الفرق بين الرجل والمرأه

زائر

لو بصينا لبيوتنا هنلاقي في بيوت فيها مشاكل "مشاكل رهيبه بتهدد استقرار البيت وممكن توصل للانفصال"

وبيوت مفيهاش مشاكل "جايز فيها مشاكل بس بسيطه زي اب عصبي او حاجه خفيفه يعني"

نتيجه البيوت اللي فيها مشاكل :ياما ابناء متعقدين

ياما ابناء مطمئنين :عشان مثلا شايفين ان اهلهم كانوا جواز صالونات اما هي لأ

او مثلا خطيبها بيحبها فعمره ما هيعمل فيها كده

ونتيجه البيوت اللي مفيهاش مشاكل ابناء مطمئنين وحاسين ان الدنيا كويسه

وبعد ما الاجيال دي بتتجوز بنتفاجئ بنتيجه واحده...إن في مشاكل!!! جايز تكون مشاكل بسيطه ، بس في مشاكل

تتوقعوا السبب ايه؟

في ناس بتعتقد ان الرجاله انانيه

وفي ناس تانيه بتقول ان الستات نكديه

وفي ناس بتقول ان الرجاله غير متحملين للمسؤوليه

في الواقع كل الاراء دي غلط

والحقيقه حاجه واحده بس ... عدم التفاهم

مثال: لو عندي طفل رضيع بيعيط فأكلته وعيط تاني فأكلته ، فعيط تالت فأكلته بردو...انا هازهق انه مش راضي يسكت وهاتضايق اني مش عارفه اساعه وهابقي عصبيه ومتوتره جدا وفي نفس الوقت الطفل هيبقي مش طايقني لاني مش عارفه اساعه وكمان مليت بطنه اكل وبطنه وجعته والطفل ده بمنتهي البساطه بيعيط عشان & nbsp; عايز يشرب

مشكله صح؟...مين السبب فيها؟ عدم التفاهم

نرجع للحياه الزوجيه ونضرب المثال ده بقي علي حاجه بتحصل بجد

الزوج رجع من الشغل متضايق لسبب ما ؛ فالزوجه المخلصه راحت تشوفه ماله ودار بينهم الحوار ده

الزوجه :مالك يا حبيبي؟

الزوج: مفيش حاجه...

الزوجه: لأ شكلك متضايق

الزوج يوووه مقلتلك مفيش حاجه ... فين"اي حاجه وليكن الشاي او الغداء" وتبدأ خناقه ويقوم سايب البيت ونازل او داخل الاوضه نايم

***

والزوجه بقي

تكون الزوجه متضايقه فيجي الزوج يقولها : شكلك متضايقه يا حبيبتي ، عامه انا قاعد بره لو احتاجتيني وللا حاجه اندهيلي

ويقعد يتفرج عالتليفزيون او يدخل ينام ، تزعق الزوجه وتقوله انه اناني وانه مبيحباهاش ، وهو ميبقاش فاهم فيه ايه ويقولها انها هي اللي بتطلع ضيقها عليه

***

ايه تفسير اللي حصل ده؟

في اختلاف شاسع بين رد فعل الراجل واحتيجاته اثناء ضيقه وبين رد فعل الست واحتياجاتها اثناء الضيق...

الراجل بيبقي عايز يقعد لوحده يفكر في اللي مضايقه وعايز زوجته تنشغل في اي شئ لحد ما يوصل لحل المشكله ؛ واي تدخل من زوجته اثناء ضيقه بيشوش تفكيره خاصه لو كان التدخل طلبات... ولو التدخل كان عرض للمساعده بيضايقه أكتر لانها مش بس شوشت تفكيره، لأ دي كمان كأنها بتقوله انه مش هيقدر يحل مشكلته لوحده

هو محتاج منها بس انها تكون واثقه من قدرته علي حل مشكلته بنفسه منغير مساعده من أي مخلوق وانها تشغل نفسها بأي حاجه متحسسهوش انها مستنياه عشان ميحسش بضغط

