أحداث الحج

السلام عليكم ورحمة الله وبركاته

بسم الله الرحمن الرحيم

(( وأذن في الناس بالحج يأتوك رجالا وعلى كل ضامر يأتين من كل فج عميق ))

لما ربنا أمر سيدنا إبراهيم بأنه ياذن للناس بالحج فسيدنا إبراهيم تعجب !! هيأذن لمين وهو في مكان مفيش فيه أي حد
وصوته هيوصل لمين ؟
هو صوته ده مهما كان عال مش هيسمع أبعد من كم متر

لكن ربنا أمر سيدنا إبراهيم بالأذان وقال له عليك بالنداء وعلينا الإيصال

أنا لما كنت أقرأ التفسي ده كنت أفهم ان ربنا جعل خاصية في نداء سيدنا إبراهيم بالحج
وهو أن النداء ده بيطوف حوالين الأرض من وقتها لنهاية الدنيا
بس احنا بنسمعه بقلوبنا مش بودانا
الصوت بنسمعه بفطرة اإسلام اللي ربنا خلقنا عليها
بيدور داخل كل واحد منا
عشان كده كلنا بنمتمنى الحج
ومهما انشغلنا بال
نيا بنفكر دايما امتى هنحج ونفسنا دايما نحج ومتعلفقين بالكعبة المشرفة والحرم المكي الجميل

عشان كده كان نفسي أحج أوي
وخاصة قبل الجواز
عشان اكون بحج وانا مش مشغول بحاجة

كنت بقول دايما لكل واحد ينتقدني ويقولي لما تجوز ابقى حج
ارد وأقول أن الجواز محتاج طولة بال عشان الستات عايزة الصبر أما الحج محتاج صحة كويسة عشان احج صح وأعمل كل حاجة بالحج
مش أحج وناس شايلاني بتطوف بيا وأكون عبء على غيري

مادام ربنا قدرني على تكاليف الحج يبقى أولى
لأن الواحد لو مات من غير ما يتجوز مش مهم
لكن من غير حج مع استطاعة يبقى مشكلة كبيرة جدا
وفي أحاديث كتيرة عن الموضوع ده

خلاصة الكلام ان كل واحد كان بيعرف إني عايز احج وبسعى على التأشيرة وكده يسخر مني ويقولي اتجوز الأول
وتسمع كلام ناس كبيرة تقولك انا محجيتش بس جوزت تلات بنات وجواز البنت بحجة
كلام فارغ
الحديث بيقول (( من كانت له ابنه فأحسن تأديبها دخل الجنة .. )) إلى آخر الحديث

لا قال جوازة ولا قال حاجة من الكلام الفاضي ده

المهم أنا كنت مقتنع ونفسي جدا في الحج
خاصة أنسي عملت عمرة وانا في 3 اعدادي سنة 96 وكانت ممتعة جدا في العشر الأواخر منرمضان

اشتريت كتاب فقه لسنه
وقريت الكتاب كله وخاصة فصل الحج
وحاولت سارف للحج في 2006 وللأسف المحاولة منجحتش ومأخدتش تاشيرة
وخفت جدا أن ربنا منعني من الحج وممكن كده أموت بدون حج
بدون توبة
بدون غفران الذنوب
بدون حاجة تدافع عني يوم الحساب
وفضلت أدعي ربنا يبلغني الحج وأموت بعدها بس أحج

وبعدين حاولت تاني في 2007 وجاتلي التأشيرة والحمد لله
ومن ساعة ما جت التاشيرة وانا قعدت أذاكر في كتاب فقه السنة بشدةى
واسجل زي ملخص لكل الكلام عن الحج
والخطوات
والترتيب
وحجة النبي عليه الصلاة والسلام وصفتها
لأن في العمرة اللي عملتها شفت ناس حتى مش عارفينت فين مقام ابراهيم ولا حجر اسماعيل اللي كل الدنيا تعرفه

وقعدت اتفرج على صور واسمع شرايط
واسجل كل جحاجة نقطة بمنقطة وترتيب ومواعيد وايه قبل شؤوق الشمس وايه قبل يوم عرفات وايه تاني يوم وكل ده


وسجلت فيالنهاية ملخص لكل ده تاني عشان اخده معايا

بس كنت قلقان
جهزت هدوم كتيرة
صيفي على شتوي عشان مضيعش وقت كتير في الغسيل هناك

وعشان الجو هناك مش مستقر في الوقت اللي هنروح فيه
من 26 نوفمبر ل 26 ديسمبر
او 16 ذو القعة ل 6 ذو الحجة

وعشان القلق أخدت معايا كتاب فقه السنة هناك قلت يمكن احتاج اقرأ حاجة فيه اكون نسيتها ولا حاجة
مش عايز غلطة في الجحج
يمكن محجش تاني

