متخليش العمر يسرقك كله هناك! طيب هنعيش إزاي ,البلد دي زي غيرها !

من شوية كان فيه برنامج في التليفزيون

بيتكلم عن الهجرة للخارج

اتكلم مع شباب كتيرة

ناس كتيرة,كانوا موافقين على الفكرة,من الشباب

وأنا بقول,وفيها إيه يعني

كل الناس خلاص بقت بتسافر

عاوزين يعيشوا,

حتى لما بقول بلدي,في يوم زميلتي كلمتني عن فرصة شغل برة مصر,لقيت نفسي فعلا فكرت,ممكن أسافر؟!! هو كلام بس ولا إيه ؟!!

لحد ما المذيع,سأل,شخص,هو كبير في السن

مش كبير قوي

بس يعني,يمكن حاجة وأربعين سنة أو خمسين سنة

ساعتها,قال للمذيع,إنه مش بيفضل أبدا فكرة السفر,وقال, في الغربة,متخليش العمر يسرقك كله هناك !!

..

ساعتها,افتكرت اتنين من قرايبي

يعني,فعلا,حسيت إن الغربة أخدتهم,وسرقت عمرهم

يعني,أخويا أهو,سافر يشتغل برة,وسنة ورا سنة,قربنا على عشرين سنة,وهو برة مصر

كون هناك عيلة

شيء كويس

بس بقت,بلده هناك

شغله وحياته هناك

وصعب خلاص,يستقر في مصر دلوقتي

لو جه هنا,أهو زيارات

وعارفة إن ده,صعب جدا,على والدي,خايف العمر يعدي,وفي كل لحظة,عاوز يطمن عليه,وأهو,عاوزه في مصر,جنبه في بلد واحدة,بس علشان,يطمن عليه وعلى عيلته

بس,أهو

الغربة,والحياة هناك,بقت حياته,

...

تاني حد,حد تاني قريبي

حسيت برضه,إن الغربة سرقته

من أحسن الناس فعلا

بس علشان الدراسة,والجامعة,

كان المفروض,تكون زوجته هنا,وولادها

وأهو,يمكن عدت في الغربة في بلد عربي,حوالي 25 سنة,يسافر ويجي,علشان أولاده وزوجته

ولما جه,يستقر في مصر

خلاص,كان كبر في السن :)

قعدوا مع بعض,سنة,سنتين

وماتت زوجته بعد كدة,وكل أخواته

العمر خلاص,كبر بيهم

ساعتها حسيت فعلا,إن الغربة بتسرق العمر

وبرضه,أهو ابنه,سافر,سنة سنتين,وسنة تجر سنة

...

كل حد,بيسافر,وعمره بيتسرق برة فعلا

وبيجي,يلاقي مين

بعد خلاص,ما بيكون نفسه برة

بيجي يلاقي مين

مفيش ؟!!

سنين العمر لما بتعدي,يمكن متستناش حد

وصعب جدا,على حد,يكون من دمك ولحمك,فعلا,إنك متبقاش جنبه

بشوفها فعلا في ناس كتيرة,أب أو أم,فعلا بيشتاقوا لأولادهم يكونوا معاهم

ناس كتيرة قوي من قرايبي

بقيت بحس,إنهم,شنطة سفر

لسة جاية في أجازة

لازم تترتب تاني,علشان تسافر

رايحة جاية,ويقولوا,أهو,علشان ولادنا,وعلشان نعرف نعيش

.....

أنا كمان,لو جت لي الفرصة,حاسة إني هسافر

حياتي !!

ساعات بحس,إننا,فعلا,فينا جزء من الأنانية,أو يمكن,أنانيين تماما

مش عارفة

هو طموح,ولا أنانية

ولا,لازم نسعى,ونتغرب فعلا !!

عارفة إن إحنا,مش بنبالي قوي بأهلنا,يوم ما ناخد قرار يخصنا في حياتنا,المهم,إنه,هيسعدنا,ويحقق لنا,إلي بنتمناه

وبرضه,بنقول,أهو ظروف الحياة صعبة !!

يمكن,كذا حاجة كدة دخلت في بعض :)

....

ودلوقتي,

بيقولوا,فيه أزمة اقتصادية

وناس كتيرة

بقى صعب إنهم يشتغلوا برة مصر

وناس كتيرة,لازم يجوا دلوقتي

ويعيشوا هنا بقى,ده الوقت

انا معرفش كل ده,ومش فاهمة قوي,مش فاهمة قوي فعلا !!

.............

كل ده,ملخبطني تماما !!

فخلونا في الموضوع

انت,عندك استعداد فعلا,تسافر برة مصر ؟!!

