| | طلعت فوق السطوح هز الهوا كمي كل البنات اتجوزت وانا قاعده جنب امي العروسه الاولى |  |
|
|
|
| كاتب الموضوع | رسالة |
|---|
????
زائر
 |  موضوع: طلعت فوق السطوح هز الهوا كمي كل البنات اتجوزت وانا قاعده جنب امي العروسه الاولى  السبت يناير 24, 2009 8:51 pm | |
| في الاول هوه المدونه والكتاب دول مشهورين جداااااا
مش عارفه وصلوالكوا ولا لأ انا متابعه الكاتبه ديه من ايام المدونه من حوالي سنتين
لو قريتوه وعارفينه مش هكمل نقل ولو عايزين اكمل اكمل
توضيح
الموضوع ده مش قصه
هوه عباره عن حكايات منفصله بتدور حوالين مشكله منتشره قوي
طبعا عرفتوها من عنوان الموضوع
بس الفرق ان غاده عبد العال اللي هيه الكاتبه
بتتناول المشكله ديه بشكل مختلف
هتعرفوه لما تبدأوا تقرولها
وهيه عامله للكتابات ديه مدونه اسمها
عايزة اتجوز
وهيه مدونه متميزه ودايما من احسن المدونات العربيه
واعرفكو ب غاده هيه صيدلانيه عندها 30 سنه
وهيه بتقول في اول مدونتها
أنا أمثل 15 مليون بنت من سن 25 إلى سن 35 و اللي بيضغط عليهم المجتمع كل يوم عشان يتجوزوا مع انه مش بإديهم انهم لسه قاعدين
طلعت فوق السطوح هز الهوا كمي كل البنات اتجوزت وانا قاعده جنب امي
عدل سابقا من قبل radwa kotb في الإثنين فبراير 09, 2009 12:26 am عدل 3 مرات |
|
 | |
????
زائر
| | موضوع: الاول السبت يناير 24, 2009 8:54 pm | |
| الجزء الاول
أنا أمثل 15 مليون بنت من سن 25 إلى سن 35 و اللي بيضغط عليهم المجتمع كل يوم عشان يتجوزوا مع انه مش بإديهم انهم لسه قاعدين
حلو العنوان كده زي ماكان انور وجدي بيقول فأمير الإنتقام ..أصل الموضوع كله أصلا تحس انه فيلم عربي ..بس اول موضوع ده كان فيلم هندي و كوميدي كمان واحدة صاحبتي كانت لسه متجوزة قريب و كنت لسه حاضرة فرحها من أسبوعين ..أتصلت بيا تطمن عليا يعني ..كنت لسه سامعه خبر ان واحده من أصحابنا جابت عريس لواحدة تانية صاحبتنا برضه ..و ده موضوع يضايق قوي على فكرة ..يعني تفضل الواحده تقول و اشمعنى يعني ماختارتنيش أنا و مش بعيد تقاطعها و ماتكلمهاش تاني أبدا أنا بأه مسكت صاحبتي اللي كانت طالباني في التليفون و قعدت أرصلها ,,شايفة الصحبات ؟..ماطلعش منك انت حاجه زي كده ..أمال مجوزينك ليه؟ مش عشان تشوفيلنا في اصحاب جوزك والا قرايبه حد ينفع ..و كل شوية صاحبتي دي تحاول تقاطعني و تسدني و انا ابدا منطلقه زي الصاروخ ..لحد ماراحت موقفاني بصرخه ..يابت اسكتي بأه جوزي بيسمع م السماعه التانية و عايز يتأكد انك كويسة و رقيقة عشان جايبلك عريس و في لحظه واحده انقلبت طريقة كلامي 180 درجه و بقيت أرق من أرق واحده تعرفوها ...انتي صدقتي دانا كنت بهزر معاكي..انتي عارفاني رقيقة طول عمري ..دانا أرق م البت اللي طالعه جديد دي اللي اسمها منى زكي ..و اسمع صوت جوزها يحاول يكتم ضحكة ع السماعة التانية و هي حساها بتجز على سنانها و هي بتقوللي عارفه عارفه هو انتي هتقوليلي المهم اتفقنا على معاد..و لما اقول اتفقنا على معاد يمكن تعدي ع الرجاله سهلة كده يعني ديتها ايه؟ هيستحمى و هيخلي أمه تغسله القميص و البنطلون و أخته تكويهومله و يشغل كل اللي خلفوه عشان طلعة أهله البهية ..لكن في بيت العروسة اللي هيا المفروض انا ..هيييصة ..غسيل للحيطان ..مسح للأرضية..تنضيف للسجاجيد ..تسييق للسلم..تلميع للكاسات ..تنضيف للستاير و الشبابيك ..و بعد ده كله متوقع من العروسة بعد كل المجهود المقندل ده انها تتزوق و نخش عليهم حلوة و بتبرق ..مفهومه بتبرق دي .. عموما البنات هيفهموا لأنهم عارفين موضوع بتبرق دي بتاخد مجهود أد ايه ... المهم جه المحروس هو و أهله ..هو دكتور على فكرة ..باضرب بطرف عيني كده لقيته لابس لبس ..يا سلاااام ..زي مايكون لم اللي ع الحبل كله و لبسه على بعضه ..و تقريبا كده ماعندهمش مرايا و شكل أمه و أخته عندهم عمى ألوان..البيه لابس قميص أصفر ..بنطلون أزرق ..بلوفر أخضر ..و فوق ده كله كرافته كده الصراحه مش عارفه أحدد بالظبط لونه إيه..لأ و استنوا ..جزمة بني لما اتجعص كده و حط رجل على رجل بصيت لقيت الشراب نبيتي ...آه و الله ..قلت في نفسي مش مشكله بيقولوا الراحل مايعيبوش الا جيبه ..و أهو يبقى عريس تكني كلر زي التلفيزيون الملون ..مشرق كده و مقبل على الحياة...هو صحيح ودانه مخاصمه راسه خالص و سنانه بيحبوا بعضهم جدا لدرجة انهم راكبين فوق بعضيهم ..بس خلقة ربنا يعني ..المهم العقل و الشخصية أول ما بابا دخل راح واقف ..حلو مؤدب يعني و انطلقت امه تعرفه زي مانكون في برنامج..الدكتور سامي ..علاج طبيعي ..قام هو مكمل التقديم و قايل ...و بقلد فنانين....إيه الهبل ده بأااااه ..هو احنا عاملين برنامج مواهب و الا ده جاي يعمل انترفيو في ملهي ليلي..بابا برقله كده و قاله آه أهلا و سهلا اتفضلوا و بص لماما بصه معناها إيه اللي انتوا جايبينه ده؟ أنا قاعده و ماسكه نفسي م الضحك و ده منطلق بيتكلم على صولاته و جولاته في عالم التقليد و احنا قاعدين نبص لبعض و امه شكلها منشكح أوي من كلامه ..و فجأة بص في الساعة و بص لبابا ..بابا خاف ليطلبني دلوقت و هيبقى موقف محرج أول مرة يتعرضله..لكن ده قاله ..عمي ممكن أسألك حضرتك سؤال و تجاوبني بصراحة؟..بابا قاله بخوف كده خير يا بني؟..قاله هو التلفزيون ده شغال ؟..بابا فوجئ كده و قالله آه يابني شغال ..فجأه الحليوة ده راح قايم و فاتح التلفزيون و قعد يقلب في القنوات لحد ما جاب قناه كانت بتزيع ماتش للزمالك..و احنا قاعدين مذهولين و مش قادرين نعمل حاجه و امه قاعده منشكحه زي ما هيا..و هوب و صوته علي ..شوت يا عم ..أيوة كده ..يااااه ..الحكم ده حمار ...واحنا قاعدين ..ماما حبت تحرجوا بالذوق كده و قالتله ..و الله يا دكتور انا مش عارفه انت ازاي بتابع الكورة دي اليومين دول ..ده حتى الزمالك بقاله مده مش كويس خالص الواد فجأة سكت و لف كده لماما بالتصوير البطئ..و عينيه احمرت لدرجة ان ماما كشت في مكانها ..و ده راح رافع صوته ..لاااااا ..بقولك ايييييه ..إلا الزمااالك ..اتكلمي براحتك على أي حد ..على امي على أبويا عليا أنا شخصيا لكن الزمالك لألألأ ..فاهمه ..قومي يا ماما ..أنا لا يمكن أدخل بيت الزمالك بيتهان فيه يابن 60 في 70..أكن احنا معديينلك البلاوي اللي انت لابسها و السخافات اللي عمال تقولها عشان تبقى أخرتها كده ؟....كلنا فضلنا متسمرين مكاننا بابا يبص لماما و مش قادرين حتى يقوموا من مكانهم وانا الأول اتحرق دمي و بعدين وقعت ع الأرض من كتر الضحك..هم يبكي و هم يضحك الجميل بأه ان صاحبتي جايه تاني يوم تسألني على رأيي قولتلها لأ طبعا انتي بتستهبلي ..و حكيتلها ع اللي حصل..لقيتها بتقول طب و ايه يعني؟ عادي ماتبقيش بس تقوليله انك أهلاوية..و لما أصريت ع الرفض..صاحبتي دي قاطعتني و ما رفعتش عليا سماعة التليفون من يوميها ..إزاي يعني أرفض عريس لقطة زي ده؟
صحيح إزاي؟ |
|
| | |
????
