فكره تطوير الزيارات عاوزين اراء اعضاء زيارة بلقاس كل واحد يكتب مقترحاته وورق المقترحات بنجمعه في الصيدليه في مقر الجمعية

زائر

انا كنت كاتبه عنوان الموضوع في الاول
فكرة تربيه جيل جديد جيل النهضه
بس حسيت انه كبيييير قوي

هيه فكره صغيره وسهل جدا تنفيذها
بس عاوز ناس كتير تتبناها
الفكره ديه جاتلي من زيارة دار فجر الاسلام في بلقاس
اللي لسه بدأه أروحها بقالي بس أسبوعين
احنا ما شاء الله بنبقي كتير وكلهم شباب وبنات زي الفل
بس اهم حاجه عند الكل اللعب مع الولاد ونأكلهم بس مش هوه ده الاساسي
المرتين اللي روحتهم اه لعبت مع الصغيرين
بس لما جربت اتكلم مع الاكبر لقيت عندهم استعداد يسمعوا وليهم حق برده نسمعهم
دي أطفال مالهاش اب ولا ام مهما كان المسئولين عنهم كويسين
مش هيقدروا يعوضوهم عنة ده
ليه منقولهمش ايه الصح وايه الغلط ليه منقولهمش ان هما لازم يبقوا عارفين هما عايشين ليه
علشان ياكلوا ويشربوا ويكبروا ويتجوزا ويخلفوا ويموتوا ويتنسوا و خلاص
و دورهم في نهضة الامه ديه فين
احنا مشكلتنا الفظيعه اللي الامه العربيه فيها دلوقتي بسبب غياب القائد الصح
والقائد ده علشان يطلع هيبقي نتاج لتربيه جيل كامل تربيه صح
انا نويت ان شاء الله أبدأ بنفسي
بحاجه صغيره وسهله كل مره هحضر حاجه جديده ليهم فيها معنى عاوزه اوصله
وهعرض الموضوع ده علي الباقي علشان الكل يعمل كده
واكيد اكيد في ناس كتير معايا احسن مني في ده
الدار ديه فيها 70حوالي ولد في مدارس
وحوالي 18 صغيرين
لو بس قدرنا نعمل حاجه كويسه للولاد دول ونوجههم صح
ياااااااااااااارب يقدرنا

زائر

فكرة حلوة اوى يا رضوي طبعا كلامك صح مليون فى الميه
كنا بنعمل كده مع مؤسسة البنين لما كنا بنروح كنا برنوح عشان هدف عشان يتكلموا ونسمعهم عشان نفهمهم الصح من الغلط عشان نحبهم بجد ويحبونا مش عشان نأكل ونشرب
يا جماعه ياللى بتروحوا دار فجر الاسلام دوركم اكبر من انكم تلعبوا وتجيبوا فاكهه واكل
دوركم انكم تفهموا الولاد الصحمن الغلط
دوركم انكم تكبروهم على مبدأ
دوركم انكم تحفظوهم قرآن
حديث صغير
دعاء
اذكار
دوركم اكبر من انكم تحضروا الزيارة
انا معاكى يا رضوي هساعدك فى كل مرة تعطيهم ايه
بس ياريت تقوليلى الاعمار ايه بالضبط عشان اجيب اللى يناسب ليهم
سواء كانت حدوته ممكن تفهميهم عن طريقها هدف او سلوك صح
بس انا لاسف مش هقدر احضر الزيارة لظروف خاصه بى
فحاول اساعدك وانتى بقى ربنا يوفقك ان شاء الله
وياريت الناس اللى برتوح الزيارة يبقى عندهم نفس الاستعداد
وربنا يبارك فيكم وتقدروا تعملوا هدف كبير وسامى

زائر

ربنا يكرمك يا بوسي وان شاء الله هقولك علي الافكار اللي في دماغي بس انا لسه بحضر
فيها كمان كام يوم كده هقولهالك واخد رأيك ان شاء الله
والمره الجايه في الزياره ان شاء الله هتكلم مع الكل باذن الله

