قررنا ان نعلـــــــــــــــــــــن الحرب ...!؟

بقلم ganna nour من جروب عفة امتنا...
انا فعلا قررت ادخل الحرب وايه الغريب في كده. مهو مش حينفع افضل واقفه
وساكته وراضيه باللي بيحصل ده. حد حيقولي انتي بنت مش حينفع تحاربي...
حقولهم الحرب اللي حدخلها مالهاش علاقه بولد وبنت.. ليها علاقه بانسان
تعبان من اللي بيحصل له ..عاوز يكون ليه كلمه ومبدأ .. عاوز يقول انه مش
ضعيف ولا هين وانه يقدر يواجه ويحارب ويرجع حقه.

طب الحرب دي حتكون ضد مين..
دي مش حرب ضد امريكا و لا اسرائيل ولا حرب
فيها دبابات وطيارات ومدافع.. لا دي حرب من نوع تاني خالص.. علشان ندخل
حرب مع اعداء زي اللي قلناهم دول لازم نكون قدها وعلشان نكون قدها بجد
لازم ندخل الحرب الاولي اللي قررت ادخلها دي

من غير ما نقول كلام ملخبط ولا حاجه ..دي حرب ضد كل شئ بيبعدنا عن ربنا..
حرب لتحرير الانسان اللي جوانا من انه يخضع لغير الله او يطيع غير الله
أويخاف او يعمل حساب لغير الله.
بس علشان ندخل الحرب دي لازم نعرف اولا مين اعدائنا اللي حنحاربهم وايه هدفهم مننا بالظبط وعاوزين يوصلونا لايه؟

يااااااااه حنلاقي الاعداء دول كتير قوي...معني كده ان الحرب مش سهله؟ اكيد .. بس برده احنا اسلحتنا مش سهله..
تعالوا نوضح اكتر ايه المقصود من الكلام ده

مره اتسألت سؤال مهم جدا بجد
الانسان وهو في طريقه لربنا وفي حياته بيلاقي اعداء كتير قوي .. النفس(طبعا نقصد الاماره بالسوء)- الهوي- الدنيا- وأكييييد الشيطان.
كل دول اعدائنا وكل دول واقفين في طريقنا لربنا؟ اه فعلا كل دول ضدنا
السؤال هو : طب نحارب مين فيهم الاول؟ والاجابه اللي وصلتلها.. مش مهم نبدأ بمين .. حنحاربهم كلهم في نفس الوقت.!

طب وده ينفع .. كلهم اعداء شرسين ومفيش فيهم عدو سهل
صح ..بس علشان نعرف نقف ضد اي عدو لازم نعرف هو بيحاربنا ليه وهدفه بإيه بالظبط؟
لو فكرنا شويه حنلاقي ان كل الاعداء دول ليهم هدف واحد هو انهم يبعدونا عن
ربنا .. يقفوا بيننا وبينه ويرجعونا عن الطريق اللي احنا ماشيين فيه..

طب وبيعملوا كده ازاي؟
بإنهم يوجهونا ناحيه الغلط (علي اختلاف نوع الغلط اللي بنعمله) طبعا حسب
درجه ايمان كل واحد..المهم والهدف اللي عاوزين يحققوه هو اننا نغلط ..
لامش بس كده نغلط وننسي نصلح الغلط ده وننسي الباب اللي ربنا فتحهولنا
اللي اسمه التوبه اللي بتقولك تعالي امسح الغلط ده في اي وقت الباب مفتوح
ولسه ليك فرصه تانيه.

عاوزينا كمان نبعد خطوه بخطوه واحنا في غفله ومش واخدين بالنا.. ندي ضهرنا
للطريق وننسي هدفنا وننسي كنا ريحين فين واتخلقنا ليه اصلا في الدنيا..
يعني من الاخر غلط ورا غلط ورا غلط لغايه ما نضيع خالص.

طب معني كده اننا طالما فهمنا الهدف وعرفنا انهم كلهم متفقين عليه (بس
طبعا بينفذوه بوسائلهم المختلفه) يبقي الحل بسيط ونبقي فهمنا خطتنا في
الحرب حتكون ايه؟
الخطه باختصار جدا ... نرفض الغلط.. طبعا الغلط اللي نقصده هو اي شئ ضد
الشرع .. اي شئ يبعدنا عن ربنا ويقف في طريقنا.. مش حتفرق معانا مصدره
ايه؟
ولا مهم نقول ياتري دي نفسي ولا الشيطان ولا ولا.. المهم انا حكون ضد
الغلط وبجد حدخل الحرب.

طبعا حد حيقول يعني ايه مش حنغلط تاني خلاص؟
لاطبعا اكيد حنغلط لان كلنا
بشر مش معصومين.. انما مش حنستسلم للغلط ده ولا حنرضي بيه "كل بني ادم
خطاء وخير الخطائين التوابون".. حنقول لأ .. حنتوب ونرجع نمشي تاني في
طريقنا.. مش حنسيب نفسنا لاعدائنا يبعدونا ويشغلونا ولا حنستسلم ليهم .

طيب هل احنا فعلا نقدر نقف ضد كل دول؟ وايه اسلحتنا اللي حنحاربهم بيها؟
اكيد حنقدر نقف ضد كل دول وغيرهم كمان لان معانا افضل قائد وموجه وكمان اسلحه مش حيقدروا يقفوا قدامها ولا ينتصروا عليها .

