اسامينا

زائر

السلام عليكم
عندى فكره حلوه قوى يا ريت كلنا نشارك فيها
كل واحد مننا يدخل يقول معنى اسمه ايه؟ ومين السبب انه اتسمى كده؟ وبيحب اسمه ولا لأ؟ ولو مش بيحب اسمه كان
نفسه يبقى اسمه ايه؟ ولو فى موقف او مشكله حصلتله بسبب اسمه يحكيه
اسمى معناه رسوخ الجبال
ورضوى جبل فى المدينه المنوره وكمان معناه فرس
واصلها من كلمة الرضا طبعا ومنها اسم رضوان خازن الجنه
اللى اختارلى الاسم اصلا ماما بسبب واحده كانت جارتنا كانت جميله جدا واكن اسمها رضوى وعنيها زرقا وكان نفسها اطلع شبهها والظاهر انها مادعتش بضمير لان اللون طلع مش ازرق بس الحمد لله كده رضا
انا بحب اسمى الحمد لله لكن كان نفسى ابقى اسمى حاجه تانيه يعنى رانده مثلا او داليا ماعرفش ليه
الحمد لله برده اسمى ماسببش مشاكل ليا خالص لكن فى ناس بتكتبه غلط اللى يكتبه رضوه واللى يكتبه ردوه ههههههه اه والله واللى يكتبه رضوا
ماعلينا كلها غلطات املائيه
يلا مستنيه ردودكم

موضوع: رد: اسامينا الإثنين مارس 23, 2009 2:39 am

موضوع حلو وجديد
بالنسبة ليا أنا
معنى مصطفى في معجم اللغة العربية " المُختار ، المُجتبى ، المُفضَّل ، الخلاصة ، الصفوة " ههههه .. طبعاً عارفين بضحك ليه
وطبعاً من أسماء الرسول الكريم
وفي معجم آخر
المصطفى المفضل المختار وربنا سبحانه اصطفى آدم ونوحا وآل ابراهيم على العالمين وما اجمل ان يكون اسما على مسمى فما اشد حاجة الناس بعد ان اختلط الحابل بالنابل الى عملية اصطفاء
ده طبعاً في المعجم بس

السبب في اختياري للإسم هو جدتي رحمها الله لأنها كانت بتحب الأهلي .. هههههههههه .. سمتني على إسم اللاعب الشهير مصطفى عبده
أما عن رضائي لهذا الإسم .. لو لم أكن مصطفى لوددت أن أكون مصطفى
الحمد لله أنا راضي جداً بالإسم ده وأحمد الله عليه لأنه اسم جميل وأنا أحبه

إضافة صغيرة على معنى إسم" رضوى" .. المعنى عندي كالتالي : القابلة ، المُحبة ، المُطيعة ، واسم جبل بين المدينة وينبع
جزاكم الله خيراً على الموضوع

زائر

انا اسمى محمود

زائر

معنى نبيل هو الشخص نبيل الخلق.. أو الشخص جميل الأخلاق... و تعني عند الانجليز الشخص ذو الأصل الراقي الذي يمتلك ضياعا و مزارعا و أطيانا .... السبب في تسميتي بهذا الاسم ان الطبيب الذي ولدني في مدينة بليدة في الجزائر كان اسمه نبيل و لما كان والدي ليس في دماغه اسم معين قال نبيل و خلاص... مشكلة هذا الاسم أنه يقبع في المؤخرة في جميع اللجان و الامتحانات ... أتمنى لو كان اسمي فارس لأني أحب هذا الاسم جدا جدا و أتمنى تعلم ركوب الخيل أيضا... لذلك ابني حسميه فارس و البنت مريم لان الاسمين دول بحبهم أوي ... بس كدة

