ع تعملوا ايه فى شم النسيم؟

السلام عليكم ورحمة الله وبركاته
ازيكم يا شباب الخير

ان شاء الله تكونوا كويسين

المهم غدا يوم شم النسيم

وليس عيد

انه يوم مميز فى حياتنا عند بعض الاشخاص

وفى ناس بتاكل فسيخ واحنا الشعب الوحيد اللى بياكله طبعا انفراد

فعايزين نعرف كل واحد من حضراتكوا بيقضى هذا اليوم ؟

فى ناس بيكلوا فسيخ فى الاراضى وفى ناس بيتاكلوا فى البيت

وفى ناس بتقضى يوم عادى خالص من غير فسيخ

ورائحته المميزة وفى ناس بتسافر راس البر مثلا.............

وفى ناس بتلون البيض

انا حبيت نتناقش فى اليوم ده كنوع من التغير

ولكم منى ارق التمنيات

الهدف بجد من التوبيك

ان فى ناس بيتقول الاحتفال بشم النسيم حرام

فانا كتبت الموضوع لنتعرف رايى الاعضاء

وهو ده الهدف الخفى من الموضوع

حلوة الصيغة ديه هههههههههههه

بص انا بصص ليه من باب انه يوم اجازة ويوم الكل مسافر بعيد ده عيد مين والكلام ده كله

يعنى ايه المشكله نخرج بس مش يكون بنيه الاحتفال بعيد مع عيد اخر لان احنا لينا اعيدنا الخاصه الى ربنا كتبها علينا طبعا

ام ايه الى بعمله اليوم ده غالبا كل بنروح وانا وسيادة العميد والولدى وابن عمى بنتغدى فى جمصه
بس فى احتمال نروح راس البر ونقعد هناك لحد بليل باذن الله وبيكون يوم ظريف لانه بيكون يوم عائلى وبنغير جو كلنا

وانا باذن الله هعمل ليهم شندوتشات كرسبى وبرجر ومخلل باذن الله هههه عمايل ايديا طبعا

طبعا انا سامع واحد بيقولى عايز اجى معاكم .... بعينك يا حمادة ههههه

وباذن الله يوم جميل على جميع المصرين

الف شكر يا استاذ حسام على المرور
وربنا يخليك
وان شاء الله تروح وترجع بالسلامة يا رب
هى فعلا جميلة بس طالما عائلية
خلاص بقى
ان شاء الله يكون يوم حلو
ومتنسناش من السندوتشات
انا عايز اعرف بتعمل السندوتشات ازاى بس
بس لازم اجرب ههههههههه

بص يا سيدى
تسمع ان الشيف حسام الهلالى ...!!؟
الى بيجى على قاناة دريم الخضرة ..الساعه 2 وونص بليل بعد الضهر كده

المهم طريقه الخطوات هات ورقه واكتب

علشان تعمل الكرسبى فراخ الحار
1- هتجيب كيس المكرونه وتحطها فى الحله
2-تجيب ربع كيلوا زيت وتحط 56 نقطه على المكرونه .
3-بعددها منتنساش تجيب كيلوا الروز علشان تعرف يعمل كام صابع محشى

بعد ما تخلص هتخش البلكونه تجيب قرص بصله ههه على مزاجك وانته بتجيب البصله هات من عم عبده البقال تحتك بنص جنيه حلاوه بس مش تدفع الفلوس لحد ما تنزله

بس وانته نازل لعم عبده ابقى اديله زجاجه الحاجه السقعه الى انته واخدها منه من 3 اسابيع لانه زعلان منك ..

وانتظرنى بعد الفاصل علشان اشرحلك طريقه عمل الكرسبى الحااااااااااار جدا جدا
هههه
سلام يا غالى

الوصفه دى جميله جدا يا شيف حسام هحاول اجربها ههههههه وطبعا مش هتنسانا فى السندوتشات صح هو احلى حاجه فى اليوم شم النسيم انه اجاز فى اليوم الى فيه كل المحاضرات الدكاتره الرخمه جدا واوحش حاجه هى الفسيخ