زائر

السلام عليكم و رحمة الله و بركاته

انتى فتحتى موضوع كبير قوى قوى قوى قوى

ومش هقولك ان فى كل اجتماع زيارات الموضوع ده بيتفتح

خليكى معايا فى الكلام ده وعذرا للاطاله

اولا

انا من مدمنى زيارة بلقاس

وكنت مسئول الزياره دى بس سبتها بعد اول اسبوع لانى مش فاضى ومش عايز اشيل مسئؤليه مش هقدر اسد فيها

ثانيا

كان فيه اقتراحات كتيره للموضوع ده

زمان جيل الزيارات الاول كان بيحفظ العيال اذكار الصباح والمساء و بيعلمهم الصلاه و بيديهم كتيبات دينيه وقصص دينيه للاطفال

اللى حصل ان عددنا مش مكفى

واللى زاد وغطى ان اى عضو جديد بييجى جرى على الحضانه

مش عايز اقولك اخر اجتماع حصل فيه خلاف كبير جدا و طبعا ساهمت انا فيه بصوتى الهادى و اسلوبى الرقيق جدا هههههههههههههههههههههههههههه

مما ادى الى تنظيم الزيارات بنظام جديد يقضى ان المتطوعين يقعدو مع الكبار مده طويله والحضانه اخر نص ساعه