زائر

قال أبو منصور: ومن أسماء النساء رضيا وتكبيرها رضوى: وهو جبل
بالمدينة، والنسبة إليه رضوى، بالفتح والتحريك، وقال النبي، صلى الله عليه
وسلم: رضوى، رضى الله عنه، وقدس، قدسه الله، وأحد جبل يحبنا ونحبه جاءنا
سائرا متعبدا له تسبيح يزف زفا، وقال عرام بن الاصبغ السلمى: رضوى جبل،
وهو من ينبع على مسيرة يوم ومن المدينة على سبع مراحل، ميامنه طريق مكة
ومياسره طريق البريراء لمن كان مصعدا إلى مكة

ده الي مكتوب عن الاسم في معجم البلدان
بس انا دورت كتير للحديث ده على سند ملقيتش
لو حد لقى يبقى يقوللي
اللي اعرفه كمان انه جاي من الرضا وديه اكتر حاجه بحبها في اسمي
وراضيه بيه
كفايه ان ماما هيه اللي اختارتلي الاسم
انا الوحيده في اخواتي
كان نفسها يبقى عندها بنت اسمها رضوى
أول بنت اتفقت مع بابا على كده ونزل هوه غير رأيه و اختار اسم تاني
و يرجع البيت يلاقيها بتنادي عليها رضوى يقولها مش رضوى على فكره
واتكرر الموضوع تلات مرات
بعد كده بابا قال في الرابعه بقى خلاص نرضيها ونسمي رضوى وكنت انا بقه
بس كده

زائر

موضوع جميل اوى يارضوى...
انا اسمى لية معانى كتير و هى أية من ايات الله و هى العبرة و البرهان والمعجزة و العلامة...
انا بحب اسمى جدا بصراحة بحس انوا خفيف و بسيط ...وكمان سهل ان الاطفال اول ما بتبدا تتكلم بيبقى سهل عليها :D .. والدتى هيا الى كانت عايزه تسمينى كدة او اسم رؤى وبابا كان عايز اسم تانى فا عملوا قرعة وكتير و فى كذا مكان وفى كل وقت يطلع أية و الحمد لله اسمى بقى أية .. المشكلة الى بتواجهنى فية لما بكتبوا بيفتكروا انى بقول(ايه) واقولهم اسمى أية لحد ما اكتبها aya lol!