طب استنى اجيب ورقة وقلم
تمام خلاص
بس الحاجات ديه كتيرة المهم ع جبها
بس عجبنى 56 نقطة
ما ينفعش 55
المهم انا ع انتظر حضرتك فى قتاة دريم الخضرة
بس ع تاكلنا ايه بكرة علشان اعرف
انا ع اجرب الاكلة ديه
بس امانة عليك الزيارة اللى جاية
تكون ليه فى المستشفى ماشى
ومش مهم تجيبوا معاكم فى الزيارة
الا المحشى علشان اخف بسرعة

ههههههههههههههههههههههههههههههههههههه

ايه يا جدعان حكايه المحشى معاكم هههههههه

على فكره انا كرهت المحشى بسببك يا حسام من كتر كلامك عليه كفايه كده

ها يا شباب هتعملوا ايه بكره باذن الله..........!؟

انا كالعادة نوم صباحا و السهر مساء

بس رحت اكشف علي ضروسي

هئ هئ

ربنا يستر من النهاردة كمان

بمناسبه شم النسيم وبمناسبه فسحه انبارح

حابب اقدم تقرير ان خروجه انبارح لشباب المنتدى

اولا لابد ان اتقدم بخالص الشكر والحب والاحترام لمحافظ المنصورة ....مع العلم انها لا توجد اى مصلحه من وراء هذه الشهاده الا الحب فى الله وذلك على مجهودته وسعيه لانجازات الحقيقية بمحافظه الدقهلية ..

واليكم االتقرير

فى بداية الامر ذهبنا الى جمصه علشان نشوف البلد اخبارها ايه وايه الجديد بيها... وفجائنا بسيادة المحافظ المحترم يتجول على قدمية بتواضع شديد ويتحدث مع منهدسى مجلس المدينة على الخطط الموضوعه لتنفيذها فى اسرع وقت وبجد شوفنا تغير فى حاجات كتيره ملموسة
عجبنى جدااااا تفكيره وادائة ونشاطة ... وكان لابد شكره وده اقل واجب لينا تجاه والراجل كان مبسوط جدا جدا .. واخيرا نتمنى مزيد من الانجازات وربنا يوفقك يا سياده المحافظ

نيجى بقه بعد كده عملنا ايه ..... بعدها نزلنا على راس البر وهناك كنت عمل عمل ايه عجب ههههه عملت شندتشات كرسبى حاااااار وبرجر على كيفك والسلطات والمخلل يا ااااا عينى وقعدنا فى الجربى وبعدها سبت بقه القاعده العائلية واتصلنا باصحبنا ونزلنا فندق خلود النيل الى الجربى هههه وفجاءت الدخول الفرد ب 20 جنيه وطبعا انا زعلت على ال20 جنيه بس دخلت جوه كان جووووووووو رائع فعلا ...
وبليل خرجنا بقه على اللسان ومشينا شويه فى السوق وبجد راس البر تحفه والحياه جميله

ورجعنا بليل تقريبا ب12 بليل وياااااااااااااااااااااه على الطريق انبارح الشبوووووووره فظييييعه مكناااااااااش شيفين نفسنا جوه العربيه ما بالك بره العربيه ........ اول مره فى حياتى اشوف شبوره كده انا كنت مصدووووووووم وقولت اتشاهد بقه هههه واسيب ادارة المنتدى ... والحمد لله رجعنا ارض الوطن سلمين وكان يوم ممتع

واتمنى الجميع يكون قضى وقت جميل

كان فيه ظروف في البيت منعتنا نخرج بس استقبلنا قريبنا وكده في بيت العيله وعملت دماغ برد جامده ما قمتش من السرير يومها ومنعونى من الفسيخ بس قلت لالا لازم اكل فسيخ واكلت فسيخ من وراهم وقلبت معايا جااااامد

عدد الرسائل : 10 تاريخ التسجيل : 18/09/2009

هو شم النسيم بنسبالى هقضية فى البيت مش هخرج ولا اسافر فى حتة وعلى فكرة شم النسيم مش حرام لانة هو يوم اصلا كان زمان ايام الفراعنة كانو بيحتفلو بية عارفين بيحتفلو بية لية انا هقولكو بما ان انا بشتغل فى هيئة الاثار فعندى معلومات كتير اوى حولين الفراعنة يوم شم النسيم دة اليوم الى الليل والنهار بيتساوى مع بعض فكانو الفراعنة بيحسبو التقويم الفلكى بيوم شم النسيم وبيحتفلو فية كانو الفراعنة بيخرجو للمعابد وياكلو بعض الاكالات فى الهواء الطلق يعنى من الاخر كدة هو عيد من اعياد الفراعنة واحنا تطورنا عنهم بناكل فسيخ وبيض ملون

