بدايتي مع العمل الخير :)

بسم الله

السلام عليكم ورحمه الله وبركاته

بصراحه انا كنت داخله المنتدي اكتب موضوع تاني خالص

بس مش عارفه ليه حبيت احكي قصتي المحدوده مع العمل الخيري

جايز قصتي تفيد بردوا بدايتي مع العمل الخير :) 742981

الخير ف الامه الي قيام الساعه كما اخبرنا رسول الله صلي الله عليه وسلم

انا وصحابي كنا عاوزين نعمل خير لكن مكناش نعرف نعمل ايه ولا نسوي ايه

لغايه لما جت الفرصه

عن طريق منتدي لكليتنا دخله شاب من شباب الخير

عرفنا ع حاجه اسمها شنطه الخير أكيد كلنا عارفينها طبعا

بس انا هعرفكم عليها فيما بعد علشان كلنا نشارك فيها ومشروعها يكبر باذن الله

ومن يومها واحنا بنعمل الشنط دي

الشاب ده كان ف جروب بدايه الغني عن التعريف طبعا

ومنه اتعرفت ع جروب انا كمان عاوز اعمل خير

اللي منه وصلت لشباب الخير في المنصوره

وسبحان الله معظم صحابي الغاليين ع قلبي جدا هما زملاء ليا ف العمل الخيري

**نيجي بقي للمشكله اللي هتكلم عنها واللي ساعات بتضايقني وبتخليني احس ان في ناس بتشتغل لاسم جروبها مش لعمل الخير :::

في جروبات كتير اعرفها ف المنصوره واشتركت فيها بالفعل كان ليها نشاط جبااااااار جدا

لكنها اختفت ف ظروف غامضه

لانشغال اصحابها وبالتالي خلفت من ورائهم اسر ضاعت

لانها كانت معتمده ع الجروبات دي اعتماد كامل

ف الماكل والعلاج والتعليم وغيره

ليه الجروبات دي اختفت؟؟

تفسيري الوحيد للموضوع انهم يمكن كانوا غير مخلصين النيه

والله هو الغني عن العالمين وعن الشرك معه ف كل الاعمال

يبقي لازم ياجماااااعه

ناخد بالنا

من

النيه والاخلاص لله

لاننا مش بنعمل الخير علشان الخير يتسمي باسمنا او بالجروب اللي شغاليين معاه

لا احنا بنعمل الخير لوجه الله وحده

والاحاديث والايات ف فضل العمل الخيري لاتنتهي

_____________

فاتمني بجد وبطلب من القائمين ع الجروب شباب الخير والمنتدي ::

ان يتم التنظيم بين جروبات الخير علشان كلنا نكمل بعض ونستمر في عمل الخير مدي الحياه

ونخلف العمل الخيري للاجيال اللي بعدنا وننشره ع قدر المستطاع

____________

وجزاكم الله خيرا :)

اهلا بيكى يا مها

وبالمناسبه موضوع بعتبره من اهم الموضيع على المنتدى على فكره ومهم وحيوى وبناااااااااااااااااااااااااااااااااشد كل الناس تخش وتقول رايها بجد

لان المشكله دى اتكلمت فيها كتير فى اماكن كتيره وجعيمات خيريه كيتر

لييييييييييييييييييييييييييييييييييييه يا ترى جروبات وجميعات واماكن كتيره الا من رحم ربى مش حبين يتعلموا مع حد

ليه تلاقى جميعه عم عباس مش حبه تتعامل مع جميعه عم كامل
ليه جميعه ارحمنا يارب مش حبه تتعامل مع توكلنا على الله
ليه جروب المفروض انه هدفه خير مش عايز يدور الا على نفسه بس وعلى اعضائه