زائر

واضح جدا ان المقصود بالموضوع ده انا
ما انتوا تقرأوا على الفيس بوك وتدخلولى هنا
ماشى ، ماشي يا رضوى انتى ورضوى
طيب نحكى من اول الستر
انا مكنش اسمى اول ما اتولدت بوسي
انا الاول كان اسمى سهر واللى سمانى الاسم ده عماتى اول ما اتولدت راحوا سمونى الاسم ده واتعمل السبوع بالاسم ده ولسه عندى شهادة الميلاد القديمة وكمان الكوبنات بتاعت السبوع بإسم سهر فصحبات ماما قعدوا يتريقوا على الاسم وقالت انه ممكن يحصل لغبطه كتير بسبب الاسم ده ما بين سهير وسمر وسحر والاسبلنج بتاعه نفس اسلبنج سحر وهتحصل مشاكل بسبب الاسم ده
فقرروا يغيروا الاسم يا اما مى يا اما بوسي ( اسخم من ستى اللى سيدى طبعا عرفين معنى مي فى اللغه العربية ايه )
اتفقوا على مي ماما راحت سمتنى بوسي والسبب انها كانت بتحب الممثلة بوسي
ماما زعلت من تريقة صحباتها وسمتنى بوسي قال ده اللى مش تريقه
ما علينا
نيجى بقى لمعنى الاسم
اسمى له معانى كتير
المرأة الجميلة وفى اللغه الانجليزية قطة و زهرة الصفصاف وفى مرة من المرات ميس وقفتنى وسألتنى انتى تعرفى معنى اسمك فى اللغة العربية قولتلها لأ قالتلى معنى اسمك فى اللغه العربية دليل
وعملت سرش على جوجل طلع معنى بوسي واصله
وهو:-
اسم فرعوني ويعني القمر لان القطط تنشط في الليل مثل القمر
اما بقى موضوع بحبه ولا لأ
انا عمرى ما كرهت اسمى لانه فعلا لايق عليه فيه كل خواص القطة حتى الخربشه وبخربش جامد لما حد يضيقنى
ههههههههههههههههههه وفعلا نشاطى يبقى قوى جدا بالليل اكتر من النهار ومهما ابقى تعبانه وعايزه انام عندى السهر احلى من النوم
فى مرة ميس وقفتنى وسألتنى اسمى فى بدايه السنه قولتلها بوسي
قالتلى اسمك حلو بس غريب
قولتلها والله يا ميس انا معنديش مشكلة خالص دلوقتى فى اسمى اهو انا صغيرة مش مشكلة بس المشكلة بقى لما اكبر واتجوز واجيب عيال ويسألو ابنى فى المدرسة ماما اسمها ايه يا حبيبى يقولهم اسمها بوسي ولا لما احج ابقى الحاجة بسبس ولا لما ابقى جده تيته اسمها بوسي
وانا نوية كمان اسمى اسامى دينيه تخيلوا بقى بوسي مثلا تجيب معاذ هههههههههههه
ما علينا اهو ايام وبتعدى
بس كان نفسي يبقى اسمى حلو ودينى
يعنى جنات
ملاك
هديل
نور
اسم حلو وله معانى جميلة
وفعلا صدق رسولنا الحبيب لما قال تحروا عن اسماء اولادكم
اللى جه فى دماغى الايام دى اكتر انى هتنده بإسم ده يوم القيامة وولادى هيتندهو به
هى مش كارثة اوى بس هعمل ايه
بس من كتر المواقف اللى بتحصلى وكلها مواقف بايخه ورخمه واذا قعدت احكيها انا متأكده انكم هتقعدوا تتضحكوا وهأخد الصفحة دى لحسابى
انا من سنه بس كنت بقول على اسمى انه مميز زى شخصيتى بس الفترة اللى فاتت فعلا انا كنت بفكر بشكل جادى انى اغير اسمى وسألت فعلا على الاجراءات بس طلعت صعبه موووووووووووووت وبهدله
ولما سألت صحباتى هما شايفين ان اسمى لايق عليه جدا وشقى زى ومش حسين ان اى اسم يليق عليه غير بوسي وانى حتى اذا غيرته هيندهونى بنفس الاسم فقولت وعلى ايه خلينى بوسي
اللى يضحكوا اكتر انى بسأل ماما بقولها ايه رأيك نغير اسمى قالتلى اه يا بوسي والله انا فكرت فى نفس الموضوع قولتلها طيب ايه رأيك اغيره لايه
عارفين ترد تقولى ايه
تقولى مياة
يا خبرررررررررررررررر
من بوسي لميادة يا نهار ابيض يا نهار ابيض
وبصراحه انا مش بحب الاسم ده خالص
قولتلها بصى يا ماما انا هخلينى بوسي حرام والله اللى بتعمليه فيه ده
هههههههههههههههههههههههههههه
ماما دى عسل
اما بقى موضوع المواقف والمشاكل كتيررررررررررررررررررررررررررررر بالهبل ابدأ منين من الابتدائية ولا من العمر الحالى
ههههههههههههههههههههههههههههه
اقولك عشان مش اصدعكم اكتر من كده هحكى ليكم موقف حصل لى وانا فى الابتدائية
بصى يا ستى
وانا فى الابتدائية فى 5 ابتدائى بالتحديد
ماما راحت تجيب النتيجة تدور اسمى مع النجحين مفيش مع السقطين مفيش
هههههههههههههههههههه تقريبا انا مكنتش موجوده فى السنه دى ولا ايه مش فاهمه
وتتصل وتقول مش لقيه اسمك وانا اتجنن ازاى؟؟ واعيييييييييط
لغايه ما لقوا اسمى
بس مش اسمى اوى يعنى
اللى كان بينقل الاسامى كان تقريبا مستنكر ان فى حد فى الدنيا اسمه بوسي
فسمانى هو بمعرفته سمانى موسي
وحولنى من انثى لذكر
ولولى اسم بابا والعيلة فى الموضوع كان زمانى بعيد السنه