زائر
| | موضوع: رد: طلعت فوق السطوح هز الهوا كمي كل البنات اتجوزت وانا قاعده جنب امي العروسه الاولى السبت يناير 24, 2009 11:11 pm | |
| [size=24]هههههههههههههههههه
جميل جدا يا رضوى
استمرى فى عرض المواضيع لانها حلوه وكومديه فعلا وبتحكى واقع ناس كتير بتعيشه
بس انا رأى ان فعلا العريس ده لقطه وفظيع هههههههههههههه
على الاقل عريس بالألوان مش ابيض واسود
وصاحبتها دى هى وجوزها ماعندهمش نظر اساسا بدليل انها شايفه ان كل المشكله فى انه زملكاوى مش اهلاوى
وكمان انا جبت عريس لصاحبتى رفضته قبلته مش قضيتى انا مش هاخد نيشان لما تقبله وتتجوزه وفى نفس الوقت انا لما اجى اجيب عريس لحد لازم اكون متأكده انه انسان كويس ومناسب والا ابقى بحرج نفسى وبحمل نفسى مسؤليه انا مش قدها
حتى هما المفروض اصحاب يعنى تيقى عارفه ذوق صاحبتها
يحمد ربنا انه خرج من البيت سليم من غير دراع مكسور ولا رجل ملووحه ودى كانت اقل حاجه تتعمل معاه بصراحه ده غير قصارى الزرع اللى هاتترمى عليه من البلكونه هو وطنط مامته |
|
| | |
????
زائر
| | موضوع: رد: طلعت فوق السطوح هز الهوا كمي كل البنات اتجوزت وانا قاعده جنب امي العروسه الاولى الأحد يناير 25, 2009 1:17 am | |
| ايوه عارف المدونه دى من زمان غلبانه قوى البنت دى هههههههههههههههههههههههههههه وشكلها كده مش هتتجوز بعد اللى عملته ده اى عريس هيجيلها هيبقى عارف انها فلانة الفلانيه وهى هتعامله على الاساس ده فهيطفش والدليل انها حتى الان لسه متجوزتش اعتقد ان ده كان هدفها الاسمى من انشاء المدونه من غير لف ولا دوران هههههههههههههههههههههههههههههههههههههههههههههههههههههههه الصراحه مش بتابعها ولا بقرأ المواضيع لأن ربنا حمانى من العنوسه فى اى وقت بس اقول يا جواز الاقى طوابير هههههههههههههههههههههههههههههههههه وبعدين ماله العريس الدكتور الدكاتره دول هم صفوة صفوة صفوة اى مجتمع واحسن اختراع فى مصر بعد الكهرباء وحسنى مبارك هما الدكاتره  |
|
| | |
????
زائر
| | موضوع: رد: طلعت فوق السطوح هز الهوا كمي كل البنات اتجوزت وانا قاعده جنب امي العروسه الاولى الأحد يناير 25, 2009 8:39 am | |
| اولا انت معندكش اخوات بنات؟؟؟؟؟؟
ده اكيد اللي خلاك تقول انها غلبانه
ثانيا هدف المدونه ديه مش انها تجيب عريس من وراها
لانها كان ممكن تجيبه اسهل من كده بكتير
وبعدين ايه صفوه ديه ان شاء الله
عدل سابقا من قبل رضوى قطب في الثلاثاء يونيو 02, 2009 10:16 pm عدل 2 مرات |
|
| | |
????
زائر
| | موضوع: رد: طلعت فوق السطوح هز الهوا كمي كل البنات اتجوزت وانا قاعده جنب امي العروسه الاولى الأحد يناير 25, 2009 8:27 pm | |
| بصى يا رضوى
من حقك ترفضى عريس
لكن اللى ارفضه
ان الواحد يشتم انسان مسلم ويوصفه بانه عاهه
مش معنى ان افكار شخص مختلفه مع افكارى يبقى عاهه وانا زى الفل
عندى اخت بنت
واتقدملها تقريبا 3 عرسان بس هى لسه فى الكليه
فى واحد منهم كان مصمم على النقاب بشده
رغم انى مختلف معاه
ومع طريقته
الا ان تليفونه معايا
وحتى الان لسه بكلمه واساعده لو احتاج اجه فى دراسنه الطبيه
مقولتش انه عاهه مستديمه ولا حاجه
ثانيا
انا شايف ان هدفها انها تتجوز
وده مش عيب ولا حرام ولا تهمه
وهى بتعترف انها فى مشكله والا مكانتش عملت المدونه
وطالما فى مشكله
يبقى طبيعى ندور لها على حل
فكرى فى الكلام كويس من غير عصبيه
اما بقى بالنسبه لصفوه المجتمع
مش هقولك بصى على مكتب التنسيق لانه اصلا نظام فاشل مش موجود الا فى مصر
لكن هقولك حاجه واحده
قول الامام الشافعى
لا اجد علما بعد الحالال و الحرام انبل من الطب
اذن
صفوة المجتمع هم رجال الدين والاطباء
ده راى الشافعى مش انا
وممكن برده نعمل اختبار
IQ
مستوى ذكاء
ونشوف كده مين اذكى ناس فى العالم
هيطلع الاطباء فى ملكة الحفظ و المهارات اليدويه
والمهندسين فى ملكة الفهم والابداع
انا بصراحه مش شايف فى المنصوره حد ممكن اسميه صفوه
غير د/محمد غنيم
انتى رايك ايه؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
|
|
| | |
????