مش شايف,إن فعلا,هتسافر

سنة,مش هتقضي,ولا سنتين

لو فكرت,تتغرب علشان أحوالك المادية تبقى أحسن

عمر ما سنة,هتكفيك طبعا :)

هتفكر في أهلك,وغربتك عنهم

يا ترى,علشانهم,ولا علشان نفسك ؟!!

ولا الأحوال دلوقتي,أحسن كتير :)

وناس كتيرة,مش بتسافر :)

ولا لسة,لو حد,جت له الفرصة,يسافر برة مصر,يسافر,,

وأهله,,يبعد عنهم

وولاده,يعيشوا برة مصر,يمكن يجوا,ميحبوش بلدهم قوي

...

شوية لخبطة معلهش :)

...

يعني عموما

الفكرة,فكرت فيها

بتفكروا فيها إزاي ؟!!

السلام عليكم

موضوع جميل اوى يا سما مصر

على فكرة الاسم دة حلو اوى اوى سما مصر وارض مصر

غااااااااااااااااااليين اوى اوى اوى

متخليش العمر يسرقك كلة هناك

ماهو سرق هنا كتير اوى يا سما بس هناك فية فايدة وخبرة

انما هنا هية دائرة وبنلف جواها

وانا لا اعتقد ان مفيش حد مسافر الا وباختيارة لان المسالة دى عاوزة قوة

الغريب بقة اننا كلنا بنبص للسفر ان مضيعة للوقت والعمر

احنا الشعب الوحيد الى بنقول كدة ورغم ذلك فى اكتر من 11 مليون خارج مصر

حكاية الغربة دى كبيرة اوى

بس عاوز اقول ان فية دول كتيرة ناس لا تتخيل ان اهلها بيهجروها

وفى دول وانتى ماشية فيها توشوفى العالم كلة ..تلاقى الفلبنين والهنود والفرس والانجليز وشرق اسيا كلة باختلاف اجناسة والاسبان ورعايا الدول اللاتينية والعرب والقوقاز والافارقة

مع العلم احنا لسنا عرب لان فى اوروبا وامريكا لا يصنفونا بالعرب

لان العرب درجتين درجة اصلية ودرجة غير اصلية فانهم يعتبرون الخليجين هم العرب الاصليين وذلك لغناهم الفاحش وانة لا تجدى خليجى يبحث عن عمل باوروبا او امريكا بل فى شغل او دراسة فى جامعة والغلابة بتوعهم بيدرسوا فى جامعة 6 اكتوبر عندنا

فعندما تجدى هذة التشكيلة الانسانية والتركيبة الغريبة بيحصل نوع من فتح الفم بطريقة بلهاء

لانك وانتى فى مصر كنتى معتقدة ان هوة دة العالم كلة او لما نروح اسكندرية او القاهرة وبنعد نبص على العمارات الشاهقة

دى مشكلة عندنا اننا متعلمناش ازاى نعيش مع الاخر وممكن تلاحظى النقطة دى فى منطقة الاهرامات

فحكاية الهجرة او السفر عند كل العالم عادى جدا

وانا عندى معلومة موثوقة عن دول لن يتخيل احد ان اهلها يهجرونها وهية بريطانيا

لكن اسباب الهجرة هية التى تختلف من دولة لاخرى

فحكاية العمر بيجرى هوة هيجرى هنا وهناك بس هناك هتاخدى حقك وهتاخدى مكانتك لان هناك مفيش كوسة مفيش محسوبية مفيش فرق بين فقير وملياردير بس فى عيوب تانية كتيرة ممكن نتجاوز عنها

والدليل ان فى مصريين كتيرررررررررررررررر اوى برزوا فى العالم بس لما خرجوا

لانهم دخلوا فى دايرة عدل الموازنين الانسانية فخدوا حقهم الى كان اصلا مهدور او الى اكتر من كدة كنتى ممكن تلاقى مديرة اقل علما ودرجة من الشخص دة

عندنا فى مصر المدير مش بيغلط..عندنا فى مصر المدير كلامة عيب تتحاورى معاة

برة مصر الموظف مدير الكلين بوى مدير الكوفى بوى مدير

وبعدين انا مش فاكر نص حديث بيقول فيما معناة ان لما الرزق يضيق بيك فى مكان سيبية وامشى

او لو طالب علم مثلا روحلة اخر الارض ودى مقولة قديمة

وبعدين انا لا اعتقد ان فية واحد من المسافرين اى مكان حابب يرجع الااااااااااا عشان اهلة بس وبلدة

وبيتعب اوى اوى لو قعد اكتر من 30 يوم بس هيعمل اية وخصوصا لما يكون مسئول او وراة زوجة مطيعة وهادية ومش بتتكلم ولا تتطلب ولا بتعكنن علية زى كل الزوجات

المهم

الغربة مرة اوووووووووووووووووووووووووووووووووووووووووووى خصوصا للناس الى ليها ناس فى بلدها مستنياها

ربنا يكرم حضرتك

مانا فكرت,في حكاية العلماء,وطلاب العلم

بس,هما بيروحوا,لو طالب علم

المفروض,يرجع لأهله,صح :)

أعرف,أيوة العالم,برة,له مكانته,وربنا بيكرمه

حظنا بقى :)

بس الموضوع,شكله كبير قوي :)

هما فعلا,مش معتبرينا عرب :D ?!