محدش بيلتزم

وناس بقت تيجى فى مواعيد تانيه

المشكله الاكبر ان حتى الناس اللى كملت مع الكبار بدات تركز او تختار طفل او طفلين

وللاسف معذورين

لان عددنا قليل

وفى عيال بتديك استجابه

والباقى لا

فغصب عنك بتعمل حاجه زى اللى قال عليها دارون الاهبل

النشوء و الارتقاء

البقاء للطفل الافضل

والباقى طز بقى يدخل دبلوم يطلع بلطجى مش مهم

احكيلك امثله كتير

انا مثلا فصلى اولى اعدادى

طبعا احنا اتفقنا مع البنات تاخد ابتدائى لان بصراحه معاتش ينفع الا كده

بعانى معاهم اشد المعاناه

كل همهم هات الموبايل العب بيه طيب تعال نشوف فيلم ع الجهاز ولا نتفرج على الوصله

اصلا دخول الوصله الهباب الطين دى غلط كبير

كلمت مدير الدار يا عم الحاج الوصله اصلا حرام وبتجيب حاجات مش كويسه

اشغل وقتهم باى حاجه فيها علم وثقافه

هشيلها وبعدين يرجعها تانى

العيال بدات تكبر و تتصاحب على ناس من بلقاس

وتخرج بالليل معاهم باذن المدير

طب وبعدين

حاجه تانيه

ليلة امتحان العربى صدفت انها جمعه

رحت قاعد وقلتلهم مفيش لعب فيه مراجعه اقعدو اما اسمعلكو

اصلا اتنين تلاته من ال11 رفضو الفكره وقعدو فى جنب

وعندهم استعداد ينضربو بالعصايه عادى جدا بس مش هنراجع معاك

والباقى بصراحه ميح ميييييييييييييييييييح

واحد مش عارف الفرق بين المبتدا و المفعول به

انا مش بهزر على فكره

واحد بيقولى نفسى ادخل الدبلوم

طبعا اللى اقصى طموحه دبلوم ده اصلا مبينجحش فيه

والتانى عايز يطلع سواق توكتوك ومنبهر بالسواقين

وطبعا مدارس حكومه والكل بيغش و بينجح

اتنين بس او تلاته اللى فيهم الرمق وقعدو يحلو معايا

اقسم بالله واحد فى اعدادى مش عارف يضرب 9فى 7

بالنسبه للصغيرين
هما اصلا زهقو من القصص الدينيه

حافظين قصص الانبياء والاذكار

وبيطلعو يصلو العصر

اه فكرتينى حتى الكبار مبقوش يصلو العصر فى الجامع

بس محدش فاهمه تفكيرهم

انا مش هدعى الذكاء

بس ال حد ما عارف ليه

العيال دى فى مرحلة مراهقه و نضوج عايز يحس بالاختلاف

وانا صغير كنت عيل و بصلى بالعافيه فى الطابور

دلوقتى بقيت راجل ومش عيل

لما حد بيقولهم يا حبيبى او يطبطب عليه بيتجنن

لما بقولهم مثلا انت بقيت راجل ولازم تعمل كذا

بلاقى عينيه بتلمع ويبدا يركز

كل المراهقين كده

ربنا يحفظه و يكرمه احمد خلف فاهم الحته دى كويس قوى قوى

بس لوحده تقريبا

انا هقول رايى الشخصى

العيال ى عشان نحميهم من الضياع

ده لو عايزين يعنى

لازم نعاملهم زينا

نحط فى دماغهم فكره وهدف

نجيبهم معنا المنصوره

نضمهم لرساله

الناس دى ممكن تعمل رسالة بلقاس

انا مش هنسى منصور

ده المفروض المعلم او كبير فصل اولى اعدادى بتاعى

بيضرب العيال لانه طويل

بعد ما قعدت معاه مده جالى وقالى عايزك على جنب

انا عايز انضم لرساله اعمل ايه؟؟؟؟؟؟؟

كلمت مسئولى الزيارات العامه وطبا ولا حياة لمن تنادى

المهم قلتله استنى اما تطلع بطاقه عشان تبقى رسمى

اى حاجه تخليه يصبر

ليه مناخدش الكبار قوافل معانا او حتى يشيلى شنطه او اى عمل رمزى

ليه منجبلهمش افلام وثائقيه وبرامج تسجيليه او حتى عمرو خالد

بدل الافلام والجيمز

طبعا انا كلام على الفاضى لانى مش ضامن اصلا هكمل فى الزيارات ولا لا بسبب المشغوليات

بس بجد الصغيرين دول محتاجين حاجات وافكار جديده غير الاذكار و القصص

اما بقى الحضانه

فحكايتهم حكايه

قلنا يا جماعه قيسو مستوى ذكاء العيال دى وهاتولهم حاجات ولعب تنمى مستوى ذكائهم بفلوس الاكل و الشرب