وعشان كده كان رد فعل الزوج في المثال لما كانت متضايقه انه سابها وراح يتفرج عالتلفزيون لان هو ده اللي هي محتاجاه وفاكرها هي كمان زيه

اما الست لما تقع في مشكله بتبقي محتاجه تتكلم مع حد وتطلع مشاعرها وتبكي كمان وعايزة الحد ده بعد ما تخلص كل كلامها يحاول يوصل معاها للحل ويساعدها في تنفيذه كمان

عشان كده رد فعلها في المثال كان كده ...لكن ده خنق الراجل وحمله فوق طاقته...ومش كفايه عليه المشكله، لا ده كمان حملته هم انه يرضيها وميزعلهاش في وقت هو مش قادر يعمل فيه حاجه كل ده بسبب انهم مش فاهمين خصائص بعض

زي ما شفنا من المثال كل واحد "الراجل والست" كان عايز يساعد التاني وهمه انه يسعده لكن سوء فهم طبيعه الاتنين لبعض انتهي بمشكله

هي دي النقطه اللي انا هاركز عليها النهارده في الكلام

الاحتياجات الاساسيه للرجل والمرأه

احتياجات اساسيه بتاعه ايه بالظبط؟؟؟؟

يعني الحاجات اللي لو عملتيها هتعرفي توصّلي مشاعر الحب لزوجك واللي لو معملتيهاش هيحس انه مهمش او مش محبوب رغم انه اهم حاجه في حياتك!!

في 12 حاجه بتعبر عن الحب ، 6 محتاجهم الراجل , 6 تانين خاااالص محتاجاهم الست عشان كل واحد فيهم يعرف ان الطرف التاني بجد بيحبه

طب انا ليه هاقول انهارده حاجات الست كمان؟؟

لسببين :اولا عشان تطلبيهم .. ودي كارثه بيعاني منها الستات

انها مؤمنه تماما ان طالما الراجل مبيعملش الحاجه من نفسه يبقي مبيحبهاش ولو طلبتها تبقي مش محسوبه لانها لما بتحب بتعمل منغير ما تتطلب منها اما الراجل بيعمل الحاجه المطلوبه فقط ولو مطلبتيش فدي ترجمتها عنده انك مكتفيه وفرحانه وفي الاخر يلاقيها انفجرت وزعقت فيحس بالفشل ويحس انها نكديه وقلبها اسود و......

هو ربنا خلقنا كده وخلقهم كده مش معني كده انهم انانيين ، لكن هي دي طبيعتهم/سبحان الله

ثانيا عشان متعمليش الحاجات اللي انتي محتاجاها وتتعبي فيها لان هم مش محتاجينها

بالعكس ممكن يتخنق من حاجات معينه زي ما هنشوف دلوقت مع بعض

زائر

الحاجات الاساسيه للرجل :-

1-الثقه : بالاضافه الي الثقه فيه "زي ما قلنا في المثال اللي فات" ، هو كمان محتاج انك تعرفيه انك واثقه في حبه ليكي وإنه بيبذل قصار جهده عشان يسعدك ...الست بتبقي عارفه ده بس وقت الغضب ممكن في وسط الكلام تقوم قايله كلمه زي"انت اصلا مش حاسس بيا "او "انت اهم حاجه عندك كذا" طبعا كل الدنيا بتتساب وبيتمسك في الكلمه دي ؛ دي مش تفاهه ولا تغيير للموضوع ؛ لكن ده لانك كده حسستيه انه فشل في اهم حاجه بالنسبه له وهي انه يسعدك

2-التقبل : اوعي تحاولي تغيري حاجه فيه لازم تعرفيه وتبروزيله انك متقبلاه كله علي بعضه ؛ ودي حقيقه بتكوني حاسه بيها بس مش متخيله انه لازم يسمعها منك بنفسه او يلاحظها من افعالك ، ازاي؟

في كذا طريقه بس مش هاقدر اقولهم كلهم عشان الوقت..مثلا لو طلبتي منه حاجه معينه واعتذر مش لازم تعمليها خناقه ، قولي له خلا مش مهم ...دي حاجه بتحسسه انه مقبول ومش علاقه مصلحه هي...