قائدنا هو النبي عليه الصلاه والسلام سيد المرسلين اللي حط لنا الخطه
ووجهنا في كل افعالنا بسنته ودلنا علي الطريق اللي نمشي فيه "تركت فيكم ما
ان تمسكتم به لن تضلوا بعدي ابدا .. كتاب الله وسنتي"

طب والاسلحه اللي حتكون معانا..
- عارفين طياراتنا حتكون ايه؟ مش طياره نفاثه لا اف16 ولا الكلام ده..
طيارتنا اسرع من أي حاجه.. اسرع من الصوت والضوء وعابرات القارات.. دي
طياره من نوع تاني بمجرد انطلاقها توصل وتصيب هدفها بس.. تكون صادقه... هي
الدعاء .. الدعاء ان ربنا يثبتنا ويعيننا علي اعدائنا دول ويهدينا لطريقه
ويحفظنا من الغفلة والبعد عنه.. دعوه في جوف الليل بصدق واخلاص
سؤل الحسن البصري" كم بيننا وبين عرش الرحمن قال.. دعوه صادقه"

- عارفين ايه الرادار اللي حيوجهنا في الطريق .. القراّن .. هو الهدي
والنور والدليل اللي حيفكرنا بطريقنا وهدفنا ودورنا في الدنيا واللي لما
نفهمه صح حنعرف مراد الله مننا ونعرف ازاي نعبده ونستعين بيه صح.
وفيه رادار كمان ربنا حطه جوانا .. هو الفطره اللي في قلب المؤمن اللي
بتخليه يرفض الغلط ويحس بعدم الراحه وعدم الامان وهو بيعمله "البر حسن
الخلق.. والاثم ما حاك في صدرك وكرهت ان يطلع عليه الناس" والفطره دي اللي
لو سليمه بإذن الله بتفوقنا وترجعنا لطريقنا الصح.

عارفين ايه الدرع اللي حيحمينا في الحرب دي:
إيمان واخلاص ويقين في الله انه حيساعدنا بس لو استعنا بيه ولجئنا ليه
بصدق وانه سبحان لو اخلصنا ليه واعتصمنا بيه حيهدينا ويدلنا .. "ومن يعتصم
بالله فقد هدي الي صراط مستقيم". وده اللي بنطلبه منه سبحانه في كل صلاة
انه يهدينا ويوجها للطريق المستقيم.
عندنا كمان اكبر حمايه لينا من كل الاعداء دول وهي ذكر الله اللي بيهدينا
ويخلي ربنا سبحانه وتعالي معانا وبيحفظنا من السوء بس يكون عندنا حسن ظن
بالله وثقه في نصره وتأييده لينا "أنا عند ظن عبدي بي وانا معه اذا ذكرني"

دي بس نماذج بيسطه ولو فكرنا كمان شويه حنلاقي اسلحه كتير قوي ربنا اداهالنا ودلنا عليها وقالنا استعملوها واهزموا بيها اعدائكم دول.
يعني كل المطلوب مننا اننا نكون مؤمنين بجد ..متوكلين علي الله بصدق وهو
سبحانه وتعالي تكفل بالدفاع عن المؤمنين "ان الله يدافع عن الذين امنوا"
تخيل بقي لو ربنا اللي بيدافع عنك .. تفتكر كده ممكن حد من الاعداء دول او غيرهم يقدر عليك؟

بس دلوقتي فيه شرط لازم نقوله للي عاوز يدخل الحرب دي ..ايه هو؟
اللي ناوي الحرب بجد لازم يكون عنده اراده قويه.. تصميم واصرار.. أمل وصبر.. تفاؤل وتوكل
ممكن حد فينا يخسر جوله ... بس لو مفيش اراده ومجاهده وصبر واصرار نبقي
خسرنا الحرب كلها..اعدائنا مش بيسكتوا ولابيملوا .. وهما مش اقوي مننا لان
معانا القوي..الوكيل ..القدير..الملك سبحانه وتعالي

ربنا طلب مننا نصبروقال "ان الله مع الصابرين" ونتوكل عليه وقال "وتوكل
علي الحي الذي لايموت" ونجاهد في الله وقال "والذين جاهدوا فينا لنهدينهم
سبلنا" وكمان وعد ان ينصرنا لوعملنا كل ده وقال سبحانه "وكان حقا علينا
نصر المؤمنين"
قررنا ان نعلـــــــــــــــــــــن الحرب ...!؟ 742981

قررنا ان نعلـــــــــــــــــــــن الحرب ...!؟ 742981

اسمحولي بس في الأخر اقتبس جمله بيقولوها في التليفزيون مع شويه تعديل..
بيقولوا في هيئه السكه الحديد " المصري اللي علي حق يقول للغلط لأ"
خلينا نعدلها ونقول "المسلم اللي علي حق.. يقول للغلط لأ"
قررنا ان نعلـــــــــــــــــــــن الحرب ...!؟ 202753

قررنا ان نعلـــــــــــــــــــــن الحرب ...!؟ 202753

دلوقتي بقي مين حيقول معايا مستعد ادخل الحرب؟

ربنا طلب مننا نصبروقال "ان الله مع الصابرين" ونتوكل عليه وقال "وتوكل
علي الحي الذي لايموت" ونجاهد في الله وقال "والذين جاهدوا فينا لنهدينهم
سبلنا" وكمان وعد ان ينصرنا لوعملنا كل ده وقال سبحانه "وكان حقا علينا
نصر المؤمنين"

دلوقتي بقي مين حيقول معايا مستعد ادخل الحرب؟

أنا طبعا معاكى وشكرا على التوبيك الرائع

الله يكرمكم يارب ...
واحنا بنجاهد عشان نقوى في الحرب دي ...
الله يثبتنا واياكم