ليييييييه بجد وده يمكن قضيه اثرتها كتير

وحابب اعرف رايكم قبل ما اقول رايى فى الموضوع ده

سلام الله عليكم ورحمته وبركاته
موضوع خطير جدا
ومهم جدا
وعلى فكرة أنا من أشد المعارضين لكثرة الجمعيات الخيرية والجروبات الخيرية وما شابه ذلك
زمان كان فيه كيان واحد بس اسمه بيت مال المسلمين
أيامه كان البيت ده مش لاقي فقراء يعطيهم من أمواله
كانت العملية منظمة وماشية تمام
دلوقتي للأسف
بتلاقي حالات كتيرة جدا بتاخد من الجمعية دي والجروب ده والشخص الفلاني والجمعية الفلانية
وناس تانية متعففة لا تجد مصدر واحد يعطيها زكاة المال ولا الصدقات التي تسد احتياجها من الطعام والملبس والدواء
أصبحت مهنة لبعض المتسولين
أصبحت حالات كثيرة تعيش في نعيم والأخرى لا تجد لقمة العيش
لا يوجد أي تنسيق بين الجمعيات وبعضها
على أقل تقدير يمكن تقسيم المناطق جغرافيا وتختص كل جمعية أو مؤسسة خيرية برعاية تلك المنطقة
لا يحدث هذا ولن يحدث طالما وجد الرياء والنفاق في العمل الخيري
أصبح كل اهتمامنا ينصب في إظهار اسم الجمعية أو المؤسسة أو الحزب على المعونات أكثر من اهتمامنا بالبحث عن المستحقين ومدى اكتفاؤهم من الغذاء والملبس والدواء
الحل من وجهة نظري أن تندمج كل الجمعيات الخيرية والمؤسسات الخيريات المنوطة بالعمل الخيري والتطوعي وكل فاعلي الخير ومحبيه في كيان واحد ضخم وقوي يدعم بمنظومة معلومات عن كل الفقراء وغير القادرين ويستمد معلوماته من كل الجهات حكومية كانت ومتمثلة في وزارة التضامن الاجتماعي أو غير حكومية
وتكون وظيفة هذا الكيان هو مساعدة الفقراء لتوفير الغذاء والملبس والدواء وتشغيل أبناء هؤلاء الغير قادرين بإقامة المشروعات حتى يصبحوا قادرين على الكسب والعيش بدون تلك المساعدات
الفكرة بالنسبة لي حلم أتمناه على الأقل يجب حدوثه في كل محافظة أو مدينة أو قرية
وترتبط كل الفروع بشبكة واحدة من المعلومات حتى نتمكن من القضاء على ظاهرة التسول التي تحدث الآن وحتى نتمكن من توزيع التبرعات بشكل عادل على جميع الغير قادرين
فأنا أثق تماما من أن هناك فقراء لم تصل إليهم يد العون
وآخرون يعيشون في نعيم ويتواكلون على تلك المساعدات بالرغم من أنهم قادرون على العمل والكسب
الموضوع كبير ويحتاج إلى وقفة حازمة وجريئة
اختلاف الأراء وحب الإدارة والظهور لدى البعض تفسد هذه الوقفة
أقترح أن يتم إنشاء هيئة عليا تعمل على ادماج تلك الجمعيات والمؤسسات الخيرية وتكون كلها فروع لكيان واحد تحت اسم واحد يتم اقتراحه
طولت عليكم بس بجد الموضوع يستحق أكثر من ذلك
وأشكر صاحبة الموضوع على الطرح الجيد له
وسلام الله عليكم ورحمته وبركاته

كلامك بجد مهم يا مصطفى وانا نفسى استفد منه

بس قولى يا درش هيا الناش خايفه تقول رايها ولا ايه

هل دى السلبيه فى حل المشاكل ام كسل ام ضعف النت

ام ماذا

انا حابب بجد الكل يقعد هنا ويقول رايه فى موووضوع العمل الفردى وموضوع ان كل جميعه او جروب حابب يشتغل لوحده ومع نفسه وممنوع الاقتراب من الغير لييييييييييه

هل ده حال المسلمين خلاص كل واحد فى دنيا لوحده

سبحان الله

بجد موضوع مهم جدا

واعتقد ان حضراتكوا قلتوا الكلام المفيد اللى اكيد كلنا بنفكر فيه وحابيين نقوله

بس افكرك بكلمه انت قلتها قبل كدا يا حسام وهى ان فى ناس بتحب المظاهر ...... اكيد طبعا فاكر الكلمه دى

يعنى فى مجموعه تحب ان الجروب بتاعها دايما هوا اللى فى المقدمه غيرا كدا لو عضو من الجروب دا فكر يشترك فى جروب تانيه لانه حابب الشغل فيه وشايف انه يقدر يعمل اكتر من عمل فى اكتر من جروب ممكن يواجه هجوم جامد من الجروب دا ليه ؟؟؟؟؟

لانهم بيبقوا شايفين ان الناس عارفين انك تبع جروب الفلانى فما ينفعش تظهرى مع الجروب التانى

وكاننا نجوم سينما ليلى علوى بشتغل فى فيلم مع المخرج وحيد سيف يبقى ماينفعش انى اظهر فى نفس الوقت مع المخرج خالد يوسف ....... بحس ان الامر كدا وكان الشخص دا مضى معاهم عقد احتقار

للاسف دى ظاهرة بترجع صاحبها لورا عمرها ماهطلعه لقدام لانه دايما باصص تحت رجله يبقى عمرة ماهيتحرك من مكانه

وللاسف الشديد فى ناس بتفكر كدا وماعلينا غير اننا نقول ربنا يهديهم

احنا جميعا هدفنا عمل الخير ليس الا ....... لكن مش هدفنا نبقى تبع حد او تحت اسم حد

وده كلامك بردو طلعت منه بمعلومه بجد والله

وكاننا مضين عقد احتكار امممممم ده بردو معلومه

حابب بردو الكل يقول رايه بصراحه شديده

وبالمناسبه نداء للمخضرم محمد عبد الحميد اعتقد هيكون لديه راى كويس فى الموضوع ده لانه اقدم مننا فى العمل التطوعى

وبردو علشان نضمن عليه

انته فيييييييييييييييييييييييين يا م/ محمد عبد الحميد

» شنـــط الخير يا أهل الخير
» العمل الخفى
» اعلان هام لكل شباب الخير
» عروض اى تك و ورشة العمل 2 احجز مكانك...!!؟2010
» النية والاختلاط بين الشباب والبنات في العمل التطوعي الجماعي