مفيش اقتناع

الوحيد اللى عمل كده متطوع مع طفل اسمه فارس راح بيه مستشفى الجامعه

وطلع مستوى ذكائه زى اطفال التوحد تمام

انا مقدرش اعمل كل حاجه لوحدى

كل اللى قدرنا عليه احمد حلمى جاب دكتور اطافال وكشف ع العيال

وطبعا النتيجه كما توقعتها تماما

سوء تغذيه محترم مع ضعف نمو عظام لمعظم العيال

ودى نتيجة البست و الهوهوز الامريكانى و الشيوكولاته

نصيحه يا رضوى

ابداى مع اواى وتانيه ابتدائى

انتى وجروب عشان متناميش زى ما كله بينام

كل الناس اشتكت زيك

وبعدين بعد شهر اتحولو الى ترس فى نفس الاله

اله الاكل و الشرب و الهشتكه

انا لا اعفى نفسى من الخطا

وتحت امرك لو عايزه تنسقى معايا فى اى مشروع او فكره

واوعدك هوصلها للجمعيه ونحاول كمان نشتغل فيها

ومعايا ناس برده هتساعد باذن الله

فى انتظار افكارك

د/محمود فريد

زائر

مبسوطه اني لقيت حد متحمس كده للفكره ربنا يكرمك يا د/محمود
انا فعلا المره اللي فاتت قعدت مع ولاد معظمهم اولى وتانيه ابتدائي
واتكلمت معاهم في حاجات انا نفسي معرفتهاش الا متاخر الحاجات اللي انا قولتها في اول مشاركه
انك لازم يبقي ليك هدف في حياتك واحنا مش مخلوقين كده علشان ناكل ونشرب ونموت من غير ما نعمل حاجه زي ما انت قولت تمام يبقي فيه في دماغهم هدف زي رساله بس نفهم الاول ليه
ومتهيالي الموضوع ده مش محتاج الواحد يركز بس مع واحد ولا اتنين ده ممكن نتكلم فيه مع عدد
انا اخر مره كنت قاعده مع حوالي 15 طفل
ومتهيالي كانوا بيسمعوا
هوه صحيح غصب عنهم لان المسؤله عنهم كانت قاعده معانا رعب يعني
بس كانوا بيتجاوبوا
انا اساسا استمتعت معاهم اكتر من الحضانه بكتير
لكن موضوع المزاكره ده اكيد صعب اننا نعمله في زياره هوه عايز وقت اكتر بكتير
لكن لما نكلمهم اكيد هنقول انهم لازم يبقوا اشخاص ناجحه في المجتمع ده وعلشان كده لازم يذاكروا
وان شاء الله هعرض الموضوع علي سمر اننا نقسم الولاد تقسيمات كبيره علشان منحتاجش متطوعين كتير وربنا يكرم ان شاء الله

واستاذ عمرو بصراحه دروسه في المواضيع ديه تحفه
في سلسله ليه حلوه قوووووي شيقه ومفيده جدا
اللي هيه قصص الانبياء كانت في رمضان سنه من السنين
ومختلفه علي فكره متهيالي مش هيبقوا فاهمينها كده ولا ايه؟؟
ميزه استاذ عمرو انه بيربط كل دروسه بحياتنا وبمواقف فيها
ان شاء الله هسمع السلسله ديه وهحاول ابسط فيها على اد ما اقدر
واتكلم فيها مع الولاد
ده بس اللي في دماغي دلوقتي
لو حد عنده كلام تاني ياريت يفيدنا

زائر

الله على التفاعل الجميل ده يله يا شباب ورنا الهمه عايز الزياره دى من اجمل الزيارت يا ابطال ..

زائر

وعندي فكره تانيه

فكرة يوم في رساله

غشاها منك يا د/ محمود علي فكره
حتة انهم يشتغلوا معانا في رساله
وديه هتبقي عاوزه شباب اكتر
ومش دلوقتي ادام شويه بعد ما نحبب الولاد في ده
على اساس اننا ان شاء الله كلنا هنبدأ نكلم الولاد
ولو حتى مش كلنا لو هتبدأ حضرتك مع مجموعتك
وانا ان شاء الله مع مجموعه
وهنوعدهم بده لمانحس فيهم فعلا انهم عاوزين يعملوا حاجه
ونعمل اسبوع كده في وسط الشهر اللي هوه بيبقي فيه شغل جامد
الشنط الشهريه تكييسها وتوزيعها وتوزيع الدوا ويروحوا لحالات يوصلوا ويشتغلوا
ده هيبقي درس كبير قوي يتعلموا منه الايجابيه
اكيد مش هيبقي عدد كبير في الاول
وتبقي زي مسابقه مين فيهم هييجي المره ديه

ايه رأيكوا ممكن يعني ولا صعبه ولا ايه؟؟؟؟

زائر

رضوى حبيبتى معلش هطلب منك طلب صغير لما تبقى فاضيه فى يوم اتصلى بى على البيت ضرورى ده رقم واحد
رقم اتنين يا جماعه الاطفال الدول اتعملنا مع الاصعب منهم ومش هيبقوا اصعب من اطفال مؤسسة البنين
انا هبقى اقولكم بالتفصيل عملنا ايه
وعلى فكرة يا دكتور محمود خلف فاهم عشان كان معانا فى المؤسسة لحظه بلحظه وكان مسئول عن الزيارة فى الفترة الاخيرة
وان شاء الله نساعد فى الزيارة دى باللى نقدر عليه كلنا
ربنا يوفقنا جميعا

