من منى لعرفات
وفي المزدلفة لقيت أكوام من البشر
كل الناس مفترشة الطرقات تماما والجبال حوالين المزدلفة وعشان توصل للمشعر الحرام ( جبل قزح ) تمشي بين الناس وتفادي وناس تمنعك تقولك متعديش من ادامي وغلاسة كتيرة بس الواحد كان بيبتسم ويقول معلش ويعدي طبعا
انا عايز اوصل للمشعر الحرام
ودلوقتي اتعمل مكان الجبل مسجد
وبقى الناس يصلوا في المسجد ده
زمان كان كفار مكة والعرب بيروحوا عند جبل قزح ده ويفضلوا يتباهوا بأمواتهم وبطولات الاسبقين وقبائلهم وانسابهم
فربنا أمرنا أننا نعبده ونذكره في المكان ده أكتر مما كان يذكر الكفار أهلهم وامواتهم
مشكلة شركات السياحة أنها بتخلي الحجاح يقعدوا في الاتوبيسات وويعدوهم على المزدلفة في طريق الرجوع من عرفات لمنى ويقولوا لهم كده رحنا المزدلفة حسب السنة ونروح بقى منى عشان نرمي الجمرات الصبح
طبعا ده كلام فاضي
السلطات السعودية بتجبر شركات السياحة انها تفضل واقفة بالحجاج للساعة 12 في قلب المزلدفة وبعد كده بيفتحوا لهم الطريق يروحوا منى بحجة ان في ناس معاها اطفال ونساء وكبار السن ودول المسموح لهم بعدم المبيت في المزدلفة وكان زمان السقاء اللي ببيسقوا الحجيج واللي بيخدموهم
لكن السنة انك تبات في المزدلفة لحد فجر العاشر من ذو الحجة
بنوصل المزدلفة بعد العشا بكتير لأن الطريق طويل وبتكون تعبت من الوقوف في عرفات ومشوار الصبح من منى لعرفات
فبترجع وانت ماشي في هدوء ومفيش تزاحم والناس كتيرة بس ماشيين بهدوء جدا والتسبيح التكبير زي ما وضحت قبل كده
وصلت مسجد المشعر الحرام ودخلنا اتوضينا وصلينا المغرب والعشا قصر والمفروض نقضي الوقت بعد في كده في الاستغفار وذكر ربنا
أنا كنت عطشان جدا ومعييش مياه خلاص
وعمي نام من التعب
والحج رزق تاه مننا
وفضلنا ندور عليه ونستناه ونرجع ونتقدم ونجري في الطريق من عرفات للمزدلفة عشان نلاقيه ومفيش فايدة
انا عطشان جدا
خرجت من المسجد والمسجد ده كبير جدا
واتعودوا ان كل المساجد هناك كبيرة جدا وتاخد بالالاف من المصلين
وفي جزء للستات في كل مسجد في المساجد اللي رحناها
خرجت من المسجد بصعوبة وناس بتزعق عشان اللي نايمين والناس عايزة تصلي
والصح أنه يصلي في أي مكان في مزدلفة مش المسجد ده بس ماعدا وادي محسر وده مكان في المزدلفة اللي نزل فيه العذاب على اصحاب الفيل
خرجت الف على مياه نضيفة للشرب ولقيت عربيات المياه واقفة رحت اخدت اتنين واحدة شربتها وواحدة لعمي وعربيات الطعام كانت فاضية جدا اخدت وجبتين مجاني
ورجعت المسجد اكلت وجبة وصحيت عمي شرب مياه وساب الأكل ونام
حاولت أنام
انا نومي وحش جدا
بحب اتقلب كل شوية
في المكان ده مفيش تقليب
انا اصلا نايم بالعافية وحواليا أرجل ورؤؤس كتيرة
المهم ربنا أعلم أنا نمت ازاي في الليلة دي وصحيت قبل الفجر اتوضيت وصليت الفجر
عمي خرج يتوضى لقيته راجع بواحد في ايده
دكتور مصري عايش في الرياض وأول مرة يحج وتاه من اصحابه اللي معاهم الأكل والشنط وكل حاجته
صلينا وأكلوا الوجبة اللي جبتها بالليل وشربنا
وبعد الفجر دعينا وذكرنا ربنا لحد قبل الشروق بحاجة بسيطة
قمنا عشان نروح منى
موضوع: أحداث الحج 8 
الجمعة يناير 23, 2009 11:10 am