اما بقى مواقفى وانا كبيرة
فى قعده بنات نبقى نقعد نحكيها مع بعض مع كوبيتين شاى فى الخمسينه واحكيلك يحكى ان

واذا عرفت معانى تانيه لاسمى هقولكم

زائر

اللى جه فى دماغى الايام دى اكتر انى هتنده بإسم ده يوم القيامة وولادى هيتندهو به
هى مش كارثة اوى بس هعمل ايه

ساعتها يا بوسى محدش هيبقى فايقلك ولا فايق لحد

حتى ولادك هيفرو منك

زائر

ماما هيا اللى اختارت ليا اسم ياسمين ومعناه نبات طيِّب الرائحة زهره أبيض يستعمل في صناعة المواد العطرية.انا بحب اسمى وبيتهيألى ملهوش معنى تانى :D

زائر

موضوع جميييل يارضوى والله

واسمك جميل جداا و انا بعز الاسم دة جداا لان لية واحدة اعرفها بعزها فممكن رابطة الاسم بيها

مش مشكلتنا

انتو اساميكم كلها حلوة

نسرين

اسم عربي ومن اصل فارسي معناه
ورد ابيض رائحته حلوة

وكمان بيقولو انه معناه النور الساطع

ماما سمتني الاسم دة

اصلها كانت معجبة بممثلة كدة ايام زمان اسمها نسرين

وقالت بس هية دي واول ما جيت ونورت الدونيا

اخترووه لية

بحب اسمي اوى بجد

ومش لية نفس للاسامي التانية انا اتولدت كدة وحابة اني اكون كدة

مممممممم

مواقف ومشاكل بسبب اسمي لا خاالص معتقدتش ومفتكرش يعني حصللي حاجة بسببه

بس ممكن يعني ناس كدة ال يعني بيضحكو

ودمهم خفيف

يقولو ان نسرين عدد اتنين نسر

وكدة يعني

زائر

ههههههههههههههه
ردك حلو قوى يا بوسى
وعلى فكره اسمك جميل وانا بحبه قوى
بس انا والله ماعرفش ايه اللى على الفيس بوك دى الفكره جاتلى وكتبتها بس عادى
من بوسي لمياده يا قلبى لا تحزن
مع احترامى لكل اللى اسمهم مياده بس اسم بوسى احلى
انا بحب كمان اسم نسرين وياسمين قوى
عاشت الاسامى يا بنات

زائر

سلام عليكم جميعا
بجد موضوع هاااااايل
جزاكى الله خيرا يا رضوى

معلش انى مقصر فى الرد على الموضوع الجميل ده لانى كنت مشغول الفتره الى فاتت

زائر

السلام عليكم

اسمي عماد

ومعناه القائم الذي تنصب عليه الخيمة

ويقال الصلاة عماد الدين

وسبب تسميتي عماد أن والدي الله يرحمه كان في العراق وحلم في ليلة انه ولد له مولود واسمه عماد على اسم عماد الدين زنكي ابو نور الدين محمود
فبعت لهم رسالة في مصر مع واحد نازل اجازة ان ابني تسموه عماد الدين
لكن مسؤلي مكتبي الصحة رفضوا الاسم المركب وقالوا عماد بس

يعني اسم الواحد معتقدش انه يحبه او يرفضصه
محدش بيختار اسمه
لكن بيتعود عليه

وعامة هو فيه ميزة واحدة انه مش متكرر بشكل كتير

لو حبيت اختار اسم غير عماد يبقى احمد او محمد او عبدالرحمن

وعجبني اوي معنى اسم نسرين

اما بوسي فكويس جدا انها وقفت على الاسم ده ومكنش في ايامها هيفا ولا نانسي
عشان دول حسب بعض الاغنيات هيدخلوا النار