3-التقدير : ده عن طريق انك تشكريه علي كل حاجه يعملها ، حتي لو كانت الحاجه دي واجب

مش انتي لو طبختي بيبقي نفسك حد يقولك ان الاكل طعمه حلو وتسلم ايدك؟؟في حاجات اهم بالنسبه لك منها لكن دي اولويه عند الرجل

4-الاعجاب : اثناء الخطوبه بيكون الراجل في افضل حالاته ...عارفه ليه؟ مش غش ولا خداع لكن لان بيكون وصله كويس جدا احساس انه بطل قصه حياتك ... اثناء الزواج بسبب المسؤوليات بيوصله عكس كده ، بيوصله ان ناقص كذا وانه معملش كذا وانك نفسك في كذا وهو مش قادر يعمله ، وان فلان عمل لزوجته كذا وهو لا...

الرجل محتاج اظهار اعجابك بيه...انتي بتكوني فاكره انه فاهم انك معجبه بصفاته لكن هو بمنتهي البساطه مبيشمش علي ظهر ايده ، وكمان انتي لما تبينيله اعجابك بتبدأي تفكري في صفاته الحلوة فبتحبيه اكتر ...والعكس بالعكس

5-الاستحسان : الرضا الشامل عن الرجل ودي بتكون مطلوبه جدا لما يغلط ، بيبقي محتاج يحس انك راضيه بيه كده زي ما هو ...دي هتخليه يحبك جدا جدا جدا ...يعني مصلحه

6-التشجيع : وده بيكون عن طريق التعبير عن ثقتك فيه

لو عايزة تشجعيه يحبك بينيله قد ايه انتي واثقه في حبه ليكي ومحاولة اسعادك ، لو عايزاه يصلح المكنسه بيني له انك واثقه من قدرته عليها ... بس متوصلش للفشر يعني ...حاجات منطقيه، حاجات تكوني فعلا حاسه بيها

قد يكون اللي انا باقوله كلام رخم وصعب بس اللي عايزة بيت مثالي لازم تبذل مجهود مثالي...

نيجي بقي للحاجات الاساسيه للمرأه واتفقت قبل كده انا باقولها ليه :عشان نطلبها وعشان منعملهاش للراجل لانه هو مش محتاجها كأولويات ، لما تعملي له اولوياته ابقي يا ستي زوّدي

1-الاهتمام والرعايه : اعتقد انها مش محتاجه توضيح

2-التفهم : محتاجه حد يسمعها ويتعاطف معاها من غير ابداء حلول ولا كلمات من نوعية "الموضوع مش مستاهل ، او انتي هتقدري تحليها ، الكلمات دي هي اللي الراجل بيكون محتاجها لما يتكلم عن مشكلته فأكيد هي دي اللي هيرد بيها علي زوجته وساعتها هتشيط ...ممكن بمنتهي البساطه تقوله قبل ما تبدأ نقاش انها محتاجاه يسمع وبلاش الكلمات الفلانيه

3-الاحترام : الاعتراف بمشاعرها وبحقها في الاحساس بيها بدون تهميش او استهزاء ...اعتقد مش محتاجه توضيح

4- الاخلاص : ودي بجد حاجه اساسيه اه ، بس انانيه جدا ...الست بتبقي عايزة تحس انها اهم حاجه في حيات الراجل وتعليلها لكده ان هو اهم حاجه في حياتها ، علي فكره هي فعلا بتكون اهم حاجه في حياته بس بتكون محتاجاه يقولها كده بنفسه