زائر
| | موضوع: رد: طلعت فوق السطوح هز الهوا كمي كل البنات اتجوزت وانا قاعده جنب امي العروسه الاولى الأحد يناير 25, 2009 10:08 pm | |
| اولا عندك حق في اول حاجه انا مش من حقي اقول علي حد عاهه تمام
ثانيا انت بتقول دلوقتي ان هدفها ده مش عيب ولا حرام بس فوق كنت بتتريق
وده اللي خلاني اتعصب لاني بجد بحبها جدا
خلي بالك انت بتعصبنا وتوقعنا في الغلط وبعدين تقول خدوا بالكوا
يالله خير
بالنسبه بقه لصفوة المجتمع مافيش حد من حقه يقول على نفسه كده
اه ممكن حد يقول عليك كده
بس مش متهيالي انه من العادي ان اقول علي نفسي كده سيتك ولا ايه
وطبعا طبعا د/ محمد غنيم ده محدش يقدر يقول عليه كلمه
ده راجل بجد كفايه اخر موقف ليه وذهابه لغزه في عز القصف
بصراحه منتهى الشجاعه والرجوله وان شاء الله كمان الاخلاص
|
|
| | |
moustafaabdelrahman
المـديـر العـــام
عدد الرسائل : 436
العمر : 41
تاريخ التسجيل : 10/01/2009
| | موضوع: رد: طلعت فوق السطوح هز الهوا كمي كل البنات اتجوزت وانا قاعده جنب امي العروسه الاولى الإثنين يناير 26, 2009 7:30 am | |
| د/ رضوى قطب
كملي نشرها فأنا أتابعها عن كثب
أنا سمعت عنها قبل كده كانت بتنشر في جروب قديم يجمعنا
بس مكنتش بقرأها
مش عاوز أقولك إنها مفيدة للرجال أد ما هي مفيدة للبنات
عاوزين نعرف تفكير البنات إيه وإيه الحاجات اللي مش بتعجبكم علشان نضحك عليكم بعد كده ومش نعملها
ههههههههه
إسلوبها شيق وكوميدي بالفعل
سؤال بايخ : إيه علاقة طلوعها فوق السطوح والجواز ؟؟؟
د/ رضوى عادل
قلبك أبيض ... قصاري زرع ومن البلكونة مرة واحدة !!!
يا للهول
د/ محمود فريد من نوعه
كلامك صح .. بس إسلوبك مش صح !!
كلنا لنا أخطاء ولابد من تداركها بشكل لائق
لا على الملأ
إسلوب النصيحة يفرق كتير جداً
المهم
ابقى سلملي على صفوة دي اللي بتقول عليها
إنت تعرفها ؟؟؟
عاوزك تسلملي عليها وإنت رايح تستلم التكليف بتاعك
سلملى عليها وإنت بتقبض مرتبك الراااااااااااائع
سلامات يا صفوة
صفوة مين يا حبيبي ؟
أنا وإنت زي كل الناس عارفين كويس أوي إن مش احنا الأطباء اللي يقصدهم الإمام الشافعى رحمه الله
أنا وإنت عارفين إن الطب في مصر مش طب أصلاً
في ناس كتير جداً أميين ويعرفوا كتير عن الطب
دول برضه يبقوا صفوة ؟؟؟
ولا الصفوة اللي أخد شهادة ثانوية عامية مش عامة ودخل بيها كلية الطب استخسار للمجموه بتاعه
وهو أصلاً كان نفسه في حاجة تانية
وكان بيحب حاجة تانية
بس حباً في المظهرة والدكتور جه والدكتور راح
سيدي الفاضل : كلامك إن الدكتور محمد غنيم بس هو اللي من وجهة نظرك من الصفوة يؤكد صحة كلامي
وبالله عليك متنساش تسلملي على صفوة ووردة وفلة !!! | |
|
| | |
????
زائر
| | موضوع: رد: طلعت فوق السطوح هز الهوا كمي كل البنات اتجوزت وانا قاعده جنب امي العروسه الاولى الإثنين يناير 26, 2009 9:21 pm | |
| ههههههههههههههههههههههههههههههههههههههههههههههههه
انا قرأت الموضوع ده برغم ان قرأته قبل كده بس انا مش قرأة كل القصص دى انا منتظره بقيت القصص يا رضوى بجد تحفه تسلمى يارب
بس سؤال بقى رخم
ايه اللى دخل الشباب هنا
مفروض ده مكان لحواء
ده انتم مصريين فعلا
اللى يقول للنساء فقط تلاقى الرجاله جارى فى المكان
واللى يقول للرجال فقط محدش يدخل اصلا ولا بنات ولا رجال
llllllllllllllllllllllllllllooooooooooooooooooooooooooooollllllllllllllll
اعملوا ليكم للرجال فقط واهوه ان حد دخل ولا كتب حاجه فيه
وبعدين يا جماعه ده موضوع لذيذ للضحكه فور فان بلاش بقى نقول كلام ونقفش على بعض به
اه دكتور محمود ياريت انا كمان تسلملى على صفوة اصلها بتوحشنى اوى
هيهيهيهيهيهيهيهيهيهيهيهيهيهيه |
|
| | |
????
زائر
| | موضوع: رد: طلعت فوق السطوح هز الهوا كمي كل البنات اتجوزت وانا قاعده جنب امي العروسه الاولى الإثنين يناير 26, 2009 10:16 pm | |
| دكتور مصطفى
التكليف ده شغلانة العاجز
مرتب الحكومه ده حجة البليد
الحمد لله ولله وحده الفضل كله
انا فى خلال السنه دى فقط حصلت على عشر شهادات فى الطب و الكمبيوتر
بعضهم كلفنى كتير ماديا ووقتيا
واشتغلت فى اكتر من مكان خاص
نظرتك للصفوه على انها صفوه ماديه بس تعكس قصور فكرى شديد
واحباطك ده مضايقنى
منا قولتلك بلاش مصر روح اى دوله اسالهم هناك
شوف مكانة الطبيب ازاى
انا ذكرت د/محمد غنيم
لمكانته وسنه
حضرتك الدكتور كل سنه بيكبر عن اللى قبليها
وبتزيد مكانه مع الزمن
ودى ميزة الطب عن معظم المهن تانيه
ده مش غرور
ده الواقع
ربنا يوفقك وتبعد عن الاحباط والاكتئاب يااااااااااااااااا رب
انسه بوسى
انا وضعت رد عليكى فى موضوع تانى
انا مش داخل هنا عشان المراه
الحمد لله ربنا عفانى من الهيافه
اقرى ردى عليكى فى موضوع د/عماد بتاع القياده
د/رضوى
انا مش بوقعكو فى غلط لا سمح لله
فعلا جايز اسلوبى غريب شويه
وانا متريقتش عليها انا بقول غلبانه
اقصد بالكلمه دى انها فى مشكله وهى نفسها بتعترف بكده
جايز خاننى التعبير
بس كويس انك قلتى انى كلامى صح
شكرا على صراحتك |
|
| | |
????
زائر
| | موضوع: رد: طلعت فوق السطوح هز الهوا كمي كل البنات اتجوزت وانا قاعده جنب امي العروسه الاولى الإثنين يناير 26, 2009 10:36 pm | |
|
عدل سابقا من قبل radwa kotb في الخميس يناير 29, 2009 12:18 am عدل 2 مرات |
|
| | |
moustafaabdelrahman
المـديـر العـــام
عدد الرسائل : 436
العمر : 41
تاريخ التسجيل : 10/01/2009
| | موضوع: رد: طلعت فوق السطوح هز الهوا كمي كل البنات اتجوزت وانا قاعده جنب امي العروسه الاولى الأربعاء يناير 28, 2009 12:45 am | |
| يا دكتور محمود ..