انا بقى ياجماعه عملت عمايل

اول حاجه كنت ناويه اعد ف البيت صراحه لاني كنت تعبانه م الكليه اللي انا فيها دي
بس ازاي؟؟؟؟؟؟؟؟؟؟؟؟؟؟
كنا معزومين عند قرايبنا واتصلو علي واخدت شوية كلامم يارب مايوريكم
وطبعا رحت بالاكراه تحت تهديد السلاح
ماعلينا
رحت وانا اصلا مش بحب الفسيح والحاجات دي
وطبعا اتعملي اكل مخصوص
واعدوا هم عشان يتغدو اما انا اخدت اكلي واعدت بعيد
كنت قاعده لوحدي وانا بتغدى وهم عمالين ييظوني
حسيت ساعتها اني عامله زي التلميذ اللي ماحلش الواجب.......فنبذوه بعيد
يلا كان منظر مش لطيف خالص
بس هم اللي جابوه لنفسهم
ماانا كنت قاعده ف بيتنا بكرامتي
وبعدها قعدت بقى وهزرت وطبعا سمعتهم صوتي الوحش جدا بس دي موهبتي الدفينه ومش هتخلى عنها وهفضل اغني لحد مااموت
وقعدت الاعب ابن خالي واتشاكل معاه واعمل عقلي بعقله
وبجد كان يوم حلو اوي
ماعلينا
بس كده وروحت طبعا انام عشان السكاشن والكورسات وعشان احلم بكوابيس العقاقير والصيدلنيات والعضويه والتحليليه والذي منه ههههههههههههه
توبيك حلو اوي
كنت عاوزة ارغي شويه ههه

ههههههههههه

هاااا ارغى برحتك مفيش مشاكل

ومنتظرين نعرف اخر اخبار المتطوعين حدااانا هههههه

ازيك يامحمد ياعامل الرسيبشن

توبيك جامد
ازيكوا ياكل الناس الحلوة الي هنا

انا اليوم دة مامتي حبيبتي صحتني الساعة 8

وقعدنا وفطرنا وطبعا مننساش كلنا نرخم علي بعض الصبح ودة الطبيعي

وبعدين طبعا خناقة ماما المعتادة مع اختي عشان اختي محتارة تلبس اية
هههههههه

ونزلنا رحنا لتيتا وطبعا كان خالتي وخالتي وخالتي وخالي موجودين معلش معرفتش جمع كلمة خالتي

وخالتي قعدت تقولي كلي فطير اقولها لا تقولي كلي عشان شكلك وحش اقولها لا وطبعا كالعادة الكل ساب الدنيا واتدوروا تريأة عليا

وبعدين دخلت الاوضة اتكلمت عالموبايل لمدة 45 دقيقة وطبعا كل شوية حد ييجي يشتمني

وبعدين بعد مالرجالة كلهم نوروا حطوا بقي الفسيخ والرنجة والاكل اللي ملوش اي لازمة دة

وانا سبتهم ورحت جبت فول وطعمية اكلتي المفضلة وقعدت عالمنتدي اتصفحة

وبرضة هم مش بيرحموا والحمدلله بالاجماع اخدت لقب ياسمين نت

وبعدين ماما قالت نروح نطمن علي بابا عشان هو مجاش وبنكلمة مش بيرد
روحنا لاقينا الكابتن نام وصحي اتغدي ولبس وكان نازل كمان
وطبعا لما اقلق والاقي الاستاذ بابا نازل يتمخطر ومتشيك اكيد مش هيترحم من لساني وماما مش هتخلص من شغل البوتجاز اللي هعملة بينهم

هههههههههههههههههههه
ورجعنا تاني رحنا لتيتا وشغلنا اغاني وقضيناها رقص واغاني عشان عقبالكم ياكل الاعضاء فرح خالي النهاردة
هههههههههه بس وروحت بقي بعد يوم طويل من الاهانات والتريأة

» بيض شم النسيم
» بمناسبة شم النسيم .. الفسيخ فيه سم قاتل .. أنا حذرتكم وإنتم حرين !!!
» شم النسيم اهو جه يا ولاد اهو جه يا ولاد ..