زائر

بوسى

اطفال بلقاس

تختلف اختلاف كااااااااااااااااااامل عن مؤسسة البنين

المؤسسه انتى بتشوفى تقريبا نموذج واحد ومهمتك اصلاحه

وهو نموذج المراهق مشروع البلطجى

انما بلقاس طبعا لا

فى هناك عيال لو اتسابت للشارع دلوقتى تموت من الجوع اصلا

وفى عيال كويسه وممكن تبقى حاجه

وفئه كده شبه المؤسسه بس على خفيف قوى

بالنسبه لموضوع التكييس يا رضوى

للاسف صعب جدا جدا

لانه محتاج اقتناع و اذن حماده المدير

واما نشوف هيقول ايه؟؟؟؟؟؟؟؟؟؟؟؟؟؟؟؟

زائر

بوسي

ابعتيلي رقمك علي الخاص علشان مش معايا
وبرده لو عندك افكار او حاجات ممكن نستفيد منها انتي جربتيها قبل كده
ياريت تقوليهالنا انتي ما شاء الله عليكي قديمه في رساله وكمان في الزيارات
يعني اكيد هتفيدينا

د/محمود

انا بس بعرض فكره ونحاول ونعمل اللي علينا وخلاص
الكلام ده لو انتوا مقتنعين بيها اساسا
انا عافه اني مش بقول حاجه جديده وبرده مش عن خبره
بس ده برده نتاج زيارتين بس
اكيد كل لما اقابل الولاد دول اكتر ممكن اعرف هما محتاجين ايه
وربنا يكرم ان شاء الله

زائر

دكتور محمود
انا بقول ان احنا اتعاملنا مع اطفال المؤسسة يعنى اصعب بتكتير من اطفال بلقاس
وبعدين تبقى غلطان اوى وانت بتقول انه نموذج واحد
اسأل خلف وهو يقولك
وبعدين بالبديهى كده هو محمود زى بوسي زى مصطفى زى حسام
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
استحاله يبقى حد زى حد او نموذج واحد يا دكتور محمود

رضوى حبيبتى اهلا وسهلا بيكى معلش اتلغبط بينك وبين رضوى طب بيطري افتكرتك هى
هضيفك ان شاء الله وابعتلك رقمى ان شاء الله حبيبتى
وربنا يقدرنا على فعل الخير

زائر

السلام عليكم

انا مبسوط أوي من الموضوع ده
وأتمنى نشوف النتيجة
وأتمنى ميتقاشل ان رسالة بتتهاجم على منتدى شباب المنصورة
وان الناس بتقطع في مسؤلين الزيارة

وأتمنى اني اشارك بحاجة فعالة في الزيارة دي
لأني كرهتها بسبب اننا بنروح منعملش حاجة

مفيش اي برنامج ولا يا شيء
واصلا انا اقترحت على سمر مسؤلة الزيارة الغاء الزيارة
والاجتماع اللي محمود فريد بيتكلم عنه ده من حسن الحظ أني محضروتوش لأ[ني كنت في دمياط يومها
ولو كنت حضرت كنت هعمل مشكلة جامدة وثقلت كل الكلام لسمر واكيد هي مقالتش منه حاجة

ومن النهاية اصلاح زيارة بلقفاس
في تغيير الناس اللي بتروح بلقاس
مش كلهم
بس عدد كبير منهم

والمعنى واضح ي الشمس
وطبعا ده مالوش اي علاقة بمسؤلين الزيارة حاليا او سابقا
لكن كلامي كله ممكن يتلغى في ثانية لو الأستاذة رضوى كملت في مشروعها
لأن تقريبا كلامه هو اللي انا بقله من زمااااان

ودياما كنت أتهم ني كده بهاجم الزيارة
وبهاجم رسالة
وبهاجم مسؤلين الزيارة
وربنا يعلم ما في القلوب