التكليف ده شغلانة العاجز
مين قالك إننا بنعتمد على التكليف بس أو التعيين ؟؟؟
فيه في كلامي ما يدل على ذلك المعنى ؟؟؟
أنا بقول إننا صفوة بأمارة التكليف والبهدلة وبأمارة المرتبات الرائعة
مرتب الحكومه ده حجة البليد !!!
مين قالك إننا برضه بنعتمد على مرتب الحكومة .. وأنا مش فاهم علاقة بليد إيه بالكلام ؟؟؟
إنت مش بتقول إن الأطباء هم صفوة المجتمع ؟؟
وأنا بقولك إن الحكومة بتاعتنا بتعامل كل موظفي الدولة بنفس الفئة المالية
يعني الموظف أو الكاتب أو العامل اللي على الدرجة التالتة بيقبض زي الدكتور اللي على نفس الدرجة !!!
فين التقدير بقى !!!
فين تعبنا !!!
فين فلوسنا اللي صرفناها في الكلية !!!
ياراجل ده أنا مثلاً كنت بصرف أكتر من 8 آلاف جنيه مثلاً فقط على الكلية ومصاريفها وعلاج المرضى فقط
غير مصاريفي أنا الشخصية في آخر سنة على سبيل المثال
انا فى خلال السنه دى فقط حصلت على عشر شهادات فى الطب و الكمبيوتر
الشهادات يا دكتور محمود مش بالعدد
أنا على سبيل المثال كنت مسجل دراسات عليا (دبلوم) في جامعة قناة السويس وبعد ما قبلت فيها وحضرت كام مرة سيبتها لأني مش مقتنع بيها خالص .. حسيت إنها مش هتضيف ليا حاجة غير حتة ورقة ملهاش قيمة بره مصر ولا حتى جوه مصر
الشهادات مش بالعدد
كام شهادة من العشرة دول حاسس إن لها قيمة ؟؟
إذا كان أصلاً شهادة البكالريوس بتاعتك دي مش معترف بيها بره !!
ده حتى الدول العربية المتخلفة بقى عندهم شهادات معادلة علشان تشتغل هناك لازم تجتاز الشهادات دي
نفسي تفحمني وتقولي إن من ضمن الشهادات العشرة دول زمالة بريطانية أو بورد أمريكي أو أسترالي أو كندي أو أي حتى دورة من جهة أوروبية
نظرتك للصفوه على انها صفوه ماديه بس تعكس قصور فكرى شديد
هههههههه قصور فكري شديد !!!
مش هرد عليك
بلاش نضحك على بعض ونشتغل بعض
الأطباء بالخارج هم أعلى دخلاً
وأطباء الأسنان بأمريكا وألمانيا وكل أوروبا رقم 1 دخلاً ومكانة
وأنا مقلتش إن الصفوة هي صفوة مادية فقط
ولكن هي إحدى أنواع التقدير
بس ممكن حضرتك تقولي إيه هي الصفوة من وجهة نظرك ؟
وممكن تقولي حضرتك أو غيرك من الجيل الجديد ده أضاف إيه للطب أو هيضيف إيه له في المستقبل ؟
احنا مجرد ممارسين له فقط
وممارسين له بطريقة مهينة للطب كمان
وعلى فكرة كل كلامي ده مرتبط بالواقع اللي بيحصل في مصر مش بصفة عامة طبعاً
واحباطك ده مضايقنى
مين قالك إني محبط ؟؟
أنا مقيد ولست محبط
حضرتك الدكتور كل سنه بيكبر عن اللى قبليها
وبتزيد مكانه مع الزمن
ودى ميزة الطب عن معظم المهن تانيه
أي مهنة صاحبها بيزيد خبرة كل يوم عن التاني وبيكبر عن اليوم اللي قبليه مش الطبيب بس
بل بالعكس فيه دكاترة لما بتاخد شهرة شغلهم بيسوء وبيتكبروا على العلم والمرضى
والكلام ده عن تجربة والله
عند أشهر دكتور في تخصصه مش هقدر أقول أسماء علشان التشهير .. وطبعاً مش هقولك علاجه غلط بس .. لااااا ده التشخيص كمان غلط
يا دكتور محمود .. مش كل واحد حفظ كلمتين في الثانوية العامية (العامة سابقاً) وراح كتبهم في الورقة والتنسيق وزعه على كلية الطب يبقى صفوة !!
ومش كل واحد دخل كليات الطب ونفس الكلام برضه راح دش كلمتين في الورقة يبقى صفوة !!
ومش كل واحد له واسطة وأبوه دكتور وطلعه الأول عليكم في الكلية يبقى صفوة الصفوة !!
صدقني .. مش احنا الصفوة .. ده كان زمان .. أيام الدكاترة الي بجد
وأخيراً .. ليا طلب عندك ..
ياريت تختار ألفاظ وتعبيرات أحسن من كده شويه في حوارك معانا كلنا مش أنا بس
يعني ملوش لزوم كلمة قصور فكري وبليد وعاجز والكلام اللي زي ده
أنا متأكد إن قاموسك اللغوي فيه تعبيرات أحسن من كده شويه !!
ومتنساش تسلملي على صفوة ... | |
|
| | |
????
زائر
| | موضوع: رد: طلعت فوق السطوح هز الهوا كمي كل البنات اتجوزت وانا قاعده جنب امي العروسه الاولى الأربعاء يناير 28, 2009 4:06 am | |
| - moustafaabdelrahman كتب:
يا دكتور محمود .
ايوه يا باشا معاك
باذن الله ده اخر رد ليا على المنتدى.
التكليف ده شغلانة العاجز
مين قالك إننا بنعتمد على التكليف بس أو التعيين ؟؟؟
فيه في كلامي ما يدل على ذلك المعنى ؟؟؟
أنا بقول إننا صفوة بأمارة التكليف والبهدلة وبأمارة المرتبات الرائعة
ليه بتقول بهدله حاليا التكليف باذن الله هيكون اقليمى يعنى محدش هيسافر كتير
وقلنا المرتبات دى عيب نظام فاشل مش عيب فينا
مرتب الحكومه ده حجة البليد !!!
مين قالك إننا برضه بنعتمد على مرتب الحكومة .. وأنا مش فاهم علاقة بليد إيه بالكلام ؟؟؟
إنت مش بتقول إن الأطباء هم صفوة المجتمع ؟؟
وأنا بقولك إن الحكومة بتاعتنا بتعامل كل موظفي الدولة بنفس الفئة المالية
يعني الموظف أو الكاتب أو العامل اللي على الدرجة التالتة بيقبض زي الدكتور اللي على نفس الدرجة !!!
فين التقدير بقى !!!
فين تعبنا !!!
فين فلوسنا اللي صرفناها في الكلية !!!