زائر

السلام عليكم ورحمة الله وبركاته

والله ما انا عارفة اقول ايه بس دى تالت مرة اكتب رد الموضوع دا انا رديت مرتين وبعت الرد ومش عارفة اول ماابعت يفتح لى صفة اسم الدخول وكلمة السر هوا المنتدى دا مبيحبنيييييييييييش ولا ايه Crying or Very sad

الهم نخش فى ف الموضوع ونرد كلاكيت تالت مرة والله المستعان

اولا بهنى رضوى ع الموضوى الجميل بس هى دى دايما عادتك يا رودى

وعاوزة اقول لبوسى خلى بالك ان التسمية بالأسماء المشتقة من اسماء الملائكة او اسماء الملائكة غير مستحبه ودا انا سمعته فى حلقة للشيخ محمود المصرى وقريته كمان ع النت.

اما بخصوص اسمى هاجر:-

فأسهل من كده مفيش اسمى على اسم السيده هاجر زوجة سيدنا ابراهيم وام سيدنا اسماعيل عليهما السلام وهو اسم مصرى

وبيقال انه من الفعل هاجر يهاجر

اما عن اللى سمانى الأسم دا فهو بابا لكن ماما كان نفسها تسمينى مروة زى ماشافت فى الحلم وعمى كان عاوز مريم

وطبعا الإسم ايامها كان غريب اوى ع الناس (طبعا الكلام دا من اكتر من 20 سنه هيه العمر بيجرى ياولاد)وكان

كل ما حد يسمع الإسم يقول هوا احنا ناقصين هجرة

وطبعا كانت اكتر حاجة تضايقنى وانا صغيرة ان حد ينطق اسمى غلط يعنى يقول هاجر بكسر الجييم

كنت بضايق اوى وتقريبا كان معظم الناس و انا فى الحضانة بينطقوا اسمى غلط

ومن الحضانة لحد لحد ابتدائى كان المدرسة كلها عارفانى عشان انا كنت الوحيده هاجر

ولحد اولى ثانوى كنت ببقى الوحيده هاجر فى المدرسة كلها لحد ما فجأة حصل هجوم فى الإسم

لحد ما ماشية من كام يوم لقيت محل موبايلات اسمه هاجر تخيلوا .

وانا بصراحة عمرى ماتخيلت اسمى حاجة تانية غير هاجر بس الحاجة الوحيدة الى كانت بضايقنى انى كنت

ببقى دايما فى اخر القايمة وببقى بعيد دايما فى اخر لجنة فى الإمتحانات

اما اسم سيرين بقى فكان من اختيار مشترك من باباها وانا وخالتها واختارناه من بين كذا اسم انا كنت مختارهم

وانا لما كنت بختار الأسامى كان نفسى اسمى اسم اسلامى وف نفس الوقت غريب بس

بس كنت كل ماجيب ما جيب اسم كانوا يقولوا تقيل

لحد ماولدت وسميت سيرين بعد ما اتولدت

واللطيف برضه ان الإسم برضه غريب زى اسمى زمان

وبرضه فى مكتب الصحة فاكرينها اوى لانهم بيقولوا الإسم دا اول مرة يجيلهم وغريب وجميل

طبعا مش اسم بنوتى حبيبتى

بابها لما كان بيسجلها هناك كانوا فاكرينها برضه شيرين ونسى يحط التلات نقط

وقالهم لاااااااااااء سيرين نوووووووووووت شيرين

والإسم ليه اكتر من معنى

يقال ان الإسم فارسى وهى المرأة الجميلة والمرأة ذات الشان العظيم لدى كسرى

ويقال ايضا انه قبطى او مصرى

وكان لأخت السيدة ماريا القبطية وأم عبد الرحمن بن حسان بن ثابت

اى انها كانت زوجة سيدنا حسان بن ثابت شاعر الرسول

والكلام دا جبته من احدى خريجات الازهر وبحثت عنه ع النت واتأكدت منه.

ويارب المرة تكن اخر مرة ابعت فيها الرد دا بقى

اشوفكم سووون

ام سيرين