زائر

بسم الله ماشاء الله بجد كلام جميل وجامد جدا واتمنى انو يتحقق مع الاستمرار
وشايفة ناس كتير متحمسة وعندها استعداد انها تنفذ الكلام فعلا طيب يبقى لازم كلنا نتفق على برنامج نمشى علية كل اسبوع مع الولاد كلهم وفعلا نحاول تغيرهم ممكن كل اللى يحب يشارك يكتب اسمو هنا ونحدد يوةم نتقابل فى المقر ونتكلم ونطلع افكار جديدة ونكتبها ونطبقها سوا بأمر الله
وانا اول واحدة ان شاء الله نفسى اساعد
نهال عثمان[b]

زائر

اهلا بيك يا دكتور عماد
ربنا يسهل ونعرف نعمل حاجه دعواتك معانا وياريت مساعداتك
ان شاء الله مش هيتقال اننا بنهاجم حد احنا بس بنفكر بصوت عالي
بالعكس مسئولين الزيارات نفسهم يلاقوا متطوعين عايزين يغيروا ويطوروا
اولهم سمر ربنا يكرمها واللي متاكده انها اول واحده عاوزه تعمل كده
ولو معانا في المنتدى كانت شاركتنا وباذن الله هعرض عليها الافكار ديه في اقرب فرصه
لان رساله مش نظام ولا حكومه علشان اللي ينتقدها او يحاول يغير فيها يبقي غلط
ولا ايه؟؟؟؟؟

زائر

اهلا يا نهال ازيك مش عارفه انتي نهال اللي في دماغي ولا لأ
هوه انتي كنتي في اخر زياه لبلقاس؟؟؟

عامه نورتي الموضوع وعاوزين افكار جدييييده همتك معانا

زائر

[[color=red]size=24]

على فكره ممكن بردو انضم معاكوا بس انا محتاج افهم اكتر الموضوع وباذن الله غالبا هتواجد قريبا معاكوا لفتره فى الزياره لو اقدر اخدم فى اى شىء انا تحت امركوا باذن الله انا يعنى مش اد كده فى الزياره دى لكن اهو هحول اسعدكوا والسلام

وطبعا بجد شىء مفرح لما نشوف الناس دى خايفه على الزياره ويله ربنا معاكوا باذن الله

[/color][/size]

زائر

السلام عليكم

تعقيب بسيط
يا د/ رضوى أوضحلك حاجة بسيطة
انا من عشاق رسالة
ولست مجرد متطوع فيها

أ}من بحق كل شخص في نقد ما يراه من خطأ
ولكن للأسف البعض يأخذ النقد أنه تجريح
او اهانة
او اساءة

وهدفنا جميعا ان رسالة تكبر عشان تساعد ناس أكتر
وتاثر في حياة الأطفال والناس
مش مجرد يارة زي ما حضرتك بنتقزلي بالظبط
يعين انا متفق معاكي في الفكرة تماما

وموضوع تطوير الزيارات جميل
وصدقيني عشان ينجح
لا بد يتقفل هنا ويتناقش في اجحتماع في المقر زي ما قالت نهال

ويبقة هنا زي نشرة عن الزيارة واللي تم الاتفاق عليه مثلا واللي عايز يساهم يشترك من خحلال هنا وبعدها من المقر
وهكذا
وشكرا

زائر

السلام عليكم

وانا ايضا موافق

حددو بس مكان وزمان الاجتماع

محمود فريد

بس من اولها كده انا بتكلم بصراحه مبعرفش اترسم

يعنى استحملو صراحتى واهو كله لمصلحة الزياره والعيال

زائر

السلام عليكم ورحمه الله وبركاته
أ/حسام الهلالي
ربنا يجازيك كل خير ان شاء الله

د/ عماد
حضرتك قلقتني علي فكره
وروحت جررررررري كلمت سمر وحكيتلها كل اقتراحاتنا ورحبت بيها جداااااااا الحمد لله
ومعانا في كل حاجه هنقررها ان شاء الله وهنكلم المتطوعين في كل الافكار ديه وناخد رايهم فيها الزياره اللي جايه ان شاء الله

د/ محمود
احنا محددناش ميعاد اجتماع بس ان شاء الله هنكلم امتطوعين اللي هييجوا الزياره الي جايه ان شاء الله
وربنا يكرم ويوفقنا للخير