مرة سألت أخويا

قاللي,محدش يعتبر مأصل,خلاص,بنسبة مية في المية,فكلنا عرب بقى, :D مش عارفة :)

...

الغربة,فعلا مرة,على اللي ليه أهل

مهو,لو مش دكتور زويل مثلا,,

واحد مسافر علشان وظيفة أحسن,ماشي,ومرتب أحسن :)

أي شخص عادي :)

ذنبها إيه,مثلا,بنت,أمها بس اللي تربيها مثلا,علشان أبوها,في دولة من دول الخليج :)

الحمل كله,على الأم :)

والأب لما يرجع يستقر,مهو هتكون,مرت سنين,من عمر ولاده,ومتهيألي والله,على بال,ما يتأقلموا,إنهم هيعيشوا مع بعض بقى,هيعدي وقت,ويمكن تبقى غريبة,مش عارفة..يعني آه,بالنسبة لها,بابا اللي مش موجود على طول,وبيجي في الأجازات,يدلع الأولاد ويفسحهم مثلا,ويسافر تاني,ياخدهم معاه,علشان يجددوا الإقامة

وترجع تاني الام,شايلة مسئولية الأولاد,طول السنة

ذنبها إيه,الأم دي,علشان,شوية فلوس مثلا

...

أخويا والله,أنا مش متصورة,إني,هعيش معاه عادي لو جه

لما بيجي,بحسه,شخص غريب والله,,ده لو كان شافني في الشارع,والله,ما هعرفه ولا يعرفني :) مهو الغربة سرقته,وكل فين وفين,لما بيفكر يجي :)

يمكن,عيب منه,بس,هو شغله كدة :)

وخلاص مثلا,زي غيره

بقت حياته هناك

وأولاده,وزوجته هناك

يعني خلاص,مصر بالنسبة له,بقت ايه :)

مفيش,مهو كل اللي يهمه دلوقتي,يكلم والده,يطمن عليه,كل فين وفين :)

......

طيب,من البداية بقى :)

....

جوز عمتي,الغربة سرقته والله

على بال,ما جه,يفكر يستقر في مصر

كان خلاص,قرب للستين,أو عداها

عمتي الله يرحمها,وأخواته كمان

السن مش كبر :)

الإنسان,بيقضي حياته في الغربة,علشان,يوفر لعيلته,حياة كويسة

وهو مش فيها :)

تاعب نفسه

علشانهم :)

وهو بعيد عنهم :)

علشان دي ظروف الشغل,لأنها,بلد تانية :)

ماشي,نت وإميلات ,جوابات أو تلفونات

زيارات :)

دي بقت,بالنسبة,للإنسان اللي بيشتغل برة

وجوده,في بلده,اسمه,زيارة

....

بقيت بحسهم شنط سفر

مبتلحقش والله تفضي كل اللي فيها

بحسهم جايين بشنطهم,علشان تترتب تاني وتسافر

...........

مهو برضه

لو كل جنسيات الدنيا,سافرت واتغربت

سنين :)

صعب على الأهل :)

...........

مش دراسة,سنة واتنين,تلاتة

مش,حد له مركزه علمي خلاص,وبرضه,أكيد والله,صعبة على اهله لو لسة عايشين,تكون مجيته لبلده,زيارات :)

دي غربة,غربة سنين :)

غربة السنين,إللي تسرق من عمر واحد

بعيد,عن ابوه وامه

زوجته واولاده

اخواته

كتير

وفي الاخر,مش عارفة في الاخر ايه :)

بتكون صعبة ,متهيألي بجد :)

...

المشكلة,بحس أصلا,إن أنا,نفسي,أنانية

ولو جت لي,فرصة أسافر,هسافر للأسف,واشتغل,ومش هفكر فيهم,ويمكن بالسنين,وهيهمني,نفسي وأقول الظروف,إللي تخليني,عاوزة الاكتر,للأسف,حد هيقدر يقول للأكتر لا,أو بس,لسة مش الوقت المناسب :)

بس لما بفكر

أنا بقيت عن نفسي,مستغربة قرايبي,فما بالي بأبويا وأمي :)
أقصد,مستغربة قريبي,لأنه بعيد معرفهوش
فبفكر بقى :)