ياراجل ده أنا مثلاً كنت بصرف أكتر من 8 آلاف جنيه مثلاً فقط على الكلية ومصاريفها وعلاج المرضى فقط
غير مصاريفي أنا الشخصية في آخر سنة على سبيل المثال
منا بقولك نظام فاشل
وهيجيله وقت ويتصلح
والبشاير هلت
حاتم الجبلى مصمم ان معاتش فيه حاجه اسمها مستشفى بتخسر
يعنى زمن العلاج المجانى للجميع انتهى
وهيكون فيه نظام تامين صحى شااااااااااامل زى كل دول العالم
يعنى انت تكشف و شغلك يدفع
والمستشفى الحكومى تكسب
وهكذا
اما الفقراء فليهم نسبه معينه مش زى دلوقتى انا وانت نروح نكشف ببلاش ونزاحم الفقير فى حقه
انا فى خلال السنه دى فقط حصلت على عشر شهادات فى الطب و الكمبيوتر
الشهادات يا دكتور محمود مش بالعدد
أنا على سبيل المثال كنت مسجل دراسات عليا (دبلوم) في جامعة قناة السويس وبعد ما قبلت فيها وحضرت كام مرة سيبتها لأني مش مقتنع بيها خالص .. حسيت إنها مش هتضيف ليا حاجة غير حتة ورقة ملهاش قيمة بره مصر ولا حتى جوه مصر
الشهادات مش بالعدد
كام شهادة من العشرة دول حاسس إن لها قيمة ؟؟
إذا كان أصلاً شهادة البكالريوس بتاعتك دي مش معترف بيها بره !!
ده حتى الدول العربية المتخلفة بقى عندهم شهادات معادلة علشان تشتغل هناك لازم تجتاز الشهادات دي
نفسي تفحمني وتقولي إن من ضمن الشهادات العشرة دول زمالة بريطانية أو بورد أمريكي أو أسترالي أو كندي أو أي حتى دورة من جهة أوروبية
الحمد لله
معايا دبلومه بريطانيه
وناوى ادخل امتحان الزماله بعون الله
ومعظم شهاداتى اضافه للسى فى
واستفدت منها
مفيش حاجه اسمها ورق يا باشا
طالما اتعلمت واستفدت تبقى كسبت
وهتفرق فى ملفك بره مصر عن اى واحد تانى ملفه فاضى
وعشان بكالوريوسى ملوش قيمه فانا بحاول ارفعه بالشهادات
شفت بقى ان كلامك متناقض؟؟؟؟؟؟؟
نظرتك للصفوه على انها صفوه ماديه بس تعكس قصور فكرى شديد
هههههههه قصور فكري شديد !!!
مش هرد عليك
بلاش نضحك على بعض ونشتغل بعض
الأطباء بالخارج هم أعلى دخلاً
وأطباء الأسنان بأمريكا وألمانيا وكل أوروبا رقم 1 دخلاً ومكانة
وأنا مقلتش إن الصفوة هي صفوة مادية فقط
ولكن هي إحدى أنواع التقدير
بس ممكن حضرتك تقولي إيه هي الصفوة من وجهة نظرك ؟
وممكن تقولي حضرتك أو غيرك من الجيل الجديد ده أضاف إيه للطب أو هيضيف إيه له في المستقبل ؟
احنا مجرد ممارسين له فقط
وممارسين له بطريقة مهينة للطب كمان
وعلى فكرة كل كلامي ده مرتبط بالواقع اللي بيحصل في مصر مش بصفة عامة طبعاً
كلامك متناقض
بتقول انى مببصش للفلوس
ولما اتكلمت عنهم بره قلت الاعلى دخلا
هههههههههههههههههههههههههههههههههههههههههههههه
هنرجع تانى ونقول
مش معنى ان النظام مش مقدرنى انى انسى نفسى
مش معنى ان المسلمين حاليا درجه تالته انهم ينسو مجدهم
فهمت؟
واحباطك ده مضايقنى
مين قالك إني محبط ؟؟
أنا مقيد ولست محبط
لا محبط
وكاتب عن نفسك وقايل انك مكتئب
والاكتئاب ده نتيجة ايه
نتيجة شعورك بانك مقيد
واكبر قيد فى حياة الانسان
هو الاحباط
حضرتك الدكتور كل سنه بيكبر عن اللى قبليها
وبتزيد مكانه مع الزمن
ودى ميزة الطب عن معظم المهن تانيه
أي مهنة صاحبها بيزيد خبرة كل يوم عن التاني وبيكبر عن اليوم اللي قبليه مش الطبيب بس
بل بالعكس فيه دكاترة لما بتاخد شهرة شغلهم بيسوء وبيتكبروا على العلم والمرضى
والكلام ده عن تجربة والله
عند أشهر دكتور في تخصصه مش هقدر أقول أسماء علشان التشهير .. وطبعاً مش هقولك علاجه غلط بس .. لااااا ده التشخيص كمان غلط
يا دكتور محمود .. مش كل واحد حفظ كلمتين في الثانوية العامية (العامة سابقاً) وراح كتبهم في الورقة والتنسيق وزعه على كلية الطب يبقى صفوة !!
ومش كل واحد دخل كليات الطب ونفس الكلام برضه راح دش كلمتين في الورقة يبقى صفوة !!
ومش كل واحد له واسطة وأبوه دكتور وطلعه الأول عليكم في الكلية يبقى صفوة الصفوة !!
صدقني .. مش احنا الصفوة .. ده كان زمان .. أيام الدكاترة الي بجد
لا برضه انا متمسك برايى
ولعلمك انا ضفت المهندسين
لانى بحترم عقليتهم
سواء مهندس عادى او كمبيوتر
وبقولها تانى
مفيش مهنه فى العالم كله بتتحدث كل دقيقه الا الطب
انت لو عايز ترف جديد فى الطب كل يوم هتعرف
معتقدش ان ده فى بقية المهن بالصوره دى
وسيبك من الدش والحفظ
الشغل هو اللى بيبين الكويس من الوحش مش الامتحانات
وأخيراً .. ليا طلب عندك ..
ياريت تختار ألفاظ وتعبيرات أحسن من كده شويه في حوارك معانا كلنا مش أنا بس
يعني ملوش لزوم كلمة قصور فكري وبليد وعاجز والكلام اللي زي ده
أنا متأكد إن قاموسك اللغوي فيه تعبيرات أحسن من كده شويه !!
هو انا قلت ان انت اللى بليد واعاجز
انا بنقد طريقة التفكير بس
انت عارف انى بعزك وبحترمك
انا مش بوشين يا ادمن
طالما قلتلك فى الشارع انى بحترمك يبقى بحترمك
ومتنساش تسلملي على صفوة
صفوه بتسلم عليك
وعزيزه كمان
تحب ابعتلهم حاجه غير السلام؟؟
... |
|
| | |
????
زائر
| | موضوع: رد: طلعت فوق السطوح هز الهوا كمي كل البنات اتجوزت وانا قاعده جنب امي العروسه الاولى الخميس يناير 29, 2009 12:35 am | |
| خلاااااااااااااااااااااااااااااااااااااااااااااص
كفاااااااااااااااااااااااااااااااايه
خلاص مش هكمل الموضوع ده اللي هيخليكوا تعملوا في بعض كده
انا سألتكوا في الاول اكمل ولا لأ
وانتو مقولتوش لأ بلسانكو ده انتو قولتوها عملي
ربنا يسامحكوا انا مكنتش فاكره انه هيثير الجدل ده
يا جماعه انا هقول حاجه ويا ريت نمشي عليها كلنا وانا اولكوا
بلاش نقف لبعض علي كل كلمه
ونفترض حسن النيه في بعض
ومننساش ايه اللي جمعنا هنا
وطالما المواضيع ديه بيبقي فيها جدل كتيير انا عن نفسي معنتش هفتحها
وهركز في جزء مشاريع الخير
اللي اكيد ان شاء الله هيجمعنا مش هيفرقنا
|
|
| | |
????