زائر

اخر زياره
للاسف كانت صعبه جدااااااااااااااااا
مكانش فيه مواصلات
واخدنا وقت كتير حد ما وصلنا وصلينا
ويعيني عليه دخلت حتة فصل
العيال فيه مش بيدوا الواحد فرصه يقول كلمتين على بعض
كان فيه فيلم بتاع يوسف شاهين ربنا يسامحه بقه
كان شغال في التليفزيون وكانوا هيجرالهم حاجه ويشوفوه
صوتي راح اول نص ساعه معاهم
ربناااا يهديهم يااااااااارب
محدش رضي يعبرني منهم غير اتنين
زي ما د / محمود قال في الاول
المهم قعدت معاهم شويه لحد ما خلصت الحاجات اللي كنت محضراها

وجريت روحت على الفصل بتاع المره اللي فاتت
عيال محترمه ربنا يبارك فيهم
بس ملحقتش اقعد معاهم كتير
متعوضه المرات اللي جايه ان شاء الله
دعواتكوا
وان شاء الله فيه اجتماع قريب جداااااااا
هنظبط فيه الزياره ديه
بس لما الناس بتوع الزياره اللي في القوافل ترجع

زائر

السلام عليكم ورحمه الله وبركاته
فيه اجتماع ان شاء الله
بكره الساعه خمسه في المقر
علشان زياره بلقاس
ياريت اللي هيحضر يتأكد برده من حد من بتوع الزياره
انا هحاول اتأكد من الميعاد بكره بدري
وأأكد عيكوا هنا بإذن الله

زائر

ان شاء الله في اجتماع
النهارده الاحد الساعه اربعه العصر
في المقر علشان زياره بلقاس
علشان اللي يحب ييجي
واللي مش هييجي دعواتكوا بقه ربنا يفتحها علينا

زائر

السلام عليكم ورحمه الله وبركاته
في اخر اجتماعاتنا في رساله توصلنا الى اننا باذن الله هنستعين
بحد متخصص يساعدنا ويقولنا احسن طريقه نتعامل بيها مع الاطفال
و بما ان الانترنت معتش سايب فرصه لاي حد يقول اي حاجه
بقالي شويه بدور علي الانترنت على حاجه مناسبه
بس المشكله ان معظم الحاجات نظريه اكتر
واحنا علي ارض الواقع عاوزين امثله
ياااريت اللي عنده وقت يساعدنا
وانا نزلت حاجات كتير بقرأ فيهم دلوقتي وان شاء الله هنزل
اللي اشوفه ممكن يكون مناسب منهم

ساعدووووووووووونا

زائر

ديه الحاجه الوحيده اللي شايفاها قريبه
وفيها امثله حاسه انها كويسه بس عاوز تتقرا كويس وتتفهم
لان المصطلحات اللي فيه مش سهله قوي
بس ديه انسب حاجه قابلتها
يا ريت الناس بتوع زيارة بلقاس اللي معانا في المنتدى
د/محمود و نهال عثمان
يقروها ويقولوا رأيهم
علشان لو عجبتكوا نطبعها ونوزعها علي باقي الناس

وياريت باقي الاعضاء اللي عنده وقت يدور معانا

http://www.4shared.com/get/85767543/241b1d93/___online.html

زائر

وده كتاب اكبر شويه
فيه نفس الكلام بس اوضح واكتر
انا طبعا لسه مقريتوش كله بس اخدت فكره
وشكل الكلام كويس

http://www.4shared.com/account/file/85929913/7f23a031/Asaleeb_Tadeel.html

» عاوزين نحدد معاد زيارة دار العز
» زيارة جامده( زيارة دار المسنين 15-3-2010)
» زياره مهجوره اخرى من الزيارات----------------------------------------
» عاوزين من ابو بلاش
» عاوزين مين ادمن للمنتدى؟؟؟؟؟؟؟؟؟؟