أحداث الحج 10

وصلنا المجزر بعد عناء وتعب شديد جدا من حرارة الجو والمجهود المتواصل من يوم 8 ذو الحجة
وكل ده وبقينا في 10 ذو الحجة

عند باب المجزر كنت حاسس ان خلاص كده خلصت الحج
هندبح هدي ونحلق ونرجع نتحلل يا سلام

الأمن على الباب قال عايزين ايه؟
قلنا هندخل نشتري اضحية وندبح

قال معاكم جوازات السفر ؟

قلت لأ
جوازي في مكة في السكن
ومكنتش اخدته معايا عشان ميقعش وعنته في مكان امين في السكن

قال يبقى مينفعش تدخلوا المجزر
ارجعوا تاني

ياعم احنا حجاج
ولبس الاحرام اهو
مفيش فايدة
معاكم سكاكين تدبحوا بيها ؟
لأ
قال مالكوش دخول

يا خبر أبيض
بعد المشوار ده كله مفيش دخول ؟

نعم يا خويا

مش هقدر أقول كنت مضايق ازاي ولا اد ايه
بس اكيد انتوا حاسين باللي أقصده

رجعنا عشان نمشي عمي قال في مدخل تاني الجهة التانية تعالى نروح يمكن نعرف ندخل

ده مدخل خاص باللي يدبح عجول
اللي مشونا من عنده كان للي يدبح خرفان
رحنا عند العجول
دخلونا
قلت الحمد لله

ودخلنا وكان في مجموعة من الهنود عايزين يدبحوا هما كان
قعدنال نجمع بعض
لحد ما بقينا سبعة مصريين على سودانيين على هندي وباكستاني ونيجيري على ما أفتكر

واخترنا عجل بعد عناء
لأن كل العجول هناك ضعيفة
البدو ما بيأكلوهاش
بيسيبوها في المراعي الصحراوية
وتطلع كلها ضعيفة
ولما عرفوا اني دكتور بيطري من عمي
صمموا ان أنا اللي اختار
وكل ما يختاروا واحدة ويعرضوها عليا أقولهم العجل ده مش حلو
ضعيف
معضم
لحد مانقينا أحسن الموجود
ودفعنا الفلوس وشفنا الدبح ومشينا

هناك نظام حلو
حضرتك عايز تبدح
بتختار الدبيحة اللي تناسبك
ويتكتب عليها رقم
وتدفع تمنمها وتمن الدبح
عايز منها لحمة تاخد كوبون تصرف بيه
وتدخل دبيحتك في الدور
وتدبح
وانت تاخد لحمة من اي دبيحة غيرها تم تنضيفها
طبعا دبح وسلخ آلي ونضافة وحاجات من اللي درسناها في الكتب

ومشينا طلعنا السام
وكل التعب راح بعد الاضحية ما تمت
وطلعت السلم الحديد تاني وبقيت فوق الطريق الجبلي
وقعدت حلقت
وعمي جه يفاضل مع لحلاق
قلت له لأ
وقعدت ووشي للقبلة
وذكرت ربنا
والالي طلبه الراجل اديتهخ له من غير فصال
عشان ممنوع الجدال او الفصال في النسك
ودي كنت قريتها في كتاب فقه السنة قبل الحج وخليت عمي يعمل زيي

ومشينا مبوسطين وطبعا الطريق واحنا راجعين كان نازل مش طالع
فكان اسهل
لحد ما وصلنا حدود منى
تعبنا
وبقينا ماشيين مش لاقيين نقطة مياه نشربها ولا حد بيبع عصاير او حاجة ساقعة
ولمينا الحصى من الجبل في منى عشان الرمي في الأيام الجاية

ورجعنا لمسجد بعد مشوار طويل زي مشوار الذهاب
بس الواحد نفسيته ارتاحت
عمي راح صلى العصر وراح مكة يعمل طواف الافاضة وتحلل من الاحرام

انا كنت تعبان والدكتور محمود كذلك
لما رجع عمي الدكتور قال عايز اتحلل واغير هدومي واحلق وكده
تعالى يا عماد نروح مكة
قلت اروح عشان اغير هدومي واطوف وابقى خلصت كل اركان الحج
ويتبقى الرمي والسنن

عمي وصف لنا الطريق
واحنا مشينا ومشينا وانا كنت ماتشي جنب الراجل زي الميت
لحد ما وصلنا سلم طالع جبل
عالي ومبيخلصش
بقيت اطلع درجة واستريح
واخيرا طلعنا
مفيش ولا عربية رايحة مكة
فضلنا نمشي لحد ما وصلنا العزيزية
اللي قلتلكم في الأول كل الحجاج بيسكنوا فيها عشان قريبة من منى وعرفات

فضلنا ماشيين ووصلنا قلب العزيزية
حاجة كده ما شاء الله قمة في الفن والمعمار

أخيرا وبعد اكتر من 3 كيلو مشي لقينا مبيكروباض بينده مكة
ركبنا
اخدنا المشوار ركوب في ساعة ونص
وبنمشي مترين كلا ربع ساعة من الزحام الفظيع
ووصلنا الحرم في قمة الانهاك والعرق
قفلت للدكتور محمود روح احلق هنا
ووريته مكان الحلاقين قصاد الصفا والمروة
واطلع ادخل الحمامات من هنا ونضيفة مش زي عندنا في مصر عشان هو كان قلقان من موضوع الحمام اوي وقلت له في الحرم أنضف من السكن
وكان فاكرني بضحك عليه

وقلت له انا هدخل اطوف طواف الافاضة واروح السكن اغير الاحرام ونتقابل عند باب الملك فهد ونروح منى تاني سوا الساعة 10 بالليل

دحلت اطوف لقيت الحرم فاضي
ولبس الاحرام عليا كل طين وعرق
قلت مينفعش
اروح اتحلل وارجع اطوف

مالقيتش ولا مواصلة للسكن
اضطريت امشي
وتعبت جدا في الشمي ده
اليوم ده كان كله مشي من الفجر لحد الليل

قبل ما ادخل السكن حودت على مطعم واحة الأطاعنم اللي كنت باكل فيه من يوم ما خفيت من الالتهابات
اكلت كتير أوي
بس مشبعتش برده
كان شكلي زبالة وانا داخل المطعم وكلي متوسخ
بس راسي بيضا ونضيفة بتنور في الضلمة بعد ما جبتها زلبطة
بعد ما بقيت اصلع حسيت اني كده حجيت
وقفت بعرفات
ورميت الجمرة
ودبحت
وحلقت
فاضل ايه تاني

وبعدين رحت السكن اطمنت على كل حاجة
وغيرت واخدت دش محترم
وقمت رحت الحرم في قمة النشاط
ونسيت كل التعب
دخلت صليت المغرب والعشا
ولقيت الحرم بيموج بالبشر
اللي كان فاضي من ساعة بقى ملايين
معرفشت اطوف
خفت اصلا انزل اطوف
لأن بالمنظر ده كان الطواف هياخد تلات ساعات
الناس شكلهات حوالين الكعبة واقف خالص
والحل البديل اطوف من الدورؤ التاني وطبعا مستحيل
قمت مصلي
ومشيت من الحرم من غير طواف عشان الحق اوصل منى قبل قدوم منتصف الليل وأقفضي الليل في منى زي السنة
وخرجت استننى في الأخ محمود مفيش
لحد 10 ونص قلت يبقى سابني ومشي