5- التصديق : لان غالبا المرأه هي اللي بتتحمل مسؤولية الابناء واحيانا المصروف وان مكنش المصروف في ايديها فبتبقي محتاجه طلبات فمن حاجاتها الاساسيه انها لما تطلب حاجه او لما تبرر حدوث مشكله ان زوجها يصدقها منغير جدل ، ومن اكتر الحاجات اللي تضايقها العجز في التصديق...غير كمان تصديق مشاعر المرأه لان احيانا زوجها بيعتبرها بتعيش الدور او لما تعيط مثلا يقولها دموع التماسيح دي انا فاهمها كويس...

الخلاصه انها محتاجه التصديق وممكن لو حصلت مشكله من النوعيه دي تقول له ان التصديق من حاجاتها الاساسيه او التكذيب من اكتر الحاجات اللي بتزعجها وانه ميكررش كده تاني"بس باسلوب لطيف طبعا"

6- الطمأنينه : ودي من اهم حاجات المرأة برضو انها بتكون محتاجه ان زوجها كل شويه يقولها انه بيحبها

وممكن برضو تطلب كده ...عادي يعني

زي ما قلت في الاول اللي محتاجة بيت مثالي لازم تبذل مجهود مثالي ، وكل ما تعملي اكتر كل ما تكون النتيجه افضل ، وممكن يكون الحب موجود بس المشكله ان الطرفين مش عارفين يوصلوه لبعض ساعتها بيبدأ كل واحد من الطرفين بالتدقيق علي كل كبيره وصغيره وتبقي في مشاكل كتييير هبله لان

زواج يعني حب وحب يعني زواج...منغير احساس بالحب يبقي معدش فيه زواج وبقي مجرد 2 بيحاولوا يستحملوا بعض عشان الاولاد او عشان المظهر الاجتماعي مثلا ياما 2 منفصلين.

ربنا يجعل بيوتنا بيوت سعيده

زائر

مممممممم
حلو الموضوع
حكايه مش سهله خالص على الطرفين
بس لو عاوزين ينجحوا و بيتقوا الله في بعض
اكيد هينجحوا

زائر

انتي بتكوني فاكره انه فاهم انك معجبه بصفاته لكن هو بمنتهي البساطه مبيشمش علي ظهر ايده

معنى كده ان اسعد الناس فى حياتهم الزوجيه هما المدمنين

مبيبطلوش شم على ضهر ايدهم ،

أقدر أقول إن الحاجات دي كلها قابلة للتنفيذ بشرط صدق النية والتوكل على الله
وبرغم المجهود المبذول من الطرفين؛ حينما تتذوق طعم النتائج؛ غالباً ستنسى هذا المجهود والتعب
موضوع مميز ومفيد جداً .. وهو بمثابة إهداء لكل زوجين

زائر

الموضوع ده احسن موضوع فى تاريخ المواضيع من ساعة ما بدات تتكتب

زائر

الموضوع متشابك يرجع للتمايز و الاختلاف بين شخصية الرجل و المرأة... من وجهة نظري الشخصية أن التفاهم بين الزوجين يجب أن يقوم على التنازلات المتبادلة طيلة الحياة بمعنى عدم طرق الحديد و هو ساخن باستثناء الأمور التي لا تتحمل التنازل.... و ايضا يرجع لطبيعة المرأة و الزوج ... هل هي طبيعة عملية أو رومانسية .... أكاد أقسم أن الشخصية العملية لا تليق بالرومانسية اطلاقا من واقع ما شاهدته في حياتي من مشاكل لا حصر لها.... وفقك الله لما فيه الخير و الصواب ... و أهم ما في العلاقة بين الزوجين هو الصبر....

» التكامل بين الرجل والمرأه
» ما الفرق بين الحب والصداقه؟
» الفرق بين الناجح والفاشل
» ماذا يحب الرجل فى المراه؟
» الرجل الأجمل