زائر
| | موضوع: رد: طلعت فوق السطوح هز الهوا كمي كل البنات اتجوزت وانا قاعده جنب امي العروسه الاولى الخميس يناير 29, 2009 1:15 am | |
| [[نو كومنت بجد
لا تعليييييييييييييييييييييييق
وهكتفى بالقول جزاكى الله خيرا يا رضوى على اخر رد ليكى وربنا يعزك يارب
وربنا يههدى ولاد الحلال لما يحبه ويرضاه ونفوق بقه ونركز احنا عايزين ايه
وهسئل سؤال لكل شخص بيحب الجدل بدون تحديد اسامى نهائى يا ترى يا فلان او يا علان انته صح ولالا ويا ترى الطرف الاخر صح ولالا بردو !!؟ لاسف هنلاقى ان كلنا فى نفس الطريق بس بصين تحت رجلينا اكتر ما بنص قد امنا ..!؟
وحاجه اخيره اتمنى نركز اكتر على الشغل وجزاكم الله خيرا جميعا [/center][/size][/color] |
|
| | |
????
زائر
| | موضوع: رد: طلعت فوق السطوح هز الهوا كمي كل البنات اتجوزت وانا قاعده جنب امي العروسه الاولى الإثنين فبراير 02, 2009 1:34 pm | |
| يا خبر يا خبر يا خبر
ايه ده انا ماشفتش الكلام ده خالص
انتوا بهدلتوا بعض كده ليه هههههههههههه
اتارى دكتور محمود فاتح صفحه جديده وانا كنت فاكراها بسبب حاجه تانيه خاااااااالص
لا يا جماعه كده مش ينفع وبعدين رضوى ذنبها ايه تبوضولها الموضوع بتاعها كده
ممكن تعمل قسم مخصوص للخناقات يا دكتور مصطفى؟؟؟؟؟؟
لا يا رضوى من فضلك كملى الموضوع لانه حلو فعلا وكمان اللى حصل ده ممكن يحصل فى اى موضوع تانى يعنى المشكله مش فى موضوعك المشكله فى اختلاف الاراء ووجهات النظر
وعامة خلاص متهيقلى الموضوع اتحل وهما اتصالحوا وبقوا كويسين مش كده ولا ايه؟؟؟
يلا يا جماعه بوسوا راس بعض انتوا اخوات ماتشمتوش المنتديات التانيه فينا |
|
| | |
moustafaabdelrahman
المـديـر العـــام
عدد الرسائل : 436
العمر : 41
تاريخ التسجيل : 10/01/2009
| |
| | |
????
زائر
| | موضوع: رد: طلعت فوق السطوح هز الهوا كمي كل البنات اتجوزت وانا قاعده جنب امي العروسه الاولى الأربعاء فبراير 04, 2009 1:14 am | |
| بناء على طلب مستعجل من رضوى عادل
هيه بس تؤمر
هنكمل باذن الله
العريس التاني
ما احنا قلنا هنمشيها زي أنور وجدي بأه خلاص
بصوا بأه ..أولا الحكاية دي برضه من فصيلة هم يبكي و هم يضحك ..بس الصراحه يعني الصراحه ..انتوا هتضحكوا عليا أنا..هتشوفوا ..بس بقولكوا ايه بما اني فتاه ركيكة ..قصدي رقيقة رقيقة..و مهيضة الجناح..ههه حلوة مهيضه دي..فبليز بليز ..بلاش تريقة
الحكاية دي مايعرفهاش أي حد غير انا و ماما ..ماحكيتهاش لأي حد من أصحابي ..يعني ابقوا اتفشخروا قدام كل أصحابكم بالأمتياز ده حكاية العريس التاني لبرايد ..إقرا الحادثة ..اقرا الحادثة
احمم..مقدمة...عارفين ايه احساس واحده و هي ماشية في الشارع و تحس ان حد معجب بيها..مش معاكسه يعني و كده ..لأ بيبقى فيه كده كيميا زي مابيقولوا الأجانب ..و على فكرة فيه جوازات كتير بتبدأ كده ...واحد يشوف واحده في الشارع..يمشي وراها ..يعرف ساكنة فين و يسأل عليها و يخطبها ..ابن عمي عمل كده و البت لسعته حتت قلم على وشة ..علم على صداغه 3 أيام ..قام هو اتكيف قوي و قال البت دي واضح انها مؤدبة و متربيةوراح خطبها ..آه و الله..هي صحيح بعد كده اتضح ان ايديها بتطول عليه في كل المواقف مش في الموقف ده بس ..بس و الله الراجل مبسوط و بيحلف باليوم اللي شافها فيه..و بيلعن أبو ...والا بلاش دي في مقام عمتي برضه
المهم أنا يوم نازله من البيت رايحه الشغل..حسيت بكيميا م اللي كنت بقولكم عليها دي ..حسيت ان فيه عين هتخرم قفايا ..اتديرت بسرعه كده في الخباثة لقيتلكم راجل انما ايه ..طول بعرض بارتفاع.ماسك ف ايده شنطة سودا و لابس بدله و كرافته و نضارة شمس....عامل كده زي العيال اللي كانوا بيطلعوا في إعلانات جمعية شباب المستقبل بتاع جمال مبارك "شباب الجيل ..قوام جينا ..هو ..هو" فاكرينهم ؟..المهم الواد كان حليوة و انا قلبي هفهفله أول مالمحته ..استنيت شوية ع المحطه و بعدين جه الميكروباص..ركبت راح راكب ورايا..قلت الشياكه دي كلها هتركب مكروباص ليه يعني..أكيد في الأمر إنا ..و جه كمان قعد جنبي ....يا حلولي يا حلولي..بس كنت خايفه ليعاكس و ساعتها أنا ماعرفش أبويا ..باللي ف رجلي و لايهمني لا شباب المستقبل و لا جمال مبارك ولا حاجه أبدا..بس لاقيته في نص المسافه كده ..بيميل عليا و بيقول باسلوب رزين كده ..لو سمحتي ممكن أسأل حضرتك على حاجه ..وانتوا ماتعرفونيش... باتسطل لما حد يقولي حضرتك ..بس برضه مش سهله يعني..صدرت الوش الخشب و قلتله ..خير بمناسبة ايه ؟...يعني كنت عايز أسأل بس ..هو حضرتك مرتبطه ..واضح انك مش مخطوبة ولا متجوزة مافيش دبل في ايديكي ..بس الإرتباط بأه لازم أتأكد منه من حضرتك ..(حضرتك تاني يا حلولي)..والله الكلام ده مايتقالش في مواصلات و بعدين انا ماعرفكش و مش متعوده أكلم حد ماعرفوش ..طب يعني أنا لو معجب بحضرتك و عندي نيه أتقدم رسمي ..أعمل ايه ..أصلي بصراحه متابعك من مده بس دي أول مرة أتشجع و أحاول أكلمك ..ياحلاوة ياحلاوة متابعني من زمان ..ده واقع بأه..بس برضه على مين ..لازم أثبت ..و الله لو حضرتك متابعني زي مابتقول تبقى عارف بيتي و عارف بابايا ..هو الوحيد اللي ينفع يتكلم في المواضيع دي ..لو سمحت ماتحرجنيش اكتر من كده ..جامده جامده يعني ...الحقيقة انت كده أثبتيلي اني أحسنت الإختيار....ياسلام ياسلام..الله الله ..هو ده الكلام ..لحد كده الأمور كلها صح و مية مية ..صديته آه بس كمان قلتله كلم بابا..سيبتله سكه مفتوحه يعني .