يمكن,علشان كدة,الراجل العجوز,في البرنامج,هو بس,اللي,فكر,في قد ايه,الغربة بتسرق العمر :)وباقي الشباب,كانوا مؤيدين :)

المشكلة,أنا عن نفسي,بفكر في كل ده,وبرضه,هفكر في نفسي,وممكن أسافر :D

معلهش,لو الإنسان,متناقض في تفكيره,بس,الواحد بيفكر,في المساويء,لما بيشوفها,لكن,زيه زي غيره,زي أي شاب,أو حد تاني حتى كبير,الفلوس بالنسبة له,والعيشة الأحسن,لها بريق كبير برضه,بيحاول يوصل له,بس,مش بيفكر في حاجات تانية كتيرة

إزاي بقى,زي ما بيشوف أهله,وبيشوف قرايبه,وبيشوف العمر اللي بيتسرق من ناس بيضيع في الغربة,وبيشوف كل ده,وبيتعلم,معرفش :) يمكن وجهة نظري متلخبطة وغلط

مش عارفة,فيه ناس برضه في الغربة,الواحد بيفتخر بيهم,إنهم في غربة,وعرب,أصولهم عربية ومسلمين,دي حاجة تانية,صح,انهم بيحققوا حاجة تخلينا نفتخر,مش عارفة

بس,سبحان الله

أهاليهم برضه

بتكون,هاجرت من زمان

مش عارفة

يا ترى بلدنا

هي البلد,إللي بنتولد فيها

ولا البلد

إللي,أصولنا منها

وشكلنا ولوننا ودينا,من أصل البلد دي,دي بلدنا

دايما بتيجى على الجرح يا ايمان
الموضوع ده صعب جدااااااااااااااااااااااااااااااااا
بصى
انا اخويا بيقول يا غربتى وهو بيشتغل فى القاهره وبيجيلنا كل خميس وجمعه
انا مش متخيله لو كان سافر عننا كان هيبقى ايه الحال
الاصعب من كده
مجرد التفكير ان ممكن ربنا يكرمك بحد بس شغله بره مصر
ولازم تسفرى
انا كل مشكلتى اهلى
مقدرش اسبهم وابعد عنهم
فى حين ان ده مش رأيهم
دايما يقولوا لى البنت مكان ما يكون جوزها هى معه
بس مشكلتى ان انا وخويا وبس
ملناش اخوات تانين
اخويا طول فترة الشغل بتاعه وسفره اذا انا خرجت شوية ولا رحت هنا ولا هنا برجع يقعدوا يقولولى سيبنا زى اليتامى لوحدينا كده الكلمة دى بتوجعنى اوى
ممكن بسببها اقعد اسبوع او اكتر منزلش من البيت
غير كده
ان زى ما بيقولوا اصحابى ان احنا مرتبطين ببعض بشكل مش طبيعي
مع انى مش شيفاها بشكل غير طبيعي ولا حاجة
كل الناس ملهيه فى حياتها واحنا الاربعه ملناش الا بعض
فطبيعي نبقى كده وخاصة و احنا يا دوبك ولد وبنت وبس لو كنا اكتر فى العدد يمكن كان يبقى سهل حد يسافر فى اتنين تانين موجودين او ثلاثة
الموضوع ده صعب عليا جدااااااااااااااااااااااااااااااا
اخاف اسيب بابا وماما حد فيهم يتعب واخويا فى شغله وفى سفره ومحدش يساعدهم
اخر مرة كنت بتكلم فى الموضوع ده مع مجدى اخويا زعقلى وقلى مكليش دعوه بابا وماما مسئولين منى
وهسفرهم القاهره معايا واعيشهم معايا
بس بردوا هفضل قلقانه عليهم
وحسه بتقصير من نحيتهم
وده احساس وحش اوىىىىىىىىىىىىىىىىى
عامة انا مقتنعه ان ربنا بيقدر لكل واحد اللى يناسبه واللى يريحه
فربنا يكرمنا جميعا باللى يناسبنا ويريحنا
وربنا يهدينا جميعااااااااااااااااااا

ربنا يخليكم لبعض يارب,ولا يحرمكوش من بعض :)

عندك حق,ربنا بيكتب لك حد إللي فيه الخير,وإللي يريحه,بإذن الله :)

أكتر حاجة,حاساها بتوجعك قوي يا بوسي,أهلك,ربنا يخليهم ليكي ويخليكي ليهم

وبإذن الله,يفرحوا ليكي ولأخوكي,بس,متحسيش بغربة أبدا

» الفصول فى مصر زحمه جدا انما الفصول فى البلد دى فاضيه ليه؟؟؟؟؟؟؟؟؟؟؟؟
» تفسير سورة البلد
» مش ملاحظين ان البلالايكاتكترت اوي في البلد
» هناك فرق
» هناك سؤال محيرني......هل من مجيب؟