وبعدين قعدت اشتري في كل حاجة تخطر على بتالي ممكن احتاجها هناك
أدوية البرد والكحة والسخونية وقطن وشاشا وبلاستر
صابون ومسحوق غسيل وابره وبكر خيط
أحذية وعبايات رجالي وسراويل
وكل حاجة

كنت فرحان جدا
خايف جدا
فرحان بالحج
خايف من حدوث اي حاجة تمنعني من الوصول لمكة والحج

خايف أغلط في أي منسك من المناسك ويضيع حجي

خايف اروح وأرجع واحس اني مكتغيرتش
أو ان ربنا متقبلش مني
كنت بسمع من شيوخ كتير ان الواحد لما يحج وربنا يتقبل منه بيحس بالقبول ده

قريت كمان ان أحد الصالحين كان بيحج وشاف رؤيا في المنام أن السنة دي حج فيها 250 ألف حاج وربنا تقبل من 6 بس
وعن كل واحد من الستة دول ربنا قبل حج 40 ألف يبقى كده ربنا قبل حج كل الناس السنة دي

فرحت اوي
وقلت يعني أكيد في 50 ولا حاجة ربنا هيتف=قبل منهم ويتقبل منا عشانهم
لأن ربنا كريم اوي ومش ممكن نروح لحد بيته ويردنا خايبين

كان عنمدي امل كبير في رحمة ربنا وأني احس اني اتغسلت من كل الماضي
وكنت خايف أوي من الندم لو فاتني المشهد ده

وصلت مطار القاهرة ورؤكبت الطيارة بعد يومين من العذاب والخوف من عدم السفر
وكل ما نروح نرب الطيارة يرجعونا بسبب مختلف ويقولوا اللي بعدها
تقول يعني كنا بنركب سرفيس جديلة وطلع الدراسات

كان خوفي بيزيد كل مرة يقولوا استنوا الطيارة اللي بعدها
وغيرنا من جده للرياض
وكانت بهدلة
وانا عيطت كتير وقلت ربنا مش عايزين أوصل لبيته
وفضلت أدعي وأقول لا إله إلا الله وحده لا شريك له له الملك وله الحمد يحيي ويميت وهو حي لا يموت بيده الخير كله وهو على كل شيء قدير

كنت حافظها عشان فيها جزء من دعاء دخول السوقولأن في الحديث القدسي فيما معناه أن اللي ينشغل عن الطلب من الله بالثناء عليه يعطيه الله أكثر ما يعطي السائلين

والحمد لله أخيرا ركبت طيارة الرياض
وانفصلت عن عمي وصاحبه اللي كانوا معايا وهم ركبوا طيارة الدمام

ومكنتش عارف لما هوصل الرياض لوحدي هعمل ايه؟
ومعرفش حاجة هناك
بس طبعا كنت مجهز ارقام تليفونات كل الناس اللي أعرفهم في الرياض ومكة والمدينة

وصلنا الرياض والمطار روعة حاجة تانية غير القاهرة خالص
وتعدي في انبوبة كده لحد ما توصل المطار مفيش نوزل واتوبيسات وكلام فاضي من ده
وموظفين المطار ختموا الباسبور وعدونا في ثواني

خرجت من الدايرة الجمركية ومش عارف ايه العمل
هروح مكة ولا المدينة ولا فين
كنا متفقين قبل السفر انا وعمي هنروح المدينة أولا

نزلت قثلت اتصل بجوز بنت خالتي ييجي يقابلني ويقولي اركب منين ولا اروح فين
لأن المطار خارج الرياض بمسافة كبيرة جدا
رحت اشتري خط موبايل طلع له نظام عجيب فرجعت
واشتريت كارت تليفون من المطار وفضلت احاول اتصل منه وادخل الكود بتاعهخ واتبع التعليمات لما طلعت روحي وقلت مش متصل
وأخيرا عرفت اتصل وكل ما أطلب حد من اللي في الرياض محدش يرد
او يكون تيلفونه مقفول
كلهم موبايلات

أعمل ايه
اتصلت بواحد اسمه شريف الفيومي كان شغال معايا في المحل وسافر بريدة بين الرياضوبرده تليفونه مشغول او ميردش

فضلت رايح جاي بالشنط ومش عارف اروح فين
واخيرا رقم عمي جمع وكان هو لسه في الطيارة وقلت له انا في الرياض اروح فين
قالي على المدينة ونتقابل عند القبة الخضرا اللي عند الروضة الشريفة
شوف سكن وحط حاجتك ونتقابل بعد المغرب في المكان ده

وقفت عربية عشان يوصلني للنقل الجماعي
انا عندي معلومات عن المملكة من ألصدقائي على النت في مكة ومن زيارتي السابقة

ركب معانا مجموعه من الباكستانيين والهنود عشان يوصلهم للرياض وانا للنقل الجماعي
لف بينا الرياض شفت حاجات متخيلش انمها ممكن تتعمل في مصر بعد 10 سنين
فخامة
ونضافة
وروعة
وعمارات وقصور حاجة كده ولا في الأحلام