الواد بأه التباع راح شاخط فيا في اللحظه دي ..الأجرة يا أبله والا هتركبواببلاش...يابن اللذينا ..دانا عماله أترسم من ساعتها تبعتر كرامتي كده ؟...جيت أمد ايدي جوه الشنطه لقيتلكوا الأخ بأه راح بسرعه مطلع فلوس و محاسبلي ..لأ مايصحش ..لأ بأه اسمحيلي ..أنا لا يمكن أقبل واحده هاتقدملها تدفع و انا موجود ...وجون وجون وجون ..هيتقدملي خلاص أيوة كده هو انا صحيح ماعرفش هو بيشتغل ايه و الا عايش فين والا بيقلد فنانين والا ايه نظامه بس الجواب بيبان من عنوانه.
أول ما المكروباص وقف لقيته نزل معايا في نفس المحطه و بصلي و قاللي ..أنا حبيت أنقذك يعني في المكروباص ..واضح قوي انك ماعاكيش فلوس...الدم ضرب في نافوخي..وله انت هتتمنظر عليا والا ايه ؟..واضح ان شنطتك فاضية آخر الشهر بأه يالا وفرتلك أجرة المكروباص تنفعك ..بصتله بذهول كده و قلت له ..مين اللي قالك الكلام الفارغ ده ..انا عمري مامشي بشنطتي فيها أقل من 300 جنيه..قالي باستهزاء كده ..لاااااماصدقش..الدم كان خلاص قرب يطلع من نافوخي زي النافورة..رحت مطلعه كل اللي في المحفظه مورياهولي ..أهه حتى شوف 50-100-200-220
لقيته مد ايده اخد الفلوس..و بصلها كده و عدها و قاللي آه صحيح انتي معاكي فلوس أهه
و في لحظه راح مطبقهم و حاطتهم في جيبه ..و قاللي انا هاخليهم معايا بأه سوفينير لحد لما آجيلكم البيت ..ماستوعبتش و قبل ما آخد فرصة أقول كلمه واحده كان راكب ورا واحد على موتوسيكل شكله كده كان ماشي ورا المكروباص و هوا ..فص ملح و داب
أختكوا بأه واقفه في وسط الشارع هابلااااااااااه ..زي اللي اتدلق عليه جردل مايه مش نضيف..مش عارفه أصوت والا أطلع أجري وراه والا ألطم على وشي ...فضلت واقفه يجي خمس دقايق في الشارع مش عارفه اروح فين والعربيات تقعد تزمرلي و لما تلاقيني مسهمة تقريبا اللي سايقين يقولوا في نفسهم دي يا اما طارشه يا اما مجنونة يا اما م اللي بيبيعوا مناديل ..و الناس تعدي تبصلي... و العيال الصغيرة يشدوا في هدوم أهاليهم ..بابا بابا هي الست دي عامله كده ليه؟
بعد شوية كده لفيت و دخلت المستشفى اللي باشتغل فيها ..و على وشي تعبير كده زي تعبير العمده الآلي بتاع زمان ..دخلت الصيدلية..قعدت ع المكتب ..و فجأه .....انفجرت في العياط ..و العيال زمايلي اتلموا حواليا..مالك ..فيه ايه؟...حد زعلك ..حد كلمك؟
من بين العياط و الشحتفه ما اقدرتش أقولهم غير كلمه واحده
.................................................
..................................
..................
اتسرقت
عااااااااااااااا
|
|
| | |
????
زائر
| | موضوع: رد: طلعت فوق السطوح هز الهوا كمي كل البنات اتجوزت وانا قاعده جنب امي العروسه الاولى الأربعاء فبراير 04, 2009 1:51 am | |
|
ههههههههههههههههههههههه
بجد تموت من الضحك
معقوله ده بحقيقى انا مش مصدقه
دى ساذجه جدا
وقال عامله ناصحه ومش عايزه تاخد وتدى فى الكلام معاه
لا فعلا البت دى ملطشه معاها قوى
زمان اصلا النصاب ده اما قرا القصه على المدونه جاله ارتجاج فى المخ من كتر الضحك
وبعدين انا مش عارفه هى حظها عامل كده ليه مره واحد مبهدل ولبسه ماعرفش ماله ومره واحد شيك وحرامى كانت تطلع الاجره ترميها فى وشه وخلاص لازم تعمل فالحه وتطلع كل اللى معاها يعنى
بس على فكره موضوع المظهر ده فعلا فى ناس كتير بتتخدع فيه جدا مع انه بصراحه مهم جدا وبيدى اول انطباع مش بس عند صاحبة الشأن لكن عند الاهل كمان يعنى صحيح هو مش كل حاجه لكن لازم برده الواحد ياخد باله من مظهره مش لازم يبقى شيك قوى يعنى لكن ياخد باله من لبسه وزنه الوان لبسه عشان مش يبقى زى العريس الاولانى كده احسن ده كان صعب قوى
شكرا يا دودو :)
|
|
| | |
????
زائر
| | موضوع: رد: طلعت فوق السطوح هز الهوا كمي كل البنات اتجوزت وانا قاعده جنب امي العروسه الاولى الإثنين فبراير 09, 2009 12:25 am | |
| انا قولت اغير علشان متحسوش بالاضطهاد لا سمح الله
هنغير وتبقى المره ديه العروسه الاولى
فرصة نضيفة
أنا بقى – ولا أعوذ بالله من كلمة أنا – هي يعني كلمة "أنا" عيب ولا إيه ؟!
المهم أنا ليّ تجربة واحدة, وبطلت بعهدها الموضوع ده خالص..زي ماتقولوا كده طلعت من التصفيات
أنا أصلاً لا ليّ في الطور ولا في الطحين..إلا صحيح إيه علاقة الطور بالطحين..ما علينا
يعني من الآخر أصلاً مكبر دماغي من موضوع الجواز ده خالص..عايش بطولي كده مع دماغي وكل علاقاتي مع الجنس الآخر تنحصر في أم علاء مرات البواب..ومدام كريمة موظفة التأمينات الاجتماعية..وخالتي بهية اللي ساكنة في الوراق
غير كده مافيش أي علاقات نسائية غير بقى الزمالات والصداقات, وبيني وبينكم كده كل الصديقات والزميلات - ولا مؤاخذة يعني – شبهي
آخر واحدة حلوة شوفتها في حياتي كانت فاتن حمادة الله يرحمها في فيلم العذراء والطفل الأحمر
المهم كان فيه واحدة صديقة –صداقة بريئة- من زمان, وبنتعامل أنا وهي عادي
وشوية كده حسيت إنها بدأت تتكلم في كلام فارغ وبتسأل أسئلة غبية
وطبعاً العبد لله ردوده أغبى
حاجات من نوعيه
إيه رأيك في البارفان بتاعي ؟
لا والله عندي زكام
بتحس بإيه وإحنا مع بعض ؟
إنتو مين وبتبقوا مع بعض إمتى
!
خلاصة الكلام عشان ماتتخنقوش زي ما هيّ اتخنقت البت جابت من الآخر
وعملِت زي ما قالت المطربة العصماء "أنا هاطلب إيدك بكرة..أنا بجحة قوي على فكرة"
لقيتها بقى بتاعة حب وكلام فاضي..وبتقولي أنها اكتشفت إن أنا بحبها بس مكسوف أصارحها, مش هي اللي بتحبني لأ أنا اللي بحبها, شوفته بجاحة أكتر من كده؟
الخلاصة البت صعبت عليّ وقلت أخطبها بقى وخلاص..والبت مش بطالة يعني وأنا صحيح مابفكرش في الجواز بس كلنا لها في النهاية, وأهو كله بثوابه
اليوم الموعود بقى..ضربت الحتة الكلاسيك الكحلي..ودلقت على نفسي نص إزازة البارفان اللي عندي من ثانية ثانوي..واشتريت طبق حلويات من قويدر بخمسة وتمانين جنيه, وروحت أقابل أبوها
خبطت على الباب وفتحلي أبوها..راجل محترم كده وباين عليه ذوق, دخلنا على الريسبشن حاجة كده عشرين متر في أربعين متر..زي ملعب كرة اليد
بعد السلامات والترحيب والذي منه –كشف الهيئة يعني- دخلنا في الجد على طول
شقتك فين؟
-مش يسأل عندك شقة ولا لأ.. ده الطبيعي عنده إن فيه شقة-
في مدينة نصر سيادتك
فين في مدينة نصر؟
أنا قلت إيه الأسئلة دي..الراجل شغال في التعداد ولا إيه
قصره..نجاوب وخلاص..
في الحي السابع..اوصل حضرتك بس عند موقف عربيات المقطم واسأل عن بسيوني الحلاق..أنا العمارة اللي بعده على طول
عربيتك إيه ؟
خلاص بقى أنا فهمت اللعبة..الراجل حاسس بقيمتي وسائل عني وعارف كويس امكانياتي ومش هيضيع وقتنا في سؤال أنا عندي ولا لأ..المهم الكواليتي
أنا اتجعصت ورديت بفخر..
سيات..بس معالجة للسخونة..وهاجيبلها كاوتش جديد إن شاء الله في عيد العمال الجاي
وطبعاً معاك مبلغ يكفي لمصاريف الجواز
إلا معايا..أنا صحيح مش من نواب القرود..بس مستورة
معاك كام يعني؟
بقولك مستورة يا حاج..وبلاش نفضحها
الراجل اتعدل في قعدته وبدأ يتكلم
بص يابني..إنت شاب مجتهد, والبنت عايزاك..بس لازم عندك نقاط ضعف لازم تعالجها
يا نهار إسود ومنيل! عرف منين ده؟! هوه أنا باين عليّ قوي كده؟!
لسه هاقوله يا عمي أنا بالفعل بدأت أعالجها..
لقيته بيتكلم في موضوع تاني خالص..بيقولي
إنت لازم يبقى معاك على الأقل ربع مليون جنيه في البنك عشان تتجوز بنتي
ليه يا عم؟ هاتجوز سمية القيصر ؟! -ولا باين اسمها سمية الخشاب..الي بيقولوا عليها حلوة..معلش أصل أنا مش متابع الحركة الفنية-
أقولك أنا ليه
تبيع شقتك وتكمل عليها وتجيب شقة في الزمالك أو المهندسين
صدقت أنا ساعتها كلام بنته , قلنا قبل كده صداقة بريئة, اطرد هذه الفكرة القذرة من رأسك يا فتى- وقالتلي يومها إن أبوها مش هايوافق إننا نتجوز هنا وكنت فاكرها بتهزر, إيه يا جماعة؟ هوه أنا ساكن في مزبلة ولا إيه؟
وفرش الشقة يليق بينا..وطبعاً هنشارك معاك في الفرش
–لأ كتّر خيرك الصراحة-
وتجيب شبكة بثلاثين ألف جنيه
والفرح في مش عارف إيه...
و
......
أنا بقى فقدت حاسة السمع ومش مركز معاه, وهوّ قاعد يملي شروطه وأنا الصراحة كل تفكيري في حاجة واحدة
طبق الحلويات أبو خمسة وتمانين جنيه
وفجأة فوقت عليه وهوّ بيقول
وطبعاً تغير عربيتك وتجيبلك عربية نضيفة!
لحد هنا واستوب..كله إلا عربيتي
قال عربية نضيفة قال! انتفضت من مكاني وقلت له..
فرصة نضيفة قوي يافندم..كل شئ قسمة ونصيب
خرجت من عنده وأنا مش شايف قدامي وسايق العربية بسرعة وزي أفلام السينما بقى شريط الذكريات بيجري قدامي
ووقف الشريط عند نقطة مريرة للغاية..لأ يا فالحين طبعاً مش طبق الحلويات أبو خمسة وتمانين جنيه, أنا مش بخيل يعني للدرجة دي..ده أن سامحت فيه خلاص
بس افتكرت إزازة البارفان الميت مللي اللي استعملت منها تلاتين مللي على مدار أربعتاشر سنة.. وضيعت منها خمسين مللي النهاردة
وفجأة يقطع شريط ذكرياتي صوت يصرخ..امشي عِدِل يا بني آدم..أمال لو كنت راكب عربية نضيفة كنت عملت إيه
إمضاء
وائل
قصته و بأسلوبه |
|
| | |
????
زائر
| | موضوع: رد: طلعت فوق السطوح هز الهوا كمي كل البنات اتجوزت وانا قاعده جنب امي العروسه الاولى الإثنين فبراير 09, 2009 10:10 am | |
|
ههههههههههههههه
حلوه قوى يا دودو
بس مين الاخ وائل ده ومين اللى دخله فى المدونه؟
بس دى اول مره اعرف انه ممكن واحد يخطب واحده كده وخلاص من غير ما يكون مقتنع
وكمان انا مش مؤمنه انه فى صداقه بين ولد وينت ولا بريئه حتى لازم طرف من الاتنين يغير مسار العلاقه والدليل اللى حصل ده
يلا ربنا يعوض عليه فى طبق الحلويات ابو خمسه وتمانين جنيه
|
|
| | |
????
زائر
| | موضوع: رد: طلعت فوق السطوح هز الهوا كمي كل البنات اتجوزت وانا قاعده جنب امي العروسه الاولى الثلاثاء فبراير 10, 2009 2:16 am | |
| بصي يا رودي
غاده بتعرض وجهة نظر الطرف الاخر برده
ناس بتبعتلها وهيه بتنشرهالهم
|
|
| | |
????
زائر
| | موضوع: رد: طلعت فوق السطوح هز الهوا كمي كل البنات اتجوزت وانا قاعده جنب امي العروسه الاولى الإثنين مارس 23, 2009 1:04 am | |
| رضوة موضوع روووووووووووعه منتظرين المزيد وعرفت ايه حكايه الصفوة دي ههههههههههههههههههههههههههههههههههه يا دكتور فريد من نوعه هقوم انام بقه في رعايه الله :) |
|
| | |
????
زائر
| | موضوع: رد: طلعت فوق السطوح هز الهوا كمي كل البنات اتجوزت وانا قاعده جنب امي العروسه الاولى الأربعاء مارس 25, 2009 12:09 am | |
| يا مى متقلقيش
الظرفاء كتير وماليين المنتدى
اسالى اى حد وهو يقولك الحكايه
|
|
| | |
????
زائر
| | موضوع: رد: طلعت فوق السطوح هز الهوا كمي كل البنات اتجوزت وانا قاعده جنب امي العروسه الاولى الأربعاء مارس 25, 2009 7:52 pm | |
|
هههههههههههههه
موضوع حلو اوى بجد
كملي يا رودي
انا ف انتظار المزييد العجييب
:D
|
|
| | |
| | طلعت فوق السطوح هز الهوا كمي كل البنات اتجوزت وانا قاعده جنب امي العروسه الاولى | |
|