والخيرا انا كنت أخر واحد أنزل عشان النقل الجماعي ده في نهاية الرياض
كنت طول الطريق بفكر في كرم ربنا معايا
واني مادام وصلت لهنا بعد التعب في المطار في مصر يبقى ربنا كتبلي الحج انش اء الله

كنت فرحان جدا ونسيت الخوف تماما
وصلت النقثل الجماعي وحجزت تذكرة للمجينة وطلعت اصلي الضهر والعصر واستريحت في المسجد شوية ونزلت ألف على مكان اشنتري منه خط موبايل
لحد ما اشتريت خط
الامشكلة ان موباتيلي كان بيفصل شحن
وفصل بالفعل
يدوب كلمتهم في مصر قلت لهم لو عمي اتصل بيكم ادوله النمرة دي وخلوه يكلمني عليها وانا وصلت وكويس
الشاحن بتاعي كان في شنطة اليد بتاعه عمي
اعمل ايه؟
لفيت لحد ما لقيت واحد بيبع شاحن نفس النوع
واشترطت عليه لما اشتري الشاحن يسيب ليا الجهاز يشحن عنده
ووافق وشحن لحد ما جه معاد الأتوبيس
ملحقش يشحن أوي
وصليت المغرب والعشا جمع تقديم
وركبت الأتوبيس

وبعد السهر في المطار نمت في الأتوبيس اوي
وكل شوية افوق
نوم قلق كده
والاقي جالي اتصال
عمي بيتصل بيا من موبايل واحد كان معاهم على الطيارة
ولما اتصل انا محدش يرد
ولما انام وافوق الاقي فات عشر مكاكلات منهم
والموبايل بدأ يخلص الشحن

أخيرا اتكلمنا وعمي قالي روح جده نتقابل هناك
قلت له انا رايح المدينه
قالي قابلني في جده
اتصرف
وبعدين بقى ؟
اتصلت بشريف اللي في بريده عشان انزل عنده ومن هناك احجز جده تاني
شريف قالي تشرف وتعالى
وبعدين فكرت اني اروح المدينة واعتمد على نفسي بقى
وانفصل عن عمي لحد ما نتقابل في مكة واهو معاه رقمي

وبالفعل كملت لحد المدينة بس كانت رحلة شاقة جدا
ونزلنا نصي الفجر في الطريق ونشفنا من البرد
وكنت نايم في المسجد قبل اقامة الصلاة زي القتيل

والرحلة اخدت بالظبط 14 ساعة
تتصوروا انا اول مرة اخد بالي اني صليت الفجر مرتين في اليوم ده
في الطريق وفي المدينة لما وصلنا الفجر هناك
ازاي ؟

مش عارف

اه
هو السواق وقف عشان اللي مصلاش العشا يصلي بس وزقف بالليل جدا في برد رهيب

ونزلت أكلت سندوتشات وحشة جدا مكنش في غيرها في الاستراحة دي

لأن برده الأكل كان مع عمي وحوه شنطي الكبيرة

وصلنا أخير المدينة قبل الفجر
صليت الفجر جنب محطة لنقل الجماعي لأني مكنتش عارف موقعنا فين من الحرم بالظبط
المسجد النبوي يعني
ورحت المسجد اغتسلت وجهزت نفسي للإحرام
لن عمي واللي معاه قالولي لازم تروح مكة ونتقابل هناك
واحنا هنروح جده ونفقابلك
فكرت اطنشهم وأقعد في المدينة اسبوع براحتي وبعدين اروح مكة

وبعدين قلت مينفعش لزم نكون مع بعض عشان الجماعة أحسن من الفرد لوحده في السفر والاقامة الطويلة

مقدرشتن ازور قبر النبي عليه الصلاة والسلام
وقلتن هرجع المدينة تاني ان شاء الله بعد نهاية الحج في مكة
وحصل الحمد لله

فضلت من بعد الفجر لحد قبل الضهر بحاجة بسيطة لحد ماالعربية اتحركت بينا من المدينة
ورحنا ابيار علي عشان نحرم منها
وكان معايا اتنين افغان والسواق اسمه عمي ابو عبد الله
وعمي دي ليها قصة

وصلنا أبيار علي وأحرمنا وانا فضلت كل ما الف الاحرام اظن اني لفيته غلط
وارجع اعدله تاني
لما الاخر خرجت وسألت ناس تبع مكتب الارشاد هناك
قالوا كده صح
وكده السنة
متبينش كتفك
تغطي الكتفين

وركبنا تاني عشان نواصل المشوار لمكة

وعند الوصول لمكة يبقى للكلام طعم تاني

وأقابلكم الحلقة الجاية في مكة عند